Сархибдешуницун диаб…

Дагъистан мурталра сунела спортсментачибли Россиялизибцун ахIенну, лебил дунъяличибра машгьурси саби. ГIергъити дусмазиб жагьти спортсменти-ургаб «грепплинг» бикIуси мушулвашнила тяхIяр дебали машгьурбиубли саби.

Ил лерил спортла: самбо, дзюдо, джиу-джитсу, азадли мушулвашни ва бирхIнила цархIилти тяхIурти цаладяхъибси жура саби. Гьалаб тIашли мушулбашули, гIур абз чIябарличиб даимбирар, амма илаб някъби-кьяшмани бирхъути ахIен. Илар очкоби лугути сари гIяндуршути яра изарахъути тяхIурти далдуцалли. Къадагълумира камти сари: вяхIлизи гачиркес, гъез, кьяшмала ва някъбала тIулби дурцес асубируси ахIен. Гьалабван, СанктПетербурглизиб бетерхурси илгъуна грепплингла халкьани-ургабси абзличиб ШяхIбан МяхIяммадовли цаибил мер сархиб.

Ил акIубси сай Ахъушала районна ТIантIала шилизив. Шила школа таманаили гIергъи, Дагъистанна Исламский Университетлизи керхур. Илра сархибдешуначил таманбарили ШяхIбан МяхIяммадов бузерилизи ахъиб. Илкьяйдали ил узули калун Дахадаевла районнизивра сай акIубси ТIантIала шилизивра. 2019 ибил дусличивад вехIихьили, бусягIятла манзилра ШяхIбан МяхIяммадов Дагъистанна Муфтиятла Ахъушала районнизибси багьудила отделлис бекIдешдирули узули сай. Бузери илис диргалабулхъули ахIен, ил спортличилра цIацIали вархваси сай. Ил чумал дус МяхIячкъалализибси «UF Universal Faiters» заллизив бекIливиубси тренер ГIябдуряхIман Биларовличив хIядурикIуси сай. Спортлизир халати сархибдешуни диахъес руркъянтанира халаси къайгъи дакIубирули бирар. Илдани руркъули калунти бахъал спортсментани Дагъистан машгьурбирули саби. ШяхIбан МяхIяммадовла къаршикарти 77 килограммличи бикайчи битIакIла Роман Власов ва Игорь Вилде сабри.

Илдачил детерхурти кIелра ибкьти абзлизив илини халаси гъира дакIубариб ва чедиикили, цаибил мерличи дуравхъун. «ЦIакьти мушлукьяби бахъал сабри. Лебилра чедибикес гьуцIбикIулри. Илаб чедибдеш сархибти спортсменти апрельла 6-8-личи бикайчи Дубайлизиб бетурхуси дунъяла чемпионатличиб мушулбирхIути саби», – буриб илини. Гьайгьайрагу, чеалкIути наслуби руркънила шайчиб илдигъунти абзани халаси кьадрила баркьуди саби. БегIлара цIакьти мушлукьябала къяяни чедирцIахъути нушала цаванзалантачи нушани пахрубирулра. Дунъяла чемпионна уличи лайикьбикес багьандан абзличи хIядурти нушала мушлукьябас сархибдешуни дулгулра. Цаибил мер сархибси ШяхIбан уркIи-уркIилавад мубаракирули, гIурра дахъал чедибдешуни диубли дигулра.

НАИДА ГЪУРУЕВА