БукIун ва бецI

Нушала умматла гIямру илцадра къантIти сари, хIятта нушала Идбагли (с.гI.в.) Кьиямала бархIила лишантачила итхIелил бурибсири ва илди лишанти сай мицIирли левалхIейчирад дакIудулхъули дехIдихьибтири.

Балули кьяйда, хIядисуназибра бурибси Кьиямала бархIила ца лишан саби – жаниварти адамтала мезличил гъайдикIни. Иш анцIбукь ислам дин бегI гьалаб кабилзахъуси манзил Мадинала мякьлаб кабикибси саби. Ца ГIяхIбан бикIуси жугьутIли мазамас гIяйдикIахъулри. Хапли дай хIерила манзил, бецI чебухъи, маза бикахъили, бебшиб.

Илис гIелавадикибси букIун гIевваибхIели, бецI адамла мезличил гъайбухъун: «ЧевяхIсилизивад уруххIекIулрив, ГIяхIбан? Иш дила бутIа саби, наб Аллагьли (с.т.) чебаахъибси ва ил кебасес хIезиб ихтияр агара». БукIун тамашавиуб: «Чинаб лебси адамван гъайбикIуси бецI?» Сунела лихIбачи вирххIерули, ил кьадубау уббихьибти адамти лебал умцIерухъун, амма чилра хIергиб. БецI гIуррара гъайбухъун: «Селра тамашала агара, иш дубурла гIелаб, - илини Мадинала шайчибяхI чебаахъиб, - гьатIира тамашала секIал теб – Идбаг (с.гI.в.), суненира гьалар кадикибти ва детаэсти хабурти дуруси, илала гьунчивси гьалжанализи айцIуси сай. БукIун алавчарли хIерикIули хьалли, бецI ахIенси чилра варгес хIейуб. Ил илцадра тамашавиуб ва гьайбарили мазала хIенкьра МадинализивяхI ватихьиб.

Илди бурхIни сарри Идбаг (с.гI.в.) бара Мадинализи гечиубси манзил. Шагьарла дублаб хIенкьра батурли, букIун шагьарлизи ацIили, илабти адамтазибад се-биалра багьес пикрибариб. Илис адамтала кьукья чебаили, илдачи гъамиубмад ца викIар: «Ва, ГIяхIбан, селичила буриба хIези бецIли?» Тамашавиубдешли, букIун левси мерлав кайкиб. ХIерикIалли, ил балхIебалути адамтани алавуцили. Илди асхIябтани илизи Идбагличила (с.гI.в.) хабар буриб, илала у бурибси уилри ил. Идбагли (с.гI.в.) илизи тиладибариб, алавтази бецIличил бетаурси хабар бурахъес. Илини буриб ва итмадан ислам дин кьабулбариб. Ил анцIбукь алавти мермусаличи тIинтIбиуб ва ил аргъибхIели, бахъли ислам дин кьабулбарибсири.

АСХIЯБТАЛА ХАБУРТАЗИБАД