Редакциялизи суал

- ЗухIяла суннатла дехIибала дирнила тяхIярличила бурили дигахъира…

ЗухIяла дехIибала

Суннатла зухIяла дехIиба замана биур мусисиртличибад берхIи гъуцла кьадар – 3,5 метрла ахъбиубхIели ва таманбирар хIерейсла дехIиба замана биухIели. ГIяхIси саби илди дехIибала бархIила авал бутIала ца бутIа арбякьунхIели дарни. Илди мижитлизир дарни дебали кьиматчебси саби, чула замана баайчи илав кали.

ЗухIяла суннатунала ракагIятунала бегIла камси кьадар 2 саби, (кIел ракагIятла цадехI дехIибала), дегIла дахъал – 12 (кIикIел ракагIятла урегдехI дехIибала). Асубирар 4, 6, 8 ракагIятуни даресра. Нигет биру гьар дехIибайс. «ФатихIялис» гIергъи делчIахъес чедаахъили сари:

Цаибти дехIибайчир: «Аш-шамси» (Кьуръа бяхI 595), «Кафирун».

КIиэсти дехIибайчир: «Аз-зухIя» (Кьуръа бяхI 596), «Ихлас» (Кьулгьу), гIергъити дехIибайзир: «Кафирун», «Ихлас».

«Аш-шамси», «Аз-зухIя» хIедалули, зухIяла дехIибала хIедарили датурливан ахIи, далути «Кафирун», «Ихлас» делчIи дарни дебали къулайси саби.

Дахъал хIядисунани бурули саби зухIяла дехIиба халаси кириличила ва диштIати бунагьуни ицниличила.

ЦацабехIти гIялимтани зухIяла дехIибайс гIергъи иш балга барахъес маслигIятбирули саби: «Раббигъфир ли, вархIамни ва туб гIалайя, иннака анта-т-тавабу-р-рахIим».

МягIна: Я Аллагь ﷻ ХIу набчивад чевверхи, набчи ряхIму-уркIеци бара, ну ХIечи чарулхъусира, ХIези саби тавбаикIес гIягIниси, тавба кьабулбируси ца ХIуцун сайри, ряхIмула ВегI).

Адамлизир 360 лига лерти сари, илдала гьарилличи садакьа хъарси саби. ЗухIяла суннатла кIел ракагIятла дехIибай илдас садакьалара мер бурцу.

Идбагла ﷺ суннат хIясибли, хIедарили уркалунти зухIяла дехIибала черихъу.

ЗухIяла дехIибала таман-диубхIели, гIергъиси дугIя биру:

«Аллагьумма бика ухIавилу ва бика усавилу ва бика укьатилу.

Аллагьумма инна ззухIаъа зухIаука валь багьаъа багьаъука валь жамаля жамалюка валь кьуввата кьувватука валь кьудрата кьудратука ва ль гIисмата гIисматука. Аллагьумма ин кана ризкьи фи-с-самаъи фаан-зилгьу ва ин кана филь арзи фа ахрижгьу ва ин кана мугIассаран фаяссиргьу ва ин кана хIараман фатIигьиргьу ва ин кана багIидан факьаррибгьу бихIакъкъи зухIа-ика ва багьаика ва жамалика ва кьув-ватика ва къудратика атини ма атай-та гIибадака-с-солихIин(а).

КIинайс 80-йна яра 100-на тикрарбиру:

Рабби гъфирли вархIамини ва туб гIалайя иннака анта-ттаввабу-ррахIим.

ХIядис: «ЗухIяла 2 ракагIят дарибсила у пикрумазиб чебетаибдеш агартала урга хIелукIа, 4 ракагIят дарибти Аллагьла ﷻ разидеш сархес къайгъибирутала урга лукIа, 6 ракагIят дарибти, Аллагьлис ﷻ мутIигIтала урга лукIа, 8 дарибси Алжанализи аркутала сияхIлизив вирар, 10 дарибси ил бархIи дарибти бунагьуназивад умувиру, 12 дарибсилис Алжанализиб юрт тIашбалта».

ЖумягI бархIила зухIя

ЖумягI бархIила зухIяла дехIибала 4 ракагIятла сари.

Гьар ракагIятлизир дучIа:

1. «ФатихIя» -вецIна 4. «Нас» - вецIна
2. «Ихлас» - вецIна 5. «Кафирун» - вецIна
3. «Фалакь» –вецIна 6. «Аяту-ль-курсий» - вецIна.

КIелра шайчибяхI салам бедили гIергъи:

70 – Астагъфируллагь

70 - СубхIяналлагьи ва-ль-хIамду лиллагьи ва ла илагьа илла ллагьу ва ллагьу акбар. Ва ла хIавла ва ла кьуввата илла биллагьи-ль-гIалийи-ль-гIазим.

Илди дехIибала дарибсилис, кири бурес агарли халаси биур, илди дарибси инсанталара жиндралара зарайзивад вихIу.

Сентябрь базла номерлизиб иличила тIинтIли бурили саби