Бардакош

Бардакошла цархIил ура лебси саби – майоран. Ил бизили тIембикIуси кьар Турциялизиб, Африкализиб ва Ближний Востоклизиб имцIали къаршибиркуси саби.

Ил кьар тIабигIятла цIакьси антисептиклизи халбируси саби. Гьалабла замана адамтани илала кIапIри някъби ицути шиннизи дархиутири. Бардакошлизи эфирла гIявадеш, пинен, борнеол, терпинен, сабинен, камфора, фенол, железо, кальций, калий, цинк, рутин, бета-каротин, С,А витаминти ва дахъал цархIилтира пайдалати секIал кадурхути сари. Ил кьар белхьунти шинни (отварли) чимхъа-умхитIла, жихIла ва гьимила пушягIла излуми сагъдиру. Хьунул адамтала ва чакарла излумачи гIяхIшал асарбиру. УркIила ва тумала бузери ункъбирахъули инфарктуни камдирахъу.

Бардакошла кIапIри изути лигубала биркIантачи чедирхьес вирар. Илди кьарла шиннизиб рахитлизи ва крапивницализи бикибти биштIати ицути саби. Бардакошла гIявадешли спортсментала ва дягIла, букIмала (ревматизм) излумала бегIтас бархли биркIанти дикахъес тухтуртани маслигIятбирули саби. Илала эфирла гIявадешли нервабала ибкьдеш урису ва ряхIятиахъес кумекбиру.

Гьунарагардеш ва нервабала ибкьдеш чебарбику ишгъуна рецептли: 2 мл бардакошла эфирла гIявадешла, 2 мл апельсинна эфирла гIявадешла дархаили, хIяб-хIябал кIантI бекI кьяшмачи, лихIишкантачи ва хъяб някъбачи дакалли.

Беркайзиб пайдалабирни

Ил дунъяличиб дебали машгьурси бизиси специя саби. Илизирад чяй диру, овощунази, цIедешла компотлизи ва диълизи бархиу. Илини чимхъала бузери жигарбарили, гIяваси диъла беркала ашбиахъес кумекбиру.

Кьаркьа битIакI камбирути чяй

Авиценна бардакошлис «чIукьа-виран кьар» викIусири. Илини кьаркьайзирти агъулати секIал дурайу, гушдеш хIебалахъа. Ил багьанданра гIярабла улкназир илди кьар дебали дигахъути сари. Урга-ургади илдигъунти чяй дарили дужалли, халаси къиян кахIебихьили, чIукьавиэс вирар.

1 чяйла кьулса кьарла парличиб гъал минутцадхIи батурли, кьацIли дукес 30 минут гьалаб буженая. КIел жумягIла бухIнаб 4-5 килограммла битIакI гIяшбирар. ГьанбуршехIе, гьарил кьарлаван илалара кьаркьа чехIейсудеш бирни багьандан, ил мяхIкамдешличил пайдалабирес хIяжатси саби.