“Иманлы булһын уйҙарың...”
“Иманлы булһын уйҙарың...”
Доға
Тау артында, һоро яландарҙа,
Ауыл һуҡмаҡтарын өйрөлткән,
Урмандарға бағам, болондарға –
Ҡойма буйын баҫҡан кесерткән.
Иртә менән манаранан өҫтә
Күкшелләнә күктең төҫтәре.
Күлдән иҫкән наҙлы елдәр иркә
Һыйпап үтә үлән өҫтәрен.
Яратам мин иртә яҙҙың йырын,
Бормаланып аҡҡан йылғаны.
Яҡын миңә торналарҙың моңо,
Тау битендә үҫкән ҡылғаны.
Һәр кис һайын күк томанда
Элһә ҡояш алһыу дуғаһын,
Манараға ҡарап күңелкәйем
Эстән генә уҡый доғаһын
Әрүахтарға доға бағышлай ул:
Ишетһәңсе мине, Аллаһым!
Был тормошта беләр-белмәҫ ҡылған
Ярлыҡаһаң ине гонаһым!
Яугир – мулла
Бөтә нәмә аҫты-өҫкә килһә,
Буталғанда фани донъялар,
Динен ҡурсып, яу юлына баҫа
Ҡуш йөрәкле ҡыйыу муллалар.
Иртә таңда ҡояш офоғона
Элеп ҡуйһа нурлы дуғаһын,
Яугирҙәргә именлекте теләп,
Уҡый мулла изге доғаһын!
Үткер текләп Ҡөрьән биттәренә
Һағыш менән тулған күҙҙәрен,
Әкрен генә көйләй үҙ алдына
Моңға тулған доға һүҙҙәрен!
Яу ҡырына бара дин әһеле
Ҡурсып, яҡлап, халҡы улдарын,
Улар менән бер сафтарҙа үтә
Дәһшәт тулы яуҙың юлдарын!
Ҡорал алмаҫ һис тә ҡулдарына,
Ҡөрьән һүҙе булыр ҡоралы!
Үлгәндәргә йыназаһын уҡыр,
Доға уҡыр булһа яралы!
Өмөтһөҙгә ул ышаныс бирер
Дауалар ҙа күңел яраһын,
Муллалар бит – күпер: тоташтырған
Аллаһ менән әҙәм араһын!
Борондан бит һаман шулай килә –
Ҡайҙа ғәскәр – шунда муллаһы.
Мосолмандың йәнен ҡурсаласы,
Яҡлаусыһы булсы, Аллаһым!
Муллалар бит диндең яугирҙәре –
Ауырлыҡты бергә кисәләр
Ул барҙа күңел тынысыраҡ –
Шуны белә ата -әсәләр!
Иман
Иманлы булһын ҡылғаның,
Иманлы булһын эшең!
Һин эшләгән, ҡылғаныңдан
Риза булһын кешең!
Иманлы булһын уйҙарың,
Бары изге теләктән.
Яҡшылығың кире ҡайтыр,
Тип әйтәләр электән!
Иманлы булһын тормошоң,
Иман алға ҡуйылһын!
Халҡыңдың алтын һүҙҙәре
Күңелеңә уйылһын.
Ихтирам ит өлкәндәрҙе,
Ҡолаҡ һал һүҙҙәренә!
Уларҙың биргән аҡылын
Ҡуй күңел түрҙәреңә!
Иманлы эш күтәрер ул
Тормоштоң үрҙәренә:
Мәңгелектә һиңә яҙыр
Ожмахтың түрҙәре лә!
Иман менән мохтаждарға
Ярҙам ҡулдарыңды һуҙ
Был тормошта тура атлап,
Яҡты йөҙөң менән уҙ!
Айырырһың көндәлектә
Яҡшы менән яманды,
Яҙыҡ эштән тыйылырһың
Алға ҡуйһаң иманды!
Изгенән булһын маҡсаттар,
Хәйерле булһын юлың!
Алда күктәге йондоҙҙай
Маяҡ булһын иманың!
Сынтимер Юлуев,
Баймаҡ районы
