БАГЬАХЪНИ
Мижит абхьиб
Сунечи бахъхIи хIерси мижит абхьиб ишди бурхIназиб Дахадаевла районна ГIяштила шилизиб.
Гьалар колхозла гараж ва цархIилти хъулри лерси мерличиб саби ил тIашбатурси. Ил мер Кьункьила, ГIяштила, Дирбагъла ва ХудуцIла шимала ургабси саби. ХIядурбарили саби адам вебкIибхIели шантас пайдалабирес хасбарибси мерра (тягIзиятлис). Мижит ибхьниличил бархбасахъи, мавлид дураберкIиб районнизибадли ва республикализибадли бакIибти гIяхIлала бутIакьяндешличил.
Балбуцличиб гъайбухъун районна имамтала советла председатель ГIяхIмадхIяжи ХIямзатов, районна багьудила отделла руководитель МяхIяммад ХIямзатов, республикала цацадехIти районтала ва шагьуртала имамти. ГIяштантачи мубаракла дугьбачил дугьаизур мижит бирнилис бекIдеш дарибси бекIливиубси меценат ХIясан МяхIяммадрасулов. Илини бурни хIясибли, мижит тIашбалтнила манзил хIябал дус бухъянбитIунсири. Ил гIяхIбаркьлизир бутIакьяндеш дариб шила жамигIятли ва ил шила дураб хIербирути адамтани.
«Шанти цалабикили, мижит тIашбатес пикрибарибсири. Илкьяйдали хIябал дусла бухIнаб гIяхIцад къиян кабихьили, ил тIашбатурли саби. Мижит тIашбалтнилизир бутIакьяндеш дарибтас баркалла багьахъес дигулра. Хаслира халаси баркалла биаб «Магнит» ОООла меценатунас, руководитель Муса Любовлис, шила меценат МуртазагIяли Цаниевлис, шила жагьилтас ва илдас бекIдеш дарибси Карим Балгъуевлис», - буриб ХIясан МяхIяммадрасуловли. Балбуц ахирличи биркухIели, хIерила дехIибала дариб.
Багьуди дигутас – унза гьаргли сари
БелчIудила дус таманбиубмад, дагла школала бучIанти пикрибикIули саби чинаб белчIуди даимбирусил. Гьарил дурхIякIун виштIахIейчивад санигIят чеббикIес гьуцIхIейкIар. ИмцIатигъунти выпускникуни къалабали халабаэс ва саби бегIти пикруми гIямрулизир детерхахъес къалабали бирар. Илдала имкантира имцIадикIули сари.
ХIера, цархIилтачил барх, МяхIячкъалализибси Гуманитарно-педагогический колледжлира жагьилтас унза абхьили саби. Сен нушала белчIудила заведениеличи пикри бяхIчиаэс гIягIниси? Ил абхьили гьанналис 15 дус биули саби, ва ил манзиллизиб преподавательтала я бучIантала ургаб низам-кьяйда дуънила анцIбукь гьачамалра биубси ахIен. ГПКла бекIлибиубси шартI саби – бучIантас чедетаахъибти багьудлуми дедлугни ва илдачил барх бяркъра. Колледжлизиб багьудлуми дедлугнила даража ахъси саби ва дахъал дусмазир илдигъунти тяхIяр-кьяйда кавлули сари. Селичи бурсибирули нушала колледжлизиб ва таманбарибхIели сегъунти санигIятуни касес вируси? Марлира, 15-17 дус биубти гьарилти-декIар жагьилтани ЕГЭличиб кайсуси психологиялашалси гуж чекасес хIебирар. Нушала колледжлизи биалли, хIуша сегъуналра имтихIян ва тестани хIедедили, кадерхес дирудая. Ила керхес гIягIниси чIянкIли, урга даражала школализиб лугуси аттестатцун саби. Ишдусла абитуриентунала гьалар дахъал имканти гьаргдирули сари.
Пергер специалистуни бетаахъес багьандан, колледжла хIянчизартани чули бирусигъуна кумек гIеббиахъули саби. Илаб ишбархIила тIалабуначи мешути санигIятуни касес вирар. 9-11 ибил класс таманбарибтани касес бирар санигIятуни: «Экономика и бухгалтерский учет», «Информационные системы и программирование», «Социальная работа», «Дошкольное образование», «Преподавание в начальных классах», «Дизайн». СанигIят хIясибти багьудлумачил дарх адаб-хIяяла ва рухIлашалти дисциплинабира дяркъес вирар, ахъси даражала специалистунани далахъути. Ил саби багьудлумачил барх адабдешла бяркъ кайснилизи илдани кабирхьуси мекелли халаси пай. Ил саби студентуни ахъси даражала санигIятличил гIеббуцнила дурабад, адуцалачебти, жавабкардешчебти, вай-гIях балути адамтили бяркънила мурад. Мар саби, нушала колледжлизиб бучIутала даража ва жавабкардеш ахъти диъни. 2019 ибил дусла хIясилти хIясибли, ГПК Россияла бегIлара гIяхIти, хасти белчIудила заведениебала 100-лизи каберхурси саби. Колледжлизиб гьабкьяси лаборатория леб, ишбархIила манзилла тIалабуначи далдикахъили техникалашал жагали далкьаахъурти кабинетунира. Илдачи че жавабкардешличил, чебетаибдешличил ва хIянчиличи дигиличил бузути педагогунала къайгънани сабухъуни гиб. Лебтанилра пахрубарести ва гIибрат касести студентуни леб нушала.
Мисаллис, ищдусла март базличиб регионнизиб бетерхурси Россияла «Вордскилс» чемпионатлизиб социальный бяхIчибизла тема хIясибли, колледжла студенткали чедибдеш сархиб. Илини федеральный чемпионатлизирра бутIакьяндеш дариб. Илкьяйдали нушала колледжли «Экономика и бухгалтерский учет» бикIуси имтихIян чебиахънила балбуц дураберкIиб ва бекIливиубси эксперт хIядурвариб. Гьайгьайрагу, жагьилти студентуначил белчIудилизибад акьуси манзил дурадуркIути сари жура-журала далдуцуни, конкурсуни, спартакиадаби, квестуни. Нушала бучIантани мурталра бутIакьяндеш дирути саби гIяхIбаркьла далдуцуназиб, Муфтиятла шайзирад ва шагьарла жагьилтала комитетла шайзирадра дурадуркIути. Студентунала гIямру илцадра жигарчерли детурхути сари, илдас анцIбукьес замана агара. Дебали мягIничебсилизи халбирулра нушани бедибси санигIят ишбархIила заманаличи балбикибси биъни багьандан, хIянчи бедлугутани нушала колледжла выпускникуни халаси иштяхIличил хIянчиличи бурцули саби.
Ил багьанданра бирхаудиличил бурес вирар нушала колледжлизиб касибси багьуди – санигIятлашал даража ахъбикIахъули гьалавяхI вашнила гIяхIси бехIбихьуд биъниличила. Нушала колледжлизив багьудиличи вегIиубси жагьил адам гьеч пашманхIейрар. ЧебяхIси даражала багьуди касес дигусилисра нушачир шуртIри акIахъубли сари. Дагъистанна гуманитарный институтличил бигьунси вягIда хIясибли, нушала выпускниклис имканбикIули саби, кункдешличил (льгота) санигIятлашалси чебяхIси даражала багьуди касес. ХIурматла школала выпускникуни, санигIят декIарбирнилизир хIушаб гьарбизуни дулгулра. Нуша ни биалли, хIуша бегIлара гIяхIти къиликъуначилти ва ахъси даражала специалистуни детаахъес дирусигъуна кумек гIеббиахъехI
ЖЕННЕТ ТЕМУРКАЕВА,
ГПК-ЛА ДИРЕКТОР
