БегIлара къиянсигъуна – адамла уркIила изала

ГI.МяхIяммадовлис - 75 дус

ИмцIаливан уркIила изайзибад бубкIутала лугIи халаси бирар. Илдигъунти излуми камдиахъес ва, кахси изайзирад адамла жан дерцахъес ибси пикриличил жигарчевли узули сай иш белкIла игит, медицинала гIилмуртала доктор, профессор МяхIяммадов ГIябдуллагь ХIянаевич. Ил Дагъистаннизивцунра ахIенну, арагIев Россиялизивра машгьурси кардиохирург сай.

ГIябдуллагь ХIянаевичли адамтас дарибти операциябачила гъайикIалли, адам дебали тамашавиэсти хIяланази виркур. Нуни далулра илини дарибти кIел журала уркIила декIти операцияби. Мисаллис гьанбуршехIе: шин дяргIили, миъаурси ваннализиб наркоз бедили, барибси операция. ГIуррара цархIилти журала операцияби дурадуркIули сари илини.

ГIябдуллагь МяхIяммадовли мурталра сунела бузери сабур-яхIличил, адамдешличил ва чеветаибдешличил бетурхахъули вирар. Илдигъунти декIар-декIарти операцияби дурадуркIес багьандан, илини Дагъистаннизиб кардиологический центр акIахъуб. Гьалар ГI.МяхIяммадовли бекI тухтурла, бекI тухтурла заместительла къуллукъуни жавабкардешличил тамандирутири, гьанна биалли, ил клиническое отделениела заведующий сай.

ГIябдуллагь МяхIяммадовли уркIила тухтурла санигIят ункъли бяркъурси саби Воронежла мединститут белчIунхIели. 1981 ибил дуслизиб илини кандидатская диссертация бетерхахъур, илаб лебтири гIилмулати руководительти Л.Косоноговра Ф.Радушкеевичра. 1989 ибил дуслизиб Москвализиб докторская диссертация ункъли бетерхахъес бажардиикиб. 1991 ибил дуслизив гьалав Дагъистанна арадеш мяхIкамбирнила шайчивси министрли узули калунси Ибрагьим Ибрагьимовли ГIябдуллагь МяхIяммадов республикализи узахъес живарибсири.

Буралли, ГIябдуллагь ХIянаевич тухтурцунра ахIенну, Дагъистанна медакадемиялизив преподавательра сай. Илав ил госпитальная хирургиялашалси кафедрала заведующийли узули сай. Чула хIянчи устадешличил бузахъес къайгъилизибти бахъал жагьил тухтурти хIядурбариб илини. ГI.МяхIяммадовли буруливан, хирургла санигIят дебали сабурчевси ва чеветаибси адамличи хасси саби. Ил сай акIубси Ахъушала шилисра шантасра бамсриагарси бузерила гIибратли ветаур.

БелкIла ахирлизив хIурматла профессор ГIябдуллагь ХIянаевич 75 дус вирнила юбилейличил уркIи-уркIилавад мубаракварес дигулра. Дагъистаннизиб ихгъуна халаси ва багаласи хIянчи бирнилис хIед халаси баркалла! Арали ватаби хIура, мурталра арали калаб хIела пергер хъалибаргра. Тяп хIуниван адамтас гIяхIдешуни дирули халабикIаб дурхIнира. Дерхъаб хIела гIямрура жанра!

ХIялалдиаб, ГIябдуллагь!

Адамла излумачил

Душмайчилван ургъуси,

Изала кабушили,

Арадеш кабирхьуси.

Узен чебарбикули

УркIиличибси балагь,

Чумлира иб ва иру:

«ХIялалдиъ хIед, ГIябдуллагь!»

Тухтурла устадешцад

Лер хIезир адамдешра,

Вахъ гьалайкес дигахъид

ХIурмат-хатирлизивра.

Гьанналичибра гIяхIил

ХIед гIуррара гьарбилзаб,

Адамтачивра цIакьли

Аллагьра ﷻ разивираб!

БегIлара къиянсигъуна – адамла уркIила изала