Экземаны дауалау
Мәғлүмәт биреүсе: Әбйәлил районынан Мәрғүбә әбей. Уның атаһы Троицк ҡалаһында Зәйнулла ишан мәҙрәсәһендә уҡып, дауалау ысулдарын өйрәнгән. Ҡыҙына ла өйрәтеп ҡалдырған.
Был дауалау сеансын атҡарыр алдынан, башта ниәт әйтеп, ике рәкәғәт хәжәт намаҙын уҡырға кәрәк. Шунан аҙаҡ, уртаса ҙурлыҡтағы ҡулъяулыҡҡа кәзә йәки һарыҡ малының эретелгән майын бал ҡалағы ярҙамында йәйеп һалаһың.Тилебәрән орлоғон май өҫтөнә мул ғына итеп һибергә. Шуны рулет һымаҡ итеп урағас, айырым тәрилкәгә һалырға.Еҫе ҡырҡыу, үҙе ағыулы үлән булғанлыҡтан, соланға, йәки, тышҡа сығырға кәрәк буласаҡ. “Фәтихә”,”Аятел Көрси”,”Фәләҡ”,”Нәс” сүрәләрен уҡығас, ниәтеңде әйтеп, тыныңды рулет өҫтөнә өрәһең. Шунан аҙаҡ, шырпыны тоҡандырып, рулет осон яндыраһың. Аҡ төтөн сыға башлағас, ауыртҡан ағзаңды шул төтөнгә ҡуйырға. Ун биш минут самаһы тотҡас, йәғни, дауаланыу сеансы тамамланғас, һамаҡлау йолаһын үтәйһең:
Ерҙән килһәң, ергә кит,
Күктән килһәң, күккә ос,
Ел менән осоп килһәң, елгә ос…
Тәрилкә өҫтөн тимер һымаҡ нәмә менән ҡапларға.
Эске ағзалар ауыртҡанда, биш литрлык биҙрә өҫтөнә таҡта һалып, уға бәҙрәфтәге һымаҡ тишек уялар. Шуның тапҡырына әлеге тилебәрән үләне яндырылған һауытты ҡуялар. Төтөн менән ыҫлау ауыртҡан ереңде дауаларға ярҙам итә.
