Усуси адам вебкIибсигъуна вирар

Усуси адам вебкIибсигъуна вирар

«АльхIамду лиллягьи-лляҙи ахIяна ба’да ма аматана ва иляйгьи-н-нушур» МягIна: «Шукру Аллагьличи ﷻ нуша дебкIили гIергъи мицIирдарнилис, Сунечи сарра нуша чардулхъутира».

Усуси адам вебкIибсигъуна вирар – ибти гъай гьаман дурули дирар. Марлира, илди дугьби гьаваличирад касибти ахIен. ЦацабехIти бусути чула гьанкIлизи дебали мурхьбикили, селилра абизахъес хIейрули бирар, цархIилти биалли, кабихьунихIибад сеналра вяшхIебулхъули бирар. Ил анцIбукь гIяхIси ахIен, адам вахъхIила заманализив ца тяхIярличивад ласхIевхъи калалли, илала кьаркьайс заралласи саби. Кьаркьайзирти хIила тумазирад, хIиличил дарх адамла кьаркьайс хIяжатти минералти дашути сари.

Адам вахъхIила замана ца тяхIярличивад ласхIевхъи калалли, кьаркьа декIдешли илди туми гъяжкадирути сари, кьаркьайс хIяжатти секIал мерличи хIедиур ва хIи камли дашар. Ил мерларра тумала, хьанцIа дяхъурби детарули, бемдурси камла мер бетарар, урус мезлира илдас «пролежни» бикIар. Илди заманаличир арадарес къайгъилизи викес хIяжатбиркур, сенахIенну илди дахъхIи даталли, вай изайчи шурдухъес асубирар, ахирра илдани адам бебкIаличи левку. Сунела биркIанти вяшхIедикIандиубли, хIедузандиубси, зягIипси адамлис къулукъла декIарси ва хасси жура лебси саби. Илди гьар кIел сягIятла бухIнаб ласбирути саби, илдас декIарти, хутIличил дузути кроватуначи кадирхьути бурушунира дирути сари. Ил секIал балутани 19-ибил даршдусла ахирличиб кабизахъурсири.

Тамашала анцIбукь ахIену гьатIи, 14 даршдус гьалаб нушачи хьурабарибси Дурхъаси Кьуръайзиб ил гьанбуршули саби. Нушанира балуливан, ГIиса Идбагла u манзиллис гIергъиси заманализиб «АсхIябул кагьфи» - гIиникъла асхIябти бикIути адамти калунтири. Илди, чула иманничибад чебхIебухъни багьандан, язихъбарибти асхIябти сабри. Илди гIиникъла цалабикибхIели, душмантани илди бебкIахъес гIиникъла ухIнаулхъуйхIи халаси шури кабихьили, кIяпIбарибтири. Илди биалли, бухIнаб бускаунтири, 300 дус дикили гIергъи илди Кьудратла ВегIла ахъриличибли гьанкIлизибад чебаргъибтири. Аллагьли ﷻ лерил фитнабазибад илди берцахъибтири. Аллагьра ﷻ Кьуръайзив викIули сай (мягIна): «ХIед гьанбиркулив илди чебаргъибти саби или. Марлира, илди мурхьси гьанкIлизиб бусули саби. Нушанира илди балуй шайчира, алгъай шайчира шурбирулира…». Аллагьли ﷻ илди бахъхIи ца тяхIярличиб кахIелахъес ца шайчибад итил шайчи шурбирули калири.

МУХIЯММАД ХIЯМЗАТОВ