Редакциялизи кагъар
Редакциялизи кагъар
Дила ну-вегIси жагадешла салон леб. Илаб хьунул адамти жагатили бетарахъули саби. Гъез рурхьули, маникюр, педикюр, гIурра цархIилтира къуллукъуни гIердиахъули сари. Гьанна набзи бикIули саби: «Валлагь, илгъуна салон бихIни багьандан хIед бунагь саби, сенкIун салоннизиб жагьил рурсби жагабирахъулри, ва илдачи кьакьализиб мурул адамти шавкьличил хIербикIули саби». Илала дурабад, хьунул адамтани мурул адамтала гъез кьицIдирес асубируси ахIен или бикIули саби. Нуни се бариша? Салон кьяпIбаришав? Иличила тIинтIли багьес дигахъира.
Гьайгьайрагу, хIу илгъуна журала баркьудилизив узнилизивад гIелумизадри къулайсири. ХIечиб жагабиубти хьунул адамтира бунагьунала баркьудлумази ихъули биэсра асубирар. Амма шаригIятли илгъуна салон бихIяхъес асубирахъули саби, эгер илизир цацадехIти къуллукъуни дирнилизибад гIелумбизалли.
ШаригIятли къадагъабируси саби:
1.КIунтIуби, къянкъуби, нудби, ляжуби ва цархIилтира кьаркьа биркIантала жура жагадешлис дарсдирес.
2.Шери хIерякьунси хьунул адамлизи бекIла гъез цIудара рангли рурхьахъес. Шерирси хьунул адамлис гъез цIудара рангли рурхьес асубирар, муруй пурбанбирули виалли.
3.Шерирси хьунул адамлис муруйзи хьархIебаили бекIла гъез кьицIдарахъес асубируси ахIен.
4.Хьунул адамлис цархIил хьунул адамла гъез (кьицIдарили гIергъи вегIла гъезра) пайдаладирес. Асубируси ахIен диъ букахъес къадагъабарибти мицIирагла гъез (гулбира) пайдаладиресра. Муруй пурбанбаралли искусственный гъез пайдаладирес ва шаригIятли тIалаббируси тяхIярли белгьунси мицIирагла гъез пайдаладирес асубирар.
- Татуаж (бултIниби) дирахъес къадагъабарибси саби.
6.Нудбазирад гъез лутIес асухIебирар. Исламли къадагъабируси саби нудби гъярцIдиахъес или гъез лутIахъесра. Ца ити нудбазирти гъез лутIни хIярамси саби.
7.Шери хIебякьунти хьунул адамтас косметика пайдаладирес асубируси ахIен. Шерибтас асубирар, муруйзибад ихтияр сасили.
8.Цулби лукесра асубируси ахIен, цацабехIти гIяртистунани кьяйдали.
Шерирси хьунул адамли мура разидешличил кьяшмира някъбира хнали дерхьес асубируси саби. Шери хIерякьунси хьунул адамлис ил бирес асубируси ахIен (карагьат).
Хьунул адамтас хьунул адамтани дирули диэс гIягIнибиркур салоннизир къуллукъуни, мурул адамтас — мурул адамтани.
Аллагьли ﷻ лягIнатбушибси саби сунела куц барсбирусиличи, ил сай Аллагьли ﷻ акIахъубсигъунали калес гIягIниси сай, амма цацадехIти жагъалти урдизахъесра асубируси саби. Жагадешла салонтазибад пайда лебси саби, амма илар шаригIятла тIалабуни тамандирули диэс гIягIнибиркур. Салонна вегIлис шаригIятли асухIедирахъути журабала къуллукъуни дирнилизивад гIелумизес чебиркур. ШаригIятли асудирахъути секIалра асухIедирутала лугIилизи кадерхахъес асубируси саби, илди къадагъадарибти мурадунас пайдаладирути анцIбукьуназир. Иличила хъумуртес асубируси ахIен.
ЦархIилван буралли, кьаркьа биркIантазир жагадешлис сегъунти-биалра дарсдешуни дарахъес къадагъабарибси саби. Медицинала шайзибад ил барес хIяжатдеш акIубхIели анцIбукь декIарси саби. Кьаркьайзирра дяхI-сипатлизирра дарсдешуни дурадеркIес асубируси саби чIянкIли иличибли бехIемцIлизиб яра цархIил сабабли адамла нукьсанбикибси арадеш къулайбаресцун.
