Хурма
ЦIедешличила баянти: хурмала галга 15 метрла ахъдешличи абиркур ва 500 дус хIербируси саби; илини кьак балсуси саби, сунезиб танин лебниличибли; цIедеш тамай бикьурхIели ил секIал беткайхъур, халаси кьадарлизир йод ва железо лер; С витаминна кьадар хIясибли цIедешуни–ургаб кIиибил мер бурцу; демдрила изайчи цIакьси къаршидеш дакIубиру; инфаркт ва инсультлизибад мяхIкамдеш биру; хIулбала шала имцIабиру; гIела кьакьарила небшла (щитовидная железа) бузери гьунчибиркахъу.
Ил цIедешли адамла жагьдеш ва арадеш мяхIкамдиру. Хурмали бугIярагнилизивад ва грипплизивад мяхIкамвиру, уркIи чIумабиру, уркIила-тумала ва чимхъала бузери гIяхIбулхъахъу, нервабала ибкьдеш чебарку ва кьаркьа бузери жигарчеббиру. Илизир калий, кальций, магний, фосфор, железо, йод витаминти ва цархIилти пайдалати секIулти лер, сарира лебил кьаркьа арадешлис пайдалати. Хурмализирти гими (пищевые волокна) ва пайдалати микроэлементуни гIинцлизиричир кIинали дахъал сари. Илизиб пектин лебни багьандан, чяхIикIнила изала жявли сагъбиру.
ЦIедешлизир дахъал антиоксидантуни лер, илдала кумекличил кьаркьайзирти агъулати секIал дураили, иммунитет ахъбурцу ва А витаминничил барх ракла изайзибадра мяхIкамдеш биру. Хурмализирти глюкоза ва фруктозали уркIила гIемсни чIумадиру, амма чакарла изала лебтас мяхIкамдешличил - бархIилис 1 цIедешцун пайдалабирес чебиркур. Илизиб халаси магнийла кьадар лебниличибли, урцецуназир къаркъуби хIедирахъу. Ил цIедеш берахъубсира бизиси ва пайдаласи саби. Хурмали тяхIувяхъибхIели хъехIра сагъбиру: 1 цIедешла шиннизи 4 халати шинна кьулса дархаили кьак баргагьалли, хъехI бетихъур.
