Лавр

Лавр

Лавровый галга – мурталра шинишли кавлуси галга саби. ЖявхIейчибад ил бизиси тIемличилси галга адамлис халаси пайда бихуси кьяйда балусири. Мисаллис, грекунани абзаназиб чедибикибтас ва бургъанти-игитунас ил бекIличи биршусири.

Ил гьарил журала хурег бирухIелира гьаман бузахъуси саби, хаслира диълизибад бируси. Амма иличибра гьалаб лавровый кIапIи дарманна кьар биъни балусири. Илизир халаси кьадарла витаминти А, В, С, микроэлементуни, эфирла гIявадеш, муравьиная ва цархIилти кислотаби лерти сари. Илала кумекличибли жявли дяхъурби сагъдиру, мисаллис, кьакларти. Иличил сегъуна-дигара хъали-мер умубарес вирар. Кьялши бицIибти кIапIри касили, шанглизи кадихьая ва ружери бакIахъая. Илди шинни 30 минутла бухIнаб хъулибси гьава умубиру бактериябазибад ва вирусуназибад.

Илини илкьяйдали иммунитет ахъбуцес кумекбиру, сунезибси лауриновая кислота лебхIели. ТяхIувяхъили, къянкъуби шинкIадиубси манзил иличил ингаляция бируси саби цаибил бархIицун. КIиибил журала чакарла изала лебтас илини кумекбиру хIилизибси глюкоза ва холестерин камбиру. Илизирад дарибти шин кIел жумягI дужес гIягIниси саби.

Дерубти кIапIрира зярхIтиван пайдалати сари. Илини кьяшмазибси кесмара убису. Лавр шиннизиб руржахъули, илди шин дяргIибхIели, кьяшми кадатая, ва чуйнара илкьяйда тикрарбарая.

Лебил кьаркьала нясдешуназибад умубарес багьандан, бархIехъ 30 кIапIиличи 1 литр руржути шинна кертIая ва савли держая. Илди шин хIябал бутIаличи дутIили, гьар бархIи ца бутIа хIясибли дужес чебиркур, хуреглис гIергъи. Илгъуна умудеш бирухIели, кункси беркала букеная. Ил барес асухIебирар виштIасилис баибтас, чимхъа-умхитIла язва лебтас ва гIела жихI барцбикибтас.

Лавр илкьяйдали лига-кьякья сагъдарес, хIила гъяж гIяшбарес ва дахъал цархIилтира излумачи къаршили бузуси саби. Илини шайтIайзибадра мяхIкамдеш биру, илала тIем лебси мерла шайтIан хIебашу. БиштIати мяхIкамбарес багьандан 1-3 лавровый кIапIи виштIасила бурушла мякьла кадихьая.

ХIядурбарибси Н.Исмягiилова