ХIура рухънариуд...
(БехIбихьуд гьалабси номерлизиб)
– Гlе, мар саби, хIела урши лебтачив гIяхIси сай, – хъубеш нешла гъайлизи масхараличил ва хIулбукIриличил гъудурриуб Гулишатра.
– ГIе, аги илгъуна саби. Къянара балли пикрибикIуси саби дунъяличиб сунела дурхIяличиб жагаси мицIирси жан агара или, – паргъатли жаваб бедиб ГIяйшатли.
Гулишатли сунела хIевни, костюмти, кофтаби чедаахъес дурасиб. Хъубеш неш илала палтарли тамашарирахъулри, хIулбани чебиуйчи рирххIерирхусин, илди някъбачилра хахамдирулри.
– Се гIяхIдеша илди жагати диубли хьалли ваятIа дирбубли кьадин. Хаслира хIевни къантIти сари, дулгъуби агара. Илди хIевни сарнилизира дейгIестигъунти ахIен. ХIуни чегьурсигъуна шалбар, дубурлан хьунул адамтанира челгьусири. Map саби, ил циила бягIуси бирусири. ХIуни чедаахъибтигъунти хIевнира челгьутири. Амма илдала дулгъуби дирутири… Гьанна биалли шагьарла инсапагартала бекIлибиубсигъуна мурад хъяб-хъуцIруми, кьяшми гьаргдарили башес саби. Нуни биалли вегIла кьаркьала лебтази чебиахъни жагаси анцIбукьлизи халбирули ахIенра.
Гулишатли иличи вайтIа хIеръиб ва кьяркьли чебатур: « ХIушала замана декIарси, гьанна… ХIуни се саби балуси! Някъбани хахаммадирид…
СягIят кIел дикилри. ГIяйшатра селра хIеили дурарухъун. Нура илис гIергъи ратрихьира. Илини уркIилабси дард дурабикахъес хIейгусин, кIунтIуби цIацIадарилри. Гулишатра дурарухъун. Лебтанилра унзала гьала тIашкаризурси ГIяйшатличи пикри бяхIчиаиб. Уршила хьунуйчира гIясили хIерризурли, илини батареяла мякьлабси сунела кIана касиб, дабри чегьур ва хъулирад дурарухъун.
– ХIераягу ихичи, ихала абдал баркьудиличи , гьачам набчи, гьачам сунела муруйчи хIеррилзули, – рикIар Гулишат.
– ПикририкIес, гIясирирес хIяжатли axleн, ахIерси. – ХIяжини хьунул паргъатриахъес маслигIятбариб.
Нура унзаличиряхI ратрихьира, аррукьес замана баъниличила бурира. Ну ГIяйшат абас гIерраэс къалабалири, ил паргъатриахъес дигулри… ДягI тIашбизурсигъунари, ванзаличи дяхIила пусли кадиркулри. ДекIар-декIарти пикруми бекIлизи дашулри, Дила хIулби ГIяйшат аба раргес къяйцIлири. ВокзаллизиряхI аркьули чераира, ил багьлали ганзухъуначирад карулхъулри. Ну разириубра. Илис гIерраира.
– ГIяйшат аба, хIу чина аркьулри, гьанна гъамли цIяббирар. Нушала хъалира ишабад гьарахъли ахIен, раши нушачи…
– СягIят авличиб Мамедкъалализи аркьуси поезд лябкьян, дила рурси, хIед халаси баркалла…
Вокзаллизиб бахъал адамти лебри, держла ва папрусунала гягIли къянкъуби рурцIахъулри. Нуша дахъхIила тянишуниван ихтилатдикIулри. – Дила уршила биштIати биубли биалри,гIур наб селра гIягIнили ахIенри. Сунела дудешла у бихьахъес ца урши левси виалри…ИкI жугъан хьунул адамли дебаси кабцлизи уцили сай. Се барес вирара? Кьудратла ВегI Аллагьла кьадурти я камдарес, я имцIадарес, я дарсдарес хIейрар, дила рурси. Шукру Аллагьличи. Дила ГIялихIяжи сагъли калабгу…
– ХIу сен къалабарикири, ГIяйшат аба, уршила ванаси хъулир ца кIел бархIи каладри гIяхIсиригу. Селичи къалабарикIусири...
– Чиналра гьалакли ахIенра. Шагьарла гIямруличи бурсириэс рирули ахIенра. ГIяйшатли пикрирухъи чебатур: ара-сагъли биубли гIергъи наб илдазибад хIяжатси селра агара. Сен-сен биалра дила хъулиб гIяхIил саби. Шила адамтани, районна хIякимтани дила уршила хатир-хIурмат диру. Илди набчира хIурматличил дугьабилзан. Пе, дила уршила хьунулра вайси ахIен. Амма илала уркIи аргъес гьамадси ахIен. Сунела дурхIни лебти биалри, белики, нешла кьадри багьиши... ГIяйшат абас сунела уркIиличирти лерилра пикруми дурес дигусигъунари.
– Xly шилизир хIеррирули калунсирив, ПатIимат, дила рурси?
– Пе, калунсира.
– ХIебиалли, хIуни балули рургуд, хала нешли xly кIацIла хъимхъри лайдакIахъес сен хIералтусирил. КьацIличи кьяш кацIни халаси бунагь сабгу…
– Наб гьанбикиб уршилира илала хьунуйра кьацIла хъимхърачила бурибхIели, гьимрукIибси рургуд или. Ил паргъатриахъес дигули, нуни ира:
– ДибгIян-хьяш секIайчи пикри бяхIчиаэс гIягIнили ахIен.
– Ил бибгIян-хьяш секIал ахIен! --иб ГIяйшатли, гьалаксаурли.
– ХIед гьанбикибу столличи гъамриубхIели, наб рукес хIейгусири или? Гьункья жявли гуширар. Рукесра дебали дигусири. Нуни пикрибарира уршила хьунуй хIябал адамлис даарила кьадарцун сари хинкIи дарибти или. Шанглизир калунти хинкIи уршила хьунуй нясси бадирализи лайдакIили чедаира. Дила уркIи гьалаксаур, гьандуцес хIериубра, дила рурси.
ГIяйшатли хъатлизи хъатли бяхъиб, ил кьакьаракIни багьеслири.
– Савли нергъличил дарх ванадарес датес асухIебирусирив, холодильникла духIна кадихьес виригу. Чус деркес хIейгули диалри унрубала хялис, житалис яра гIяргIнас дедес виригу... Xlepa, сегъунабси аги сабил мискиндешла мягIна багьурси уршила юртлизиб.
Мамедкъалализи аркьуси поезд бакIниличила багьахъур. ГIяйшат абара нура поездличидяхI датдихьира. Сунес чебаахъибси мерличи каратурли, дурарухъес ралризурра. Дила някъра цIацIабирули, чумал сягIят гьалар сунела уршиличил кьяйда, дигиличил шипIиррухъун. Набчи хъябруцрикун ва андализи уммайрики, чебатур: «Дурхъаси Аллагьлизи хIура хIед ахIертира аманат биаб, дила рурси!»
Поезд батбихьиб. ГIяйшат абани улкьайлабадли бекI гьаббакIахъиб, балуй някъ гьакIбариб. Поезд шулумбухъайчи ну лер мерличир тIашли калунра. ХIулбазирад нургъби чяхIдикIулри. Гулишатли хъубеш нешлис гIергъи мискьилладирарибсиван «хIерагу ихичи» ибси дев гьанбикиб. УркIилис декIбизур. УркIиличи ишгъуна пикрира бакIиб: ца уршилра виубси виалри хIела, тяп хIугъуна хьунулра илис кьадарриахъес, Гулишат!
ХIура рухънариуд.
