БегIлара гIяхIси дарс
БегIлара гIяхIси дарс
Гьачам мугIяллимра илала мутагIялимра дурсрала гIергъи къунзбухъес пикрибариб. Илдани гIямрулизир кадиркути анцIбукьуни хIисабдирулри ва илдачила ихтилат бикIулри.
Илдала дурести дахъал сарри, иличиблира жагьил учIанни халаси пайда кайсулри. Авлахъличи баибхIели илдани илабси ванзаличив узуси мискин адам чеиб. Хъула дублар биалли илала дуркьти дабрира, плащра лерри. Жагьил учIанни масхаралис ил адамла палтар урдихьили, илини се бирул хIербизес ибси пикри гьалабихьиб.
МугIяллимлис ил пикри гIяхIхIебизур ва цархIил пикри гьалабихьиб: «ХIед се-биалра тамашала секIал чебаэс дигули ургуд. ХIукIун давлачевсири ва хIед селра хIебирар илала гьар дабрилизи ца-ца мургьила къуруш кайхьадли ва дигIяникили мискинни се бирул хIеризадли. ХIед ил секIал дебали гIяхIбилзан или гьанбиркули саби…» УчIанни илала пикри гIеббуциб ва тяп ил викIуси бариб.
Мискин адам сунела хIянчи тамандарили, ваяхI лерси мерличи гъамиуб. ДигIянбикибти мугIяллимра мутагIялимра илини се бирул хIербикIулри. Мискинни касили плащ чебяхъили, дабри чегьур ва … ганз кайцIухIели серил диргалабикIни гьанаур. Дабри чеббатурли, пяхIбарили хIерикIалли, мургьила къуруш! КIиибилра чеббатурхIели – цагьатIи къуруш! Алавчарли хIеризур – чилра агара. Илала разидешла ахир аги. Ил кьукьмусикили зубрачи някъби гьадуциб ва Аллагьлис ﷻ шукру бирули улгесииб. Илала баркаллала дугьбазибад дигIянбикибтани аргъиб, сунела хьунул зягIиприкили, бегIлара къиянси манзил ЧевяхIсини сай лайхIекIни ва кумекбарни…
МугIялим нургъбани хIулби дицIибси учIанничи пишяхъили хIерикIулри. «ХIед чебааибси гIяхIбизуру?» - хьарбаиб илини. «ХIуни наб кадихьибтазибад ил бегIлара гIяхIси дарс сабри…» - жаваб бедиб учIанни.
