ХIяжличил дархдасунти суннатла дехIибала
ИхIрамлизи керхнила
Микьатла мижитла мер-мусаличиб (Мадинализибад циила тяйдиси Абару гIали бикIуси мер) ишгъуна нигетличил кьаркьала ицу: «Нуни нигет барира ихIрамлизи керхнилис ва хIяж бехIбихьнилис тамай кьаркьала бирцес Аллагь ﷻ багьандан. Аллагьу акбар».
Чарх умубарили, дехIибайс нигет биру: «Нуни нигет барира ихIрамлизи керхнила суннатла кIел ракагIятла дехIибала дарес Аллагьлис ﷻ. Аллагьу акбар.
Цаибил ракагIятлизир дучIа «Аль-ФатихIя», «Кафирун» сураби.
КIиибил ракагIятлизир дучIа: «Аль-ФатихIя», «Ихлас» сураби.
ДехIибайс гIергъи дугIя биру.
ТIавафла дехIибала
ТIавафлис гIергъи (КягIба 7 алавбарибхIели) макьам Ибрагьимличирад тяйдили ахIи, тIавафла суннатла кIел ракагIятла дехIибала дурадуркIу МухIяммад Идбагли ﷺ дарибси тяхIярли, ишгъуна нигетра барили:
«Нуни нигет барира тIавафла суннатла кIел ракагIятла дехIибала дарес Аллагь ﷻ багьандан. Аллагьу акбар»
Гьар ракагIятлизир дучIути сари:
Цаибил ракагIятлизир – «Аль-ФатихIя», «Кафирун» сураби.
КIиибил ракагIятлизир «Аль-ФатихIя», «Ихлас» сураби.
ДехIибайс гIергъи дугIяличил Аллагьличи ﷻ дугьаилзан.
ХIяж таманбиубли, гIумра (биштIал хIяж) бирухIелира, чедир гьандушибти суннатуни дурадуркIу, хIяж ибсила мерлаб «гIумра» или.
ХIяжлизивад аркьянайла дехIибала
ХIяжи дурхъаси Мадинализивад хъуливяхI ватирхьухIели, аркьянайла кIел ракагIятла суннатла дехIибала диру (илди Идбагла ﷺ мижитлизир дарни къулайси саби).
Гьар ракагIятлизир дучIули:
Цаибил ракагIятлизир «Аль-ФатихIя»;
КIиибил ракагIятлизир «Аль-ФатихIя», «Ихлас».
ДехIибала тамандиубхIели, балга биру, хIяж барахъес имкан гибнилис Аллагьлис ﷻ баркалла икIар.
АрхIяличи аркьнила дехIибала
Сафарличи аркьухIели, суннатла 4 ракагIятла дехIибала диру, гьар ракагIятлизир «Аль-ФатихIя», «Ихлас» сураби дучIули.
ДехIибайс гIергъи Аллагьличи ﷻ ишгъуна дугIяличил дугьаилзан:
«Аллагьумма инна насъалука фии сафарина гьаза-л-бирра ва ттакьва ва миналь-гIямали ма тарзо».
«Аллагьумма гьаввин гIялайна сафарана гьаза ватIви гIянна бугIдагьу. Аллагьумма анта-с-сохIибу фи-с-сафари ва-ль-халифату фи-ль-агьли. Аллагьумма инни агIузу бика мин вагIсаъ-с-сафари ва каабати-ль-манзори ва суи-ль-мункъалабби фил-ль-мали».
«Я Аллагь ﷻ, нушани ХIези тиладибирулра иш сафарлизир нушала баркьудлуми ХIу разиваресли гIяхIти, такьваличилти (ХIезибад урехиличилти) детаахъни.
Я Аллагь ﷻ, кункбара нушаб ил гьуни, къантIбара илала бухъяндеш.
Я Аллагь ﷻ, сафарлизив ХIу нушачил сайри, хъалибарглис аманатра сайри (хъалибарг ХIечи аманатбирулра).
Я Аллагь ﷻ, нушани ХIези берцуди булгулра, ХIечи иш гьунила къияндешуназирад, гьунила анцIбукьеси чебаълизибад, мас-давлализирра, хъалибарглизирра, хIейгести дарсдешуназирад мяхIкамдарахъес.
Илди дехIибайс нигет ишкьяйда биру: «Нини нигет барира сафарличи аркьнила суннатла 4 ракагIятла дехIибала дарес Аллагьлис ﷻ. Аллагьу акбар».
Сафарличивад чарухънила
Сафарличивад чарухъунхIели, Аллагьлис ﷻ баркаллаличил сафарличивад чарухънила суннатла кIел ракагIятла дехIибала диру. Илдира мижитлизир дарни къулайси саби.
Нигет биру: «Нуни нигет барира сафарличивад чарухънила суннатла кIел ракагIятла дехIибала дарес Аллагьлис ﷻ. Аллагьу акбар». «Аль-ФатихIялис» гIергъи «Кафирун», «Ихлас» сураби дучIа (яра цархIилти).
ДугIялизир гьунчир дигу-хIейгули детаурти бунагьуначивад чевверхахъес, уркIецIибарахъес тиладибиру. Сай хъалибаргличи ара-сагъли чарухъахънилис шукру бирули, гIяхIси гIибадатличил, тасбихIуначил, тахIмидуначил, тагьлильтачил, такбиртачил ва цархIил кьяйдали балахъа.
Хъуливад дуравхъес гьалар дирути дехIибала
МухIяммад Идбагли ﷺ буриб, ишди дехIибала дируси Аллагьли ﷻ вайси ибсилизивад мяхIкамиру или.
Илди кIел ракагIятла суннатла дехIибала сари, илдазир дучIа:
1 – ибил ракгIятлизир – «ФатихIя», «Кафирун»;
2 – ибил ракагIятлизир – «ФатихIя», «Ихлас».
Нигет: «Нуни нигет барира хъуливад дураулхънила суннатла кIел ракагIятла дехIибала дарес Аллагьлис ﷻ, Аллагьу акбар».
ДехIибайс гIергъи дугIялизиб сай, бегIти, урши-рурси, хъалибарг, узи-рузи, тухумти ва цархIилтира вайси ибсилизибад мяхIкамбарахъес Аллагьлизи ﷻ тиладибиру.
Шукрула дехIибала
Аллагьли ﷻ адамлис дахъал нигIматуни сахаватли пешкешдариб. Кьуръа 70 – лицад аятлизиб бурили саби илди нигIматуни гибнилис, адам ЧевяхIси Аллагьлис ﷻ даим баркалла икIес (шукруикIес) хIяжатси биъниличила: «ХIуша баркалла дикIадалли, хIушала шукруличи Ил разиирар. («Зумар», аят 7).
«Аллагьли ﷻ хIушаб лихIби, хIулби, уркIи гиб, хIуша Илис шукрудикIути детаахъес» (Нахль, аят 78). ХIулби гибни арагIеб 500 дусла гIибадатличил цугбиркур.
«Дила нигIматунас хIуша баркалла хIедикIадалли, хъябирулра, дила танбихI цIакьси бирар».
Аллагьлис ﷻ шукру биру дугьбачил, баркьудиличил ва уркIили. ГIергъиси бегIлара чихъси саби.
Аллагьлис ﷻ шукрубирнила дахъал журабазибад саби шукрула дехIибала дирни.
Шукрула дехIибала 2 ракагIятла сари.
Нигет биру: «Нуни кьасбарира шукрула суннатла кIел ракагIятла дехIибала дарес Аллагьлис ﷻ. Аллагьу акбар».
Илдазиб «Аль-ФатихIялис» гIергъи «Зульзилат» (цаибил ракагIятлизиб яра «Кафирун»), кIиибил ракагIятлизир – «Кафирун» яра «Ихлас» дучIа.
ДехIибайс гIергъиси дугIялизиб Аллагьлис ﷻ шукру-баркалла балахъу, уркIецIибарни тиладибиру. Аюб Идбаг излумазивад сагъиубхIели, Кьурайзиб бурни хIясибли, илини Аллагьлис ﷻ шукрула 2 ракагIятла дехIибала детерхахъур.
Илди дехIибала Аллагьлис ﷻ шукрувикIнила цархIилти журабала къяйлизир уржили диэс гIягIнибиркур, сенкIун Аллагьлис ﷻ шукруикIни дехIибала детурхахъницун ахIен.
