Мавлидла мягIна
Мавлидла мягIна
Гьанна нушачи сабаибси дурхъаси РабигIуль-авваль баз мавлидунала базлизи халбируси саби. Дагъистанна Муфтиятла председатель МухIяммад Майрановли мавлидла мягIналичила ва ил бусурмантани секьяйда дураберкIес гIягIнисил цалабикибти журналистунас баянбариб.
«Мавлид гIяраб мезличибад шурбаталли – акIубси бархIи ибси саби. Ил нушани дурабуркIулира мекъ бирухIели, биштIати акIубхIели, сагати хъулрази гечдирухIели, гъамси вебкIибхIели ва цархIилтира анцIбукьуназиб. ИлхIели нушани Кьуръа сураби дучIулра, зикруби дирулра, нушала МухIяммад Идбаг ﷺ дурхъаварили, ил гьануршулра, иличила хабурти дурулра, балга–дугIя дирулра, садакьа буртIулра, хурегли балхулра. Хаслира илдигъунти далдуцуни дурадуркIулра «РабигIуль-авваль» баз бехIбихьибхIели. Илис халкьра мавлидунала баз или бикIар, ил базлизив нушала Идбаг ﷺ акIубхIели. Гьайгьайрагу, нушала Идбагла ﷺ манзил ил тяхIярли мавлидуни дурадуркIути ахIенри. Амма илини сай акIубси РабигIульавваль базла 12 ибил итни бархIи декIарбирусири ва дубурцусири. Нушани гьаннала замана мавлид дурабуркIнила тяхIярлизиб селра къадагъаласи хIебиалли, ил дураберкIес асубирар, чIянкIли къадагъалати се-биалра, мисаллис делхъ-далайгъунти секIал гъудурдирули хIедиалли. Чедиб гьанбушибси тяхIярли, нушала Идбагличи ﷺ дигиличил, илала хIурматлис дурабуркIуси биалли, мавлидлис цалра динна гIялимла къадагъа агара. Ибну ХIажар аль-Аскьалани викIусири: «Гьарил сагадеш – ил хатIа саби» ибти дугьбала мягIна Идбаг ﷺ вебкIили гIергъи, ил диннизиб далил ва хьулчи агарси сагадешличила саби. Сагадешлизиб гIяхIсицун биалли, ил бидгIя (cагадеш) ахIенну, асубируси саби. (Бухарила хIядисуназибад «ФатхI уль-Бари» 4 том, бяхI 298). Мисаллис, Идбагли хъарбарибсири зикру бирахъес «гьануршая Аллагь ﷻ …», дугIя, садакьа, ва гьарилли сунес дигуси манзил илди дирес вирули сай. Аль-Байгьакини имам ШафигIличибад баибси буриб: «Сагадешуни кIел журала дирути сари – Кьуръайзир, суннализир ва ижмализир (лебил гIялимтала цауркIси пикри) агарти – илди асухIедирути сари. ГIяхIти ва асудирути сагадешуни биалли, мардирули сари ва къадагъадирули ахIен. Илдигъунтазибад саби бусурмантани дурабуркIуси мавлидра. Нушани мавлид бируси тяхIярлизирти гIяхIдешуни сари: садакьа бирни, Аллагь ﷻ ва Илини дурхъаварибси Расул ﷺ гьануршни, хурег буртIни ва цархIилтира. Нушаб ЧевяхIси Кьудратла ВегIли ахъри габ лерилра адамтас багалати ва пайдалати далдуцуницун дурадуркIахъес, илди кьабулра дараб. Амин!
НАИДА ГЪУРУЕВА
