Мурул адамла хьунуйчи диги имцIадирути 5 лишан
КегIебси чарх, гъярцIаси рай, духъяна кьяшми, жагати гъез ва дяхI-сипат…
Хьунул адамтала жагадешла ислала къалипуни дахъал гьандушес вирар, чучира мурталра нуша гьуцIти, вегIла муруйс бегIлара дигутили ва цайли цатили калес багьандан. Гьаман алкIуси пикри хIясибли, мурул адамтас чеди хIеръибхIели чебиуси хьунул адамла илгъуна жагадешла дурабад цархIил селра гIягIниси ахIен. ИшбархIи нушани бурехIе хьунул адамтала сегъунти хIял-тIабигIят ва къиликъуни гIяхIдилзутил мурул адамтас. ДураберкIибси хьарбауд хIясибли, илди жагати дяхIсипатцун ахIен.
Духудеш ва багьуди
ИмцIатигъунти мурул адамтас дигули саби хьунуйчил жура-журала темабачила ихтилатбикIес, масъулти ирзес. Ил багьандан мурул адамла хIяжатуначи пикри бяхIчииэс чебиркур. Муруллис мягIничерти секIайчи авараагарли диънили, хIуша-ургарти хIялани детахъес ва цаличирад ца гьарахъдикес асубирар. ХIушала ургала балгунси биубли дигадалли, муруйчил ихтилатдикIеная, гьар бархIи се-биалра сагаси балес, дагьрила даража ахъбурцули гьаладяхI дашес къайгъибиреная.
Кункси тIабигIят
Мурул адамтас гьар секIайзирад урухкIуси ва гьар бархIи цаван мешули дуркIуси хьунул адамличил хIериэс жявли анцIбулкьан. Хьарбауд дураберкIибхIели, имцIатигъунтани бурибсири, кункси хIял-тIабигIятличилси, гIямруличил рархралгунси хьунул адамличил се-дигара барес иштяхIдухъесли бирар или. Илцадра гьаннала заманала гIямру къиянхIели, кьасбарая хIуша кIилалра гIямрула шуртIри гьамаддарес, мурул сунела хьуланазив ва се-биалра сархес дигнилизив гIевуцая.
ХайрилигIир умцIхIемцIни
Ил саби цагьатIи хьунул адамлизиб мурул адамлис гIяхIбилзуси къиликъ. ИшбархIила замана илдигъунти хьунул адамти камли къаршибиркули саби. Чус саби дигути, буйрухъбикIес дигути хьунул адамти саби мурул адамтас дигахъути ибсира мархIебариб. Мурул адамтани дигай дирхьули саби чус хайрилигIиб умцIхIемцIути хьунул адамтачи, чулира адамла уркIи-хIял аргъибти ва кумекбарес хIядурти. Илдигъунти хьунул адамтас мурул адамти къакъбяхъли бетаэс хIядурли саби.
ДурхIначи диги
Эгер мурул адам гьалав хъайчикайили, илала биштIати биалли, дебали мягIничебси саби хьунул адам илдачил рархралги хIерриъни. Сецадра дуцIарти дигай диаллира, илди дахъхIи кахIевлан рахли илала дурхIначи хIурматагри дакIудирадалли. Ил суайзир дебали мяхIкамли вяшдикIес чебиркур, хаслира мура биштIатас бяркъ бедес или далмадилзадая. БегI гьалабси яргализир кьасбарая илдачил гьалмагъдикес, илди дигахъес. ИлхIели, хIушала къайгъни чедаили, мурулли хIушала гьатIира халаси хIурматбиру.
Сай левси кьяйда дигахъес
Нуша лерилра илцадра черикIла ахIенра, гьарилтазир лерти сари гIяхIти ва вайти къиликъуни. Цалра адам талихIчевсили хIейрар, эгер цархIилли мурталра ил варсварес къайгъибиралли. Адамти цалис ца саби лебти кьяйдали дигахъалли, бурсикабиубли, цали цалис дигуси иштяхIличил биру. Илдиургарти бархбасуни кунктили ва хIурматчертили детарар. Адамти дусми ардашуцад барсбикIар, цаличи ца мешутили бетарар. Амма илкьяйдали бирар чIянкIли сабур, диги ва хIурмат лерти хъалибаргуназиб… Мурталра цаличи ца сабурличил диирая, илхIели ЧевяхIси Кьудратла ВегIлира хIушачила хъумхIерту…
