Баркалла балахъулра
Гьарил бузери сунеласун кьиматчебси ва пайдаласи саби. Бузерила адамтас багалабирути ва кумекла някъ гьабалтути адамтачи пахру хIебарес хIейрар. Нушани иш белкIлизиб сунечила бурес дигуси, «Ас-салам» газетала марси гьалмагъ ЛухIуев ГIябдулла Нигматуллаевич тяп илдигъунтазивад ца сай.
МяхIячкъалала Ленинна районнизи кабурхуси Хушет поселок акIахъубхIейчибад гIяхIцад замана бикили саби. Илаб бегI гьалаб лебтири дарганти ва ЦIумадала районнизибси Хушет шилизибад гечбиубти кIарахъанти. БусягIятла замана илаб лерил миллатунала бахъал халкь хIербирули саби. Илабти адамтала лугIи 13 азирличиб имцIали саби, 2, 500 хозяйстволичи гъамли. ГIябдулла сунела хъалибаргличил илав хIерируси сай.
Илини сунела бекIлибиубси хIянчила дурабад «Ас-салам» газета тIинтIбарес кумекбируси сай. Илкьяйдали ил 2005 – ибил дусличивад вехIихьили, адамтас гIяхIдеш барес гъираличил, хIялалли узули сай. Газета тIинтIбарес ил сай гIяхIъулали разиикиб ва ил дурабухъунмад бучIантачи баахъес къайгъилизив вирар. Газета някъбази баахъибхIели, адамтала разидешличи сай гьатIира цIакьли разивирар. Хушетла халкь илис баркалла бикIар ва гIяхIси гъайличил гьануршу. Сай къараулчили узуси «Нефтебаза» организациялизибра илини газеталичи хIянчизартала диги алкIахъуси сай, илданира къулбасбиру. Адамла цIакьси иман биалли, сегъуна дигара хIянчи дураберкIес вирар.
Секьяйда бажардииркулри илгъуна къиянси хIянчиличил, ибси суайс илини жаваб гиб: «Марлира, хIянчи гьамадси ахIен, хъали-хъайгIи вашули 350-400 газета адамтачи диахъес. Хаслира дуцIрумла бузразиб, дуббуцарла манзил къиянбулхъули бири, амма Аллагьли ﷻ кумекбирули саби. СенахIенну нуни ил хIянчи уркIи-уркIилабад ЧевяхIси багьандан чекасибси сабхIели. ЦацахIели хьурали 2 километрличиб имцIаси гьуни ихъули вирус. Гьунчиб къаршибикибтани машиналичи катес кьасбирули бирар, баркалла биаб чус. Гьачам гьунчиб дила дабри бурдибсири, хъули чарухъи барсбарес гьарахълири, ва гьунила дубла кайибси ну чеили, цали машина тIашаили мерличи ваахъира. Дуббуцарла базлизиб хъули чарухъес валкьхIеасли, дуббат гьалабирхьули бирар. Илдигъунти дахъал анцIбукьуни дирар, лерилар дуресра хIейрар. Илаб хIербирути адамти гIяхIти, кумекбарес музабулхъути саби. Бахъалгъунти нуни балутира леб. Нуни матъал газета бедили гIергъи, гIурхIели чули къулбасбарибтира чумра анцIбукь диуб».
Хушетлизив хIерируси, шила ХIурматла адамла уличи лайикьикибси Ибрагьим МяхIяммадшариповли бурни хIясибли, ГIябдуллани сунела акьуси манзил газетаби тIинтIдирули кIел-хIябал бархIи харждируси сай. Илала адабчебси пергер хъалибаргра леб. Сунела хьунул Раисатличил барх илини верхIел биштIати абикьур ва гIямрула гьунчи дураиб. Леб илдачибад акIубтира. ГIябдулла сунела хъалибарглисцун ахIенну лебилра жамигIятлисра гIибратчевси сай. Ил жамигIятла гIямрулизир жигарла бутIакьяндеш дирни багьандан ГIиса Идбагла уличилси динна Центрла, «Ас-салам» газетала, Хушетла «Инсан» фондла шайзивад Баркаллала кагъуртачил шабагъатла варибси сай.
Нушанира редакцияла шайзибад илис халаси баркалла балахъулра ва сунела Аллагь ﷻ разивиэси бузерилизир сархибдешуни дулгулра. ХIурматла ГIябдулла, хIед ва хIела хъалибарглис баракат, талихI, гIяхIдеш, арадеш ва ЧевяхIсила разидеш диаб. Амин!
