Кьиркьирдешла багьа
Кьиркьирдешла багьа
Цагьачам машгьурси шайхла бучIанти дарсличи кабиили лебли, илдазивад цалис шайх цархIил мутагIялимличи вайтIа хIеризурсиван гьанаур. Ил чебаибсини, лебтазилра иличила буриб, ва илданира ил мучлаагарвирулри.
Шайхлис дигуси дигахъес ва хIейгуси хIейгахъес узидешла хьулчилизи халбирули. Ил баягъи мутагIялимли ил секIал чебаили, шайхличи вакIили викIар: «ХIурматла шайх, ну цархIилти муридунани мучлахIейрулра, увяхIли чейулра. Ил секIай дила гIямруличира асарбирули саби. Наб дигахъаси илдигъунти тяхIяркьяйда агардарес, гьайгьай, хIуни ихтияр барадли».
«Иличибра гьамадси селра агара, - викIар шайх – нушани кадиили зикру бучIес дехIдихьибхIели, хIу набчи гъамиубли се-биалра лихIилизи шивкIивбара, нунира илкьяйда хIедра жаваб чарбирис». ЛехIдешлизиб шайхра муридунира кабиили, гIяшли уркIила зикру бируси замана, баягъи ил мутагIялим айзурли, шайхличи гъамиуб ва илала лихIилизи серил шивкIивбариб. Шайхли ил урезиагар гьавяхъесила мерлаб, илис бекIли лишанрабарили, жавабра чарбатур. Ил анцIбукьла гIергъи, тамаша ахIену, ил мутагIялим лебталалра-ургав бегIлара дигусили ветаур, хIебиалли гIур чис асубирусири зикрула манзил шайхличил шивкIивикIес?!
ЦархIилти мутагIялимти селра аргъес хIебирули, инжитбирули, ахирра шайхличи бакIили бикIар: «Ва шайх, асубирару нушаб багьес хIуни хIела дигуси учIаннизи се буририл, нушара илкьяйда къайгъичертирагу?» Шайхли илдази чула ихтилат буриб:
- Вякьдизурти хIулби чедиулив?
- ГIе. - Илди сецадлис кадилзана?
- Мургьила къуруш нуни илдазибад сеналра сайсис. Иличибли илди гьатIира бархахъиб ва бареси хIебалули илдани «дигуси» учIаннизи хьарбаиб. - Шайхли хIушази чебаахъиб хIушани секIал сецадла чедихIяртли пикрибирулрал. Ил набчил шивкIивухъунхIели, хIушани ил хасси лишаннизи халбарира ва набчил цархIил тяхIярли шикьдикIес дехIдихьира.
- Бура, се мягIна сабил хIушала ихтилатла? - Бурис, чIянкIли наб мургьила къуруш гибхIели. Илдазибад ил касили, илини аргъахъиб – вякьаибти хIулби – илди хIушала хIулби сари, кьиркьирдешли ва секIал багьес дигнили вякьаибти. - Илизибад нушани сегъуна дарс касес гIягIнили гьатIи? -Кьиркьирдешли ва тамяхIкардешли хIушала адабдеш деткайхъахъулра.
БусягIят хIуша шайхла хIулбазир уряхIдикира ва мургьила къуруш агарли калунра. Кьиркьирдеш ва хIясаддеш хIушаб диргаладулхъули сари Аллагьличи ﷻ гъамдиахъес багьандан. Ил секIал хIушази чебаахъес сабри нушани илкьяйда барибси. ХIердикIеная, нушаб се-биалра гьанбикили или, нушани хъярхъли адам увяхIварес яра ахъуцес хIядурлира. Пикридухъеная иличила.
