ДугIя

АнцIбукь бетаурси саби дуцIрумла замана. Расуллис къалабали МяхIячкъалализи укьес гIягIнилири. Маршруткаличи кайэс ибси пикриличил гьунила дубла тIашизурлири.

Амма хIябэсилра бицIибсили уббухъун. Гьунчиб машинара тIашхIейулри. Гьалахили чичил-биалра вягIдалавиэс шакхIейкнили кьакьавакIилри. Дебали буцIарлири, берхIилизивад дяхIцIилиу дигIяникесра мер аги. ДяхI игулри, ламдикIулри. ЗянкъикIули хьалли, чилилра телефон кайсули ахIенри. ИлхIели, Расулли телефон кисализи дигIянбариб ва пикрумази викибсиван тIашкайзур. Амма илини дугIя сабри бучуси. Ил Кьудратла ВегIличи дугьайзурли кумекбарагу или тиладиухъун. Гьанна Расуллис я маршрутка, я машина ахIенри дигуси. Илис дигулри МяхIячкъалализи аркьуси сунела шан къаршиикили. Чумал минут сарри дикибти, вецIалцад ардякьунсиван билзулри. Приораличивсини тIашаиб ва хьарбаиб:

- Чина аркьулри, уртахъ? Ил валуси дурхIя уилри.

- МяхIячкъалализи, - иб Расулли.

- Сен гIяхIси, юлдаш, кайи, нура ита сайра аркьуси. Наб гьанбикиб гьанна кел сягIят нуцун гьунчив кавлас или. Ихтилатлизиб шакхебикили, илди жявли шагьарлизи бетаиб.

- ХIезиб хIела цакласслан Жафарла номер лебу? – хьарбаиб машинала вегIли.

- ГIе, леб, - иб Расулли. - ХIуни иличи занкъдяхъя ва вягIдалавии. ХIерила замана ил шилизи аркьуси сай, хIура варх машиналичив аркури. Ил секIайчиб гIур се гIяхIси лебсири Расуллис. Машинала вегIли Расул сунес гIягIниси офисла гьала укиб. Илаб мурталра халаси ярга бирусири.

«Гьаннара чумал сягIят яргаличив тIашилзусирав?» - пикриикIулри Расул. Ил гIурра Кьудратла ВегIличи дугьайзур. УхIна ацIибхIели сунес гьалав ца адам сайри чеибси. Ил тяхIярли бусягIят ца къуллукъ барили илини Жафарличи зянкъдяхъиб. Ил Ирчи Къазакъла уличилси кьакьализибси базарличив уилри.

- ВяхI, нура ила сайри лявкьуси, тIашизигу, - викIар Расул ва хIяжатси секIал асес къалабаикиб. КIелра барх шилизи чарбиуб. Расул калун Аллагьлис ﷻ баркалла викIули… Иш разисси анцIбукь гьанбиркахъухIели, сен биалра ца секIайчи ну тамашавирулра. Набчил варх учIули ца историк левсири. ИмтихIянтачи хIядурикIухIели, авцIали билетлизир илини хIябал-авал сарри хIядурдируси. Сунени делчIунтазирад сабри илис билетра лябкьуси. Тамаша ахIену? ЦархIил дурхIя Манасла базарличи сайцун вякьи машина асиб. Ил илис дебали гIяхIсилира уббухъун. Дила унра устачил варх чуйнарил вякьи гIяхIси къаршибикибси ахIенри. Амма илдигъунти анцIбукьуни детарухIели селис бахъал адамти «везучийтира» или гапбикIути? Илдигъунти мурталра гьарбилзути адамтани хIергъули биэс лерилра секIал Аллагьла ﷻ кумекличил детарути диъни. Кьудратла ВегIлис баркалла викIухIели хамдеш ца шайчир датес чебиркни. Сен адамтани Аллагь ﷻ гьаниркахъуси се-биалра вайси анцIбукь бакIибхIелицун? Илис даим шукрубирес хъумуртули… Мурталра ва гьарил хIяйчир ЧевяхIсиличила хъуммартидая…

РУСТАМ МУРТУЗАГIЯЛИЕВ