Баркалла биаб чус…
Гьалабван МяхIячкъалализиб М.ХIяжиевла уличилси кьакьализибси мижитлизиб адаб-хIяялашалти багьудлуми дедлугуси ГIяйшат Ахматиловала уличилси школализиб балбуц бетерхур.
Ил багъишлабарилри Украинализиб бетурхуси хасси дявила балбуцлизир бутIакьяндеш дирухIели алхунти бургъантала нешанас. Илизир бутIакьяндеш дариб Сефижат МяхIяммадрасуловани бекIдеш дируси «Нешанала цIакь» бикIуси кьукьялизи кабурхути хьунул адамтани. Балбуцличи гIяхIладли бакIилри Дагъистанна муфтийла насихIятчи Айна ХIямзатова, багьудила отделла ва «Гьидаят» Центрла хIянчизарти, журналистуни.
Балбуц бузахъулри «Гьидаят» Центрла бекI Загьра ИсмягIиловани.
Илаб гъайбухъунтани буриб вегIла ВатIан балтахъули алхунти, бедибси дявила хъялис марли калунти бургъанти гьарли-марти гъабзадешчебти игитуни биъниличила.
Айна ХIямзатова сунела яргализир гъайрулхъули рикIар: «...Адамла гIямрулизир сегъунти-дигара гьалабизуни, имтихIянти ва жура-журала къияндешуни дирути сари. Амма гьарил адамли илди лайикьси тяхIярли ахъили, чекасесра гIягIниси саби. СенахIенну ЧевяхIсини гьар алкIусилис, нешла канилав левалли илис насибси кьисмат лукIуси саби. Нушачиб биалли чебси саби гьарил секIал сабурличил чекайсес ва шукру бирес...»
Балбуцличир илкьяйдали Анисат ГIябдуллатIи-повани жагати нашидуни зайдухъахъун.
Илдигъунти далдуцунала мурад - децIлизибти нешани ва хьунри гIеббуцес, илдас кумек гIеббаахъес. Дагъистанна «Нешанала цIакь» бикIуси организация лебилра Северный Кавказлизиб цайли цаси саби. Нуша дирхулра цархIилти регионтанира илдачибад гIибрат касили, лебилра нешани цабирниличи. Баркалла биаб чус илдигъунти гьарли-марти, чеалкIуси наслулис гIибратли биэсти, ВатIайс марти игитуни абикьуртас.
