БегIлара дурхъаси
ХIуша гьачамалра пикридухъунраяв, ахIерти узби-рузби, дунъяличиб бегIлара дурхъаси, мягIничебси ва кьиматчебси се сабил? Мискинсини ил суайс жаваб луга – давла саби или, зягIипсини – арадеш, цунсини – уркIи иргъуси ва дигичевси гIямрула гьалмагъ, дурхIни агарсини – виштIаси, ятимсини - бегIти, ухънасини – жагьдеш или. Марлира, гьарилти адамтас дигути дахъал сари.
ХIяжи бикIуси урши виштIахIейчивад ца сунела унра ухъначил юлдашли вири. Илини иличил бархли имцIасигъуна манзил буркIулри. Амма замана аркьулри, уршила школа, колледж, цархIилти юлдашуни, гIур хIянчи, хъалибарг дакIудиуб.
Жагьил адамла цалра минут акьуси аги.
Илала замана аги я гьалабла манзил гьанбикахъес, я гъамтачил кали барх беркIес.
Цагьачам илини багьур баягъи сунела унра ухъна вебкIниличила. Илис гьар секIал гьандикиб: ухънани сай дахъал секIайчи бурсиварибсири, сунела алхунси дудешла мер буцес къагъибирусири, насихIятуни дурусири. ХIяжи, сунела гIяйиб аргъили, бялгIяличи къалабаикиб.
БархIехъ, ил хIяриихьили гIергъи, ХIяжи бацIбухъунси ухънала хъули ацIиб.
Иларти гьар секIал гьалар-кьяйда, дарсхIедиубли лералри. Амма мургьила тIакьа, сунезибра ухънани бурни хIясибли, бегIлара дурхъаси секIал бухIнабси, гьалабван столличиб аги.
ХIяжис гьанбикиб ил чидил-биалра ухънала гъамси тухумли касили бургар или ва сунела хъули чарухъун.
Амма кIел жумягIла гIергъи илини посылка касиб, иличиб унра ухънала у чебаили, тирхьухъун. АбхьибхIели, тамашавиуб, илала бухIнаб баягъи мургьила тIакьа лебри.
Илизиб биалли, кисализиб бихуси сягIят, сунечира белкIунси: «Баркалла, набчил барх беркIибси заманалис».
Илини аргъиб, ухънас бегIлара дурхъаси ва мягIничебси замана биъни.
ИлхIейчибад ХIяжини хьунуйчил ва уршиличил имцIали замана буркIес къайгъибири.
Нушала гIямру абатурси гьигьличил умцути ахIен. Илди умцути сари нушани гьигь буцести анцIбукьуначирли.
ХIясан аль-Басри викIусири: «Марлира адам заманализивад цалавикибси сай. Гьарил манзил, бархIи таманбиубси замана, адамла бутIара камбируси саби».
Гьар сягIятличил, минутличил, секундличил нуша бебкIаличи гъамдирутира. Замана – ил хазна саби, нушани кьиматлахIебируси. Заманали нуша бегIлара мягIничебси манзилличи гъамдирулра – иш дунъяличирад итилличи аркьуси. Нуша дикIулра, нушазивад гьарилличи бебкIа хIерли саби или, амма илала сягIятла мягIничебдеш иргъули ахIенра. Иргъути диахIелри, замана дугIли хIебуркIутири, гьарил хIули липIла манзил гIур пашманхIедиэсли буркIутири. Нушала ишбархIила имкантира шуртIрира ункъдикIули диалра, замана кьалли камбикIули саби… Пикридухъеная иличила, ахIерти узби-рузби.
