Зекер мәжлестәре
Зекер мәжлестәре
Риүәйәт ителгәнсә, Рәсүлүллаһ ғәләйһис-сәләм: «Зекер мәжлестәренең урындары булыр, бергә ултырыусылары фәрештәләр булыр, әгәр Аллаһты зекер итеү өсөн ултырһалар, уларҙы фәрештәләр аяҡ табандарынан күкрәктәренә тиклем шатланып ҡаршыларҙар. Фәрештәләрҙең ҡулдарында көмөш ҡағыҙҙар, алтын ҡәләмдәр булыр, Пәйғәмбәр ғәләйһис-сәләмгә әйтелгән салауаттарҙы яҙып барырҙар һәм: «Салауаттарҙы күберәк әйтегеҙ – Аллаһ ﷻ һеҙгә мәрхәмәт күрһәтер», – тип әйтерҙәр».
«Кесаҙна етеү менән, Аллаһ ﷻ ергә алтын ҡәләмдәр үә көмөш таҡталар менән фәрештәләр күндерер. Улар шул таҡтаға кесаҙна үә йома көндәрен күберәк салауат әйтеүселәрҙең исемдәрен яҙырҙар». (Ибне Ғасәкир).
Әгәр кешеләр зекер итеүгә керешһәләр, доғаларына яуап булып, уларға Йәннәт ишектәре асылыр. Улар башҡа нәмәләр тураһында һөйләшә башлағансы, Аллаһу Тәғәлә Шәфәғәтле йөҙө менән ҡарар. Шулай уҡ, Ҡөрьән мәжлесенә кешеләр йыйылһа, үә ниәттәре фәҡәт шул булһа, был да зекер мәжлесе булыр. Шундай уҡ дәрәжәләргә ирешеү булыр, ин шәә Аллаһ.
