Хайдакьла районна имамла вягIза
Имамличила баянти:
Мирзаев МяхIяммад ГIябдулжалилович акIубси сай 1971 ибил дуслизив, Хайдакьла районна Жавгъатла шилизив.
1988 ибил дуслизиб шила школа таманбарили гIергъи, гIярмияла къяяназиб кIел дус къуллукъбариб. 1993 ибил дуслизив имам ШафигIла уличилси Дагъиста Исламский университетлизи керхур ва ил сархибдешуначил таманбариб. 1999-2000 - ибти дусмазив Жавгъатла шила имамли узиб. 2016 ибил дусличивад вехIихьили, Хайдакьла районна имамтала Советла председатель сай.
Районнизир 40-йчир имцIали дузути мижит лер, илдазирад 20-личир имцIати мижитуназир жумягIла дехIибала ва вягIзаби дирули сари. Гьар базлизир районнизир Кьуръан уркIиличиб бучIнила – хIифзла конкурсуни детурхути сари. Илаб имцIаливан Мажалис, Чумли, ХIулли, Жавгъат, ЧIибяхIни, Родниковый ва Гъазия шимала бучIанти декIарбулхъули бирар. Динна багьудлумазиб бучIанти гьалабяхI башахъес багьандан, халаси къайгъи дакIубирути, чебяхIси даражала багьуди касибти мугIяллимти лебти саби, илдас халаси баркалла багьахъес дигулра. Гьаннала жагьилтас нуни бурес дигуси насихIят саби - нушала Идбагла ﷺ ва гIялимтала бархьси динна гьунчибад чебхIебалкIи башахъес. Нушала шайзибад биалли, нушани дирусигъуна кумекбирехIе.
Бисмиллагьи ррахIмани ррахIим, альхIямдулиЛлагь, вассалату вассаламу гIяла МухIяммадин ва гIяла алигьи ва асхIябигьи ажмагIин. Ассаламу гIялайкум ва ряхIматуллагьи ва баракатугь! АльхIямдулиЛлагь, Аллагьлис ﷻ деза ва гапъала диаб нушаб лигIматуни гили, МухIяммадла ﷺ умматла дарибти. Аллагьу ТагIяла ГIязизуль важалла, гьарил нушани барибси гIяхIси баркьуди–гIямал Аллагьли ﷻ кьабулбараб.
Дурхъаси дуббуцарла Рамазан базлизиб Аллагьли ﷻ гьариллис ахъри бедаб дубдурцахъес, кулпет-хъалибаргунази баракат имцIадараб, гьунар-цIакь дедаб, Аллагь ﷻ валули, Илини чебиахъуси бирахъес. Дурхъаси Рамазан базлизиб хIярамси бархьбатахъурли, гIяхIдешуницун дирахъес ахъри бедаб, я Аллагь ﷻ !
Рамазан базла дурхъадешличила ва илизирти лигIматуначила нушала Идбагла ﷺ дахъал хIядисуназибра бурили саби. Илдала мягIна саби Аллагьли ﷻ нушачи хъарбарибси барнилис, вягIда марбарнилис дахъал шабагъатуни лерниличила. Илдазибад бегIлара мягIничебси саби ЧевяхIси Рамазан базлизиб дуббуцибти адамтала бунагьуначивад чеввурхни. Абу-Гьурайрани (р.гI.) баахъибси цархIил хIядислизибра леб (мягIна): «ТаравихIуни дирули Рамазан базлизирти дугурби мицIирдирусила, Аллагьличи ﷻ иманра бухили, вягIдара марбарили, гIяхIдешуни дирули, дубурцусила бунагьуначивад ЧевяхIси чеввурху».
ГIуррара балахъули саби Рамазан базлизир Аллагьу ТагIялани Алжанала унза гьаргдирути сари, уркIецIи-ряхIмула унза кьяйда. Жагьаннабла унза биалли, кьяпIдирути сари, адамтас диргалахIедухъахъес шайтIунтира рахажунази дилгьути сари. Илдигъунти нушаб лигIматуни лугухIели, ил дурхъаси базла хIурматбарили, Аллагьлис ﷻ тIагIятра имцIабарили, дахъал шабагъуни сархес къайгъибарес чебиркур. Ил нушаб гибси фарзла дуббуцарла ца баз, нушани гIяхIдешуни дирули, садакьа буртIули, зягIиптачи уркIецIибирули, гъамти хIерудили гIеббуцили, балга-дугIя, дехIибала дирули, дубдурцули, Аллагь ﷻ разивиэсли беркIес къайгъи дакIубирехIе. Нушала дарибти гIяхIти гIямалти 70 –цIайнали имцIадарили, даража гьатIира ахъбуцес имкантала баз саби ил. ЧевяхIси Аллагьли ﷻ тавфикь бараб нушаб лерилра черти дирахъес багьандан! Амин.
