Йәне Йәннәттә булһын!
Ҡарлы-буранлы февралдең тәүге көндәрендә беҙ, ғәҙәттә, Башҡортостан Республикаһының тәүге Президенты Мортаза Ғөбәйҙулла улын тыуған көнө менән тәбрикләй торғайныҡ. Бы-йыл, ҡыҙғанысҡа ҡаршы, ғинуар айында ауыр юғалтыу кисереп, хөрмәтле Ил Башлығын һуңғы юлға оҙаттыҡ.
Алдынғы ҡарашлы абруйлы етәксе, оло йөрәкле шәхес, Тыуған илебеҙҙең ысын патриоты ине Мортаза Ғөбәйҙулла улы. Ил етәксеһенең күрһәтмәһе буйынса төҙөлгән мәктәптәр, дауаханалар, мәҙәниәт усаҡтары һ.б. халыҡҡа күпме хеҙмәт итәсәк әле!
Уның ҡатнашлығында күпме Аллаһ йорттары ҡалҡып сыҡты, дини китаптар сығарылды, нисәмә күпер төҙөлдө, халыҡты һыу менән тәьмин итеүсе ҡоҙоҡтар ҡаҙылды, бихисап ағас ултыртылды! Пәйғәмбәребеҙ Мөхәммәд ﷺ хәҙисенә ярашлы былары инде саҙаҡа-джәриә булып һанала, тимәк, хөрмәтле етәксебеҙ баҡыйлыҡҡа күскәс тә, уның рухына, Ин шәә Аллаһ, оҙон-оҙаҡ әжер сауаптары яуып торасаҡ.
Йөрәгендә тәкәбберлектең әҫәре лә булмаған Мортаза Ғөбәйҙулла улы халыҡ менән ихлас аралашты, халыҡты яратты. Республикабыҙҙың ауыл-ҡалаларын ҡат-ҡат иңләп, һәр көнүҙәк мәсьәләне үҙ ваҡытында хәл итә килде.
“Урал” фондын етәкләгән осорҙа ла республикабыҙ, халҡыбыҙ өсөн бик күп файҙалы эштәр башҡарҙы. Изге эштәрен күпертеп, халыҡ хөкөмөнә сығарманы, киреһенсә, Аллаһ ризалығы өсөн хаж ғәмәлен үтәп, иманын нығытты.
Һәм тағы. Мортаза Рәхимов, моғайын, Аллаһу Тәғәләнең һөйөклө бәндәһе булғандыр, сөнки Аллаһу Тәғәләнең һөйөклө бәндәһе булыуҙың бер билдәһе – халыҡ һөйөүенә лайыҡ булыу. Мортаза Ғөбәйҙулла улын Башҡортостаныбыҙҙың бар халҡы яратты. Ниндәй милләт вәкиле булыуына ҡарамаҫтан, үҙ күреп: “Беҙҙең Президентыбыҙ!” – тип өндәште.
Йә Рабби! Халҡыбыҙҙың аҫыл улы Мортаза Ғөбәйҙулла улына әхирәттә иманын юлдаш ит! Йәне Йәннәт түрендә булһын!
