««Әс-Сәләм»де йыйып барам!..»

Һүрәттәге мөләйем йөҙлө инәй Баймаҡ районы Беренсе Этҡол ауылында йәшәүсе 88 йәшлек Хәлимә Ғәзизова.

Ауылға «Әс-Сәләм» гәзите вәкилдәре килгәнен ишеткәс, таяҡҡа таянып йөрөүенә ҡарамаҫтан, мәҙәниәт йортоноң икенсе ҡатына уҡ күтәрелеп, осрашыуға килеп еткән. Улай ғына ла түгел, сәй табынына ҙур иттереп бәлештәр бешереп алып алып килгән.

«Әс-Сәләм» гәзитен дүртенсе йыл рәттән яҙҙырам, һәр һанын көтөп алам. Килгәс, уҡыйым да подшивка эшләйем, ҡәҙерләп һаҡлайым», – ти ауылдың ағинәйе.

«Хәлимә инәйҙең хәләл ефете Йомағужа хәҙрәт быйыл туҡһанын тултырҙы. Мәсеттә имам хатип булды. Аят мәжлестәрен бик көслө үткәрә ине. «Мин һеҙҙең өсөн яуап биреп ултырмайым», – тип, иң тәүҙә мәжлес алдынан ҡатын-ҡыҙҙарға дөрөҫ итеп кейенергә ҡуша торғайны. Шуға ла Беренсе Этҡолдағы ҡатын-ҡыҙҙар бөгөн дә аятҡа, ғәүрәттәрен ҡаплап, дөрөҫ итеп, матур итеп кейенеп йөрөй.

Хәлимә абыстай ҙа бик уҡымышлы. Бик күп сүрәләрҙе, шул иҫәптән «Йәсин», «Тәбәрәк» сүрәләрен дә яттан уҡый. Күп йылдар бергә-бергә дин тотҡан, халыҡты иманға өндәгән хөрмәтле кешеләр улар», – ти Ғәзизовтарҙың ауылдаштары.