Сура аль-А`раф (Манийвилер)

Мергьяматлу (и дуьньяда виридаз), Регьимлу (эхиратда анжах иман гъанвайбуруз) Аллагьдин тIварцIелди.

1. Алиф. Лям. Мим. Сад.
2. (Им - ) Ктаб (Къуръан) я, ваз (Мугьаммад) ракъурнавай. Къуй ам себеб яз ви хур чуькьуьн тавурай (гьакъикъатдихъ эвер гудайла арадал атун мумкин тир четинвилер себеб яз). (Ам ваз ганва) Вуна адалди (вири инсанар) виликамаз хабардар ийидайвал ва адакай иман гъанвайбур патал насигьат жедайвал.
3. Куь Раббидин патай квез ракъурнавайдаз (Къуръандиз ва Суннадиз) табий хьухь ва архавалзавай масабуруз табий жемир, Адалай гъейри (имансузвилихъ ва ягъалмишвилихъ эвер гузвай инсанрикай ва чинеррикай тир шейтIанриз). Куьне кьериз-кьериз рикIел хкизва (а кар; гьавиляй куьн Аллагьдин диндихъай элкъвена, масабурун гуьгъуьна аваз физва)!
4. Гьикьван хуьрер Чна терг авуна! (Чи жаза) Абурал йифиз къезвай (месела, ЛутIан халкьдал хьиз) ва я юкъуз ял ядай вахтунда (месела, Шуайбан халкьдал хьиз).
5. Абурал жаза агакьайла, абуру анжах тIалабзавай ихьтин гафаралди: «Гьакъикъатда, чун адалатсузбур (бутпересар) тир!»
6. Чна гьикI хьайитIани (инсанривай) хабар кьада, чпин патав (пайгъамбарар) атай (абур пайгъамбарриз табий хьанани, тахьайтIа хьаначни) ва пайгъамбарривай чпивай гьикI хьайитIани хабар кьада (абур чпин халкьари гьикI кьабулнатIа).
7. Чна абуруз (пайгъамбарриз ва абурун халкьариз) гьикI хьайитIани ахъайда (абуру авур вири крарикай, чинебанбурукай ва гьакI ачухбурукайни) (тамам) чирвилел бинеламиш хьана. Чун са чIавузни авачиз хьайиди туш (Аллагьдиз гьар са легьзеда абурукай лап тамамдиз вири чизвай).
8. А (Дувандин) юкъуз терезар (чпел лукIарин крар алцумдай) гьакъикъат жеда. А ксар, нин Терезрин хел залан хьайитIа, - агалкьун хьайибур я.
9. Амма а ксари, нин Терезрин хел кьезил хьайитIа (вучиз лагьайтIа абурун хъсан крар кьабулдач, абуруз иман тахьуниз килигна), чпи-чпиз зарар гуда (чеб гьамишалугъ сувабдикай магьрум авуна), абур Чи лишанрив адалатсузвилелди эгечIна хьи (ва абур кьабулзавачир).
10. Чна квез чилел мумкинвилер гана ва куьн патал яшамиш жедай шейэр яратмишна (тIуьн, хъун ва икI мад). (Амма гьакьван няметризни килиг тавуна, Чна квез гайи) Куь шукур гьикьван тIимил я!
11. Чна куьн яратмишна (сифте куь буба Адам халкьна кIалубсуз чепедикай), ахпа квез къамат гана. Ахпа Чна малаикриз лагьана: «Адамаз сажда ая (адаз гьуьрмет авуна)!» Абуру сажда авуна, иблисдилай гъейри, ада сажда авунач.
12. (Аллагь Таалади) Хабар кьуна: «Ваз куь манийвал авуна сажда авуниз, За ваз эмир авурла?» Ада (иблисди) жаваб гана: «Зун адалай (Адамалай) артух я. Вуна зун цIукай яратмишна, ам чепедикай яратмишна» (Тафсирра кхьизва хьи, иблисди дуьз кьетIнач, цIай накьвадилай вине авайдай гьисабна, чеб (чепедин палчух) – лайихвилиз артух я хьи).
13. (Аллагьди) Лагьана: «ЭвичI инай (Женнетдай)! Вуна ина ви такабурвал къалурун герек туш. ЭкъечI инай (Женнетдай ва цаварилай)! Гьакъикъатда, вун – алчах хьанвайбурукай я».
14. (Иблисди) Лагьана: «Заз муьгьлет це (къаргъудай кьвед лагьай сеферда гьарагъайдалай кьулухъ) абурал (инсанрал) чан хкидай йикъалди».
15. (Аллагьди) Лагьана: «Гьакъикъатда, вун – муьгьлет ганвайбурукай сад я (ва вун Дувандин йикъал кьван яшамиш жеда)».
16. (Ахпа иблисди, вичин ягъалмишвилин тахсир Аллагьдал вегьена) Лагьана: «Вуна зун рекьелай алудайвиляй зун гьикI хьайитIани Ви дуьз рекьел ацукьда (ам жувалди атIана ва инсанриз гьакъикъи диндиз табий жез манийвал ийида).
17. Ахпа зун абурун патав къведа (вири кьуд патахъайни) виликай ва кьулухъай, эрчIи патахъай ва чапла патахъай, ва Ваз аквада хьи, абурун чIехи пай чпиз авур хъсанвал чир тежербур тирди».
18. (И гафариз жаваб яз, Аллагьди) Лагьана: «ЭкъечI инай алчахди ва кьабул тийидайди яз! Вуж абурукай (Адаман несилрикай) ви гуьгъуьна аваз фейитIа, абуралди За Жегьеннем ацIурда – квелди виридалди.
19. Я Адам! Ви пабни галаз Женнетда яшамиш хьухь. Неъ (ана кьведани), гьина кIандатIани (ва вуч кIандатIани), амма и тарциз мукьва жемир (адан емишар дадмишдайвал), тахьайтIа квекай адалатсузбур жеда (сифте нубатда куь патахъай)».
20. ШейтIанди абуруз футфа гуз хьана (гунагь ийидайвал), абурухъай чуьнуьхнавай абурун кьецIилвал дуьздал акъуддайвал. Ада абуруз лагьана: «Куь Раббиди квез и тар къадагъа авунвайди я квекай малаикар тежедайвал ва я гьамишалугъ яшамиш тежедайвал».
21. (Абур адахъ инанмиш хьун патал) Ада абуруз кьин кьуна (икI лагьана): «Гьакъикъатда, за анжах квез хийирлу насигьат гузва (гьавиляй квез и сир ачухзава)».
22. Ада абур авудна (абуруз авай чIехи дережадилай гунагь ийизвайбурун дережадал кьван) тапарралди (Аллагьдин тIварцIелди тапан кьин кьуна ва абуруз таб гьакъикъатдай къалурна). Абуру (са тIимил) кьведани дадмишайла (емишар) а тарцелай, абурун кьецIилвал дуьздал хьана (абуруз чпин кьецIилвал акуна) ва абуру чеб Женнетдин пешералди кIевириз хьана. Абурун Раббиди абуруз лагьана (туьгьметдалди ва хабардар авуналди): «За квез а тар къадагъа авуначирни кьван ва шейтIан куь ачух душман я лагьаначирни?»
23. Абуру кьведани лагьана (чпин тахсир хиве кьуна): «Я чи Рабби! Чна чаз зарар гана (Ви чIалаз яб тагана) ва эгер Вуна чалай гъил къачун тавуртIа ва регьим тавуртIа, чаз гьикI хьайитIани зарар жеда».
24. (Аллагьди) Лагьана: «ЭвичI (Женнетдай) сад-садаз душманар яз (иблис квез душман жеда, куьн – гьадаз)! Чил квез яшамиш жедай чка жеда (рекьидалди) ва ишлемишдай затI са кьадар вахтуналди».
25. (Аллагьди гьакIни) Лагьана: «Адал (чилел) куьн яшамиш жеда, адал рекьида (ва ада кучукни ийида) ва адай акъудни хъийида (чан хкайла)».
26. Эй Адаман несилар! Чна квез парталар ракъурна куь кьецIилвал кIевирун патал ва гуьрчегарун патал. Амма Аллагьдихъай кичIе хьунин партал (иман, Аллагьдихъай кичIе хьун, лап хъсан ахлакь) – виридалайни хъсанди я. Им (парталар ракъурун) Аллагьдин лишанрикай сад я, абуру (инсанри) насигьат кьабулдайвал.
27. Эй Адаман несилар! ШейтIандив куьн рекьяй акъудиз тамир (квев куьн Женнетдиз фин патал манийвал жедай гунагьар ийиз туналди), гьикI ада куь ата-бубаяр Женнетдай акъуднатIа ва абурал алай парталар хутIуннатIа, абуруз чпин кьецIилвал къалурдайвал. Гьакъикъатда, адаз (шейтIандиз) ва адан мукьвабуруз квез абур таквазвай чкадай куьн аквазва (гьавиляй куьне абурукай мукъаятвал авун лазим я). Гьакъикъатда, Чна шейтIанрикай имансузрин дустар авунва (Чна абур санал сад-садал дуьшуьш авуна, абурун арада садвал туна).
28. Пис крар ийидайла абуру (бутпересри – шейтIанрин дустари) лугьузва (чеб гьахъарун патал): «Чаз а кардал чи ата-бубаяр жагъана (ва абурун гуьгъуьна аваз фена). (ГьакI хьайила) Аллагьди чаз а кар эмир авуна». Лагь (абуруз, я Мугьаммад): «Аллагьди (хъсан крар авун эмирзавай ва лап хъсан ахлакьдихъ гьевеслу ийизвай) явавал авун эмирзавач. Яраб куьне квез чин тийизвай краралди Аллагьдал буьгьтенар вегьеда жал?»
29. Лагь (абуруз, я Мугьаммад): «Зи Раббиди адалатлу хьун эмирзава». Куьне ибадат ийизвай вири чкайра чинар Адахъ элкъуьра ва ибадат анжах Адаз ая – рикIин сидкьидай. ГьикI Ада куьн сифтедай халкьнатIа, гьакI куьн Адан патав хъфинни ийида (Ада квел чан хкайла)».
30. Абурукай (инсанрикай) са пай Ада (Аллагь Таалади) дуьз рекьел эцигна (абуруз иман гана), муькуьбуруз чпи къазанмишай ягъалмишвал кьисмет авуна. Абуру чпиз дустар яз Аллагьдин паталай шейтIанар хкяна ва чеб гьакъикъатдал ала лугьуз фикирзава.
31. Эй Адаман несилар! Куьн безетмишара мискIиндиз (фин) патал (ва гьар са капI авун патал). Неъ (гьалал тIуьн) ва хъухъ, амма вара-зара ийимир, гьакъикъатда, Адаз (куь Раббидиз) вара-зара ийидайбур кIанзавайди туш.
32. Хабар яхъ (а бутпересривай, я Мугьаммад): «Ни къадагъа авуна Аллагьди Вичин лукIариз ганвай безетмишдай затIар ва рузидикай хъсанди?» Жаваб це: «Дуьньядин уьмуьрда абур иман гъанвайбуруз тайин авунва (абур имансузрини ишлемишзаватIани), Дувандин юкъуз лагьайтIа, абур анжах абуруз жеда (имансузар вири няметрикай магьрум жеда)». ГьакI Чна чизвай инсанар (Чи) аятрин гъавурда твазва (анжах гьабур я хьи гъавурда туникай хийир къачуз алакьзавайди).
33. Лагь (я Мугьаммад): «Зи Раббиди анжах пис крар авун къадагъа авунва (чIехи гунагьар, зина ва файдачивал хьтин) – ачухбурни, чинебанбурни. Ада (маса) гунагьарни къадагъа авуна, ихтияр авачиз зулум авун (угъривал, таланчивал ва икI мад), (са кас) Аллагьдиз барабар авун – Ада а кардиз са делилни ракъурнач – гьакIни Аллагьдикай квез чин тийизвай затIар лугьун (Адаз лайих тушир атрибутар лугьун ва Адан тIварцIихъай жуваз хъсан акур къарарар акъудун, са затIунин патахъай, ам гьалал яни ва я гьарам яни).
34. Гьар са умматдиз (пайгъамбарар кьабул тавур) – вичин (тайин авунвай) вахт ава (жаза гунин). (Абуруз ахъайнавай вахт куьтягь хьайила) Абурун вахт алукьайла, абуру гьич са легьзединни ам кьулухъ ядач ва мукьва ийидач.

КьатI ама.

«Калям шариф» (Къуръандин манайрин таржума) ктабдай.