Хурег балкьарахъни

Хурег балкьарахъни

ДиштIати чудни (беляшуни)

БетIу башес гIягIнидиркур: 200 мл - шинна, 1 - гидгари, 1 - чяйла кьулса чакарла, 1 – чяйла кьулса зела, 7 гр – дрожжибала, 6 – халати кьулса гIявадешла, 400-500 гр – бетIула. БетIу балшни: ванати шиннизир дрожжи ва чакар дацIахъили, пушдизайчи датирая. ГIур илдази гидгари бархаили, ил гъудурмай аргьурти бетIулизи кертIая. Зе какьурли, ахирличиб гIявадешра бархаая. БетIу кIантIиси, някъбачи цIапхIелкуси биэс гIягIниси саби. КIапIбарили, пушбизурли, кIинали имцIабиайчи батирая.

Дарглис гIягIнидиркур : 500 гр - белкьунси диъла, 2 - цIуба жерши, 50 гр – шинна, зе, перец – бизидеш хIясибли. БибгIянбарибси жерши диълизи бархаая, зе, перец, шин дархааили, гIяхIли гъудурдарая. БетIулизирад журугати мяваби дарили, гьарил кесек тIинтIбарая ва илизи диъ кабихьили, хъар чукурбарили белсеная, яра ити цIапакахъеная. Бара някъбани тинIтIбарили, буцIарбарибси гIявадешличилси игълавлизир кIелра шайчирад дерцIая.

Салат «Венеция»

ГIягIнидиркур: 200-300 гр – гIяргIяла диъла, 3 – зукьити хияр, 200 гр – кореянтала набадари, 1 банка – хIяжланкIила, 2 цула – итан жершила, майонез, кьар. Балкьарахъни: ГIяргIяла диъ камти зеличилти шиннизиб белхьеная, бяргIили гIергъи духъянати кесекуначи бибгIянбарая. Хияртира гъярцIали духъянати жураличил дурсая. Нуси халати тIярхъубар теркализибад дураая. Итан жерши пIянчIаили, лерилра дархаая ва майонез гъудурбарая. 10-15 минутлис холодильниклизи кабихьили, салат хIядурли саби. Хурег ашагьаб!

Пайдалати насихIятуни

КIантIиси нуси цIакьбиубли биалли, илизи цугти кьадарла ниъ дархаили 1 сягIят батирая. ГIур улаличи кабихьили ниълизибад улчIахъеная ва пайдалабарая. Хамирданничил башунси бетIу кIантIисили бетарар, илизи белхьунни бибгIянбарибси картошка гъудурбаралли (2 картошка – 1 кг бетIуличи хIисабли).

Картошка дерцIес гьалар, дирцили, дибгIяндарибти, чIянкIила салфеткаличир деръахъалли, жагали берцIибси камличилти детарар. Картошка къалабали делхьес хIяжатли биалли, иларти руржути шиннизи кьулса бицIили маргарин кабихьая. Делхьунти картошка бизитили детарар, лухьухIели цакамти укроп дархаалли.

Манная крупализибад барибси каш кIантIисили ва бизисили бетарар, крупа чуйнара шинничил дирцалли. Белхьунси диъ бизисили бирар, ил цахIнабли батурли, руржути шиннизи кабихьили, гIур камси цIаличиб руржахъули, белхьалли.

Битили кIантIибируси диъ гьаланачи шинни бяхIяхъунси уркьуйчиб биталли, гIяхIси саби. ЧIумаси диъ кIантIисили ва бизисили бетарар, эгер ил битили, бегI гьалаб горчицали бакили 1-2 сягIят баталли.

ГIур бирцили бара зелабарили, лимонна шинничил бакая, камси заманалис илкьяйдали батурли, буцIарбарибси гIявадешлизиб берцIая. Винегрет салат бирухIели, бибгIянбарибси кьехIе цархIилти овощуначил цалабяхъяйчи, гIявадешлизиб гъудурбаралли, салат жагасили бетарар.

ХIЯДУРБАРИБСИ - НАИДА ГЪУРУЕВА