Къуръандин «аль-Ан`ам» сура
эвел алатай нумрайра ава
40. Лагь (я Мугьаммад, бутпересриз): «Куьне гьикI фикирзава, квел Аллагьдин жаза агакьайла (дуьньядин уьмуьрда), я тахьайтIа Сят алукьайла (дуьньядин эхирдин), куьне Аллагьдилай гъейри масадавай тIалабдани? (Куьне жаваб гуда, ваъ лагьана) Нагагь куьне дуьз лугьуз хьайитIа».
- Куьне Адавай тIалабда дуьаяр ийиз. Эгер Адаз кIан хьайитIа, Ада куьн азад ийида а затIуникай (четинвилерикай), куьне Адаз вуч патал дуьаяр авунайтIа, ва куьне барабар авурбур (Аллагьдиз) куь рикIелай алатда.
- Чна гьеле ракъурнай (пайгъамбарар) вал къведалди авай халкьарин патав (амма абуру кьабулнач). Чна абуруз (чпин пайгъамбарар кьабул тавур халкьариз) кесибвал ва азарар ракъурна, абур муьтIуьгъ жедайвал (туба ийидайвал ва инанмиш жедайвал).
- Эгер абурал жаза агакьайла абур муьтIуьгъ хьанайтIа (абуруз хъсан жедай, амма абур муьтIуьгъ хьанач)! Амма абурун рикIер къванер хьиз хьанва (ва иман кьабулиз алакьнач), ва шейтIанди абуруз чпин (гунагь) крар гуьрчегдиз къалурна.
- Абуру насигьатар (бедбахтвилер ва четинвилер) рикIелай алудайла, Чна абурун вилик вири крар патал ракIарар ачухна (няметрин ва булвилин вири жуьреяр, абур ахтармишун патал). Абур ганвай шейэриз (няметриз) шад хьайила, Чна бейхабардиз абуруз жаза гана ва абур лап чара атIай гьалдиз атана!
- Вири пис инсанар (бутпересар) садни амачиз тергна. Шукур хьуй Аллагьдиз, алемрин Раббидиз (пайгъамбарар абурун душманрикай азад авур)!
- Лагь (я Мугьаммад, а кафирриз): «Куьне гьикI фикирзава, нагагь Аллагьди куьн ван атуникай ва вилерин ишигъдикай магьрум авуртIа, ва куь рикIериз муьгьуьр ягъайтIа (абур гьакъикъат кьабул тийидайбур авуртIа), Аллагьдилай гъейри гьи худади абур вири квез хгуда?» Килиг, гьикI Чна абур лишанрин гъавурда твазватIа, амма абуру лагьайтIа, нетижада (гьикI авуртIани) далу элкъуьрзава.
- Хабар яхъ (абурувай): «Куьне гьикI фикирзава, эгер Аллагьдин жаза квел(ни) хабарсуз ва я гуьзет ийиз агакьайтIа (мукьва жезвай хатадин лишанар виликамаз чир жедайла), писбурулай (имансузрилай) гъейри са вуж ятIани терг ийидани кьван?»
- Чна шад хабарар гваз (иман гъайибур патал Женнетдикай) ва я виликамаз хабар гун патал (иман тагъайбур патал Жегьеннемдикай) пайгъамбарар ракъурзава. Вуж инанмиш хьайитIа ва дуьз хъхьайтIа, абуруз кичIевал чир жедач ва пашман жедач (Дувандин юкъуз, кафирар пашман хьайила).
- Чи лишанар инкар ийизвайбурал (вуж пайгъамбаррихъ ва Пак Ктабрихъ инанмиш туширтIа) абурун гунагьрай (ва имансузвиляй) жаза агакьда.
- Лагь (абуруз, я Мугьаммад): «(Куьне кьетIен аламатар тIалабзава, амма) За квез лугьузвач хьи, зав Аллагьдин хазинаяр гва лагьана, ва заз чинебан крар чизвач (тестикьарзавач хьи) (Аллагьдиз заз ачухиз кIан хьайибурулай гъейри). За квез зун малаик я лугьузвач. Зун анжах Вагьйуда ракъурайдаз табий жезва». Хабар яхъ (абурувай): «Буьркьуьди ва аквазвайди сад яни кьван (иман гъанвайди ва имансуз, чизвайди ва течизвайди)? Вучиз куьне фикир ийидач (адакай, а фикирри куьн имандал гъидайвал)?»
- Идалди (Къуръандалди) виликамаз хабардар ая а ксар, низ чпин Раббидин вилик (иман гъанвайбур) кIватIуникай кичIезватIа. Абуруз Адалай гъейри я куьмекдайди, я тереф хуьз экъечIдайди (Адан ихтияр авачиз) жедач. Мумкин я, абуруз Аллагьдихъай кичIе жеда (ва имансузвални гунагьар авун мад хиве кьан хъийидач).
- Калтугмир (я Мугьаммад, жувахъай) а ксарихъ, ни пакамахъ ва нянихъ дуьаяр ийиз вичин Раббидивай тIалабзаватIа, анжах Ам патал ибадат ийиз (ва анжах Адан разивилихъ чалишмиш жез). Вуна абурун патахъай жаваб гузвач ва абуруни ви патахъай жаваб гузвач – гьатта са тIимил кьванни. Нагагь вуна абур чукурайтIа, вун адалатсуз жеда. (Бутпересри кесибрихъ галаз векъидаказ рафтарвал ийизвай, абур межлисрай чукурзавай ва абуруз чпин патав къведай ихтияр гузвачир. Абуру Аллагьдин Расулдиз ﷺ лугьузвай: «Эгер вуна абур чукурайтIа, чун ви межлисдиз къведа». Пайгъамбардизни ﷺ акI ийидай фикир авай, абуру Ислам кьабулдайвал (ТIабари). Амма Аллагь Таалади адаз ихтияр ганач).
- ГьакI (инсанрин дуланажагъ ва жемятдин арада абурун гьал гьар жуьрединбур ийиз) Чна садбур муькуьбуралди ахтармишзава, абуру (имансуз девлетлуйри) лугьудайвал (кесиб мусурманрикай): «Яраб Аллагьди абуруз чалай гзаф регьим авуна жал?» Аллагьдиз (Вичиз) шукур ийизвайбур вужар ятIа хъсан чизвачни кьван?
- Ви патав (я Мугьаммад) Чи аятрихъ инанмиш хьанвайбур атайла, абуруз лагь: «Ассаламу алайкум! Куь Раббиди Вичиз регьим хкяна. Нагагь квекай сада чин тийиз пис кар авуртIа ва ахпа туба авуртIа (авур кардай, идалай кьулухъ мад ахьтин кар хъийидач лагьана кIеви ният аваз) ва дуьз хъхьайтIа, Ам (Аллагь Таала) – Гъил Къачудайди, Регьим Иийдайди (Вичин лукIариз) я хьи».
- ГьакI Чна (Къуръандин) аятрин гъавурда твазва, (гьакъикъат дуьздал акъатдайвал ва) тахсиркаррин рехъ ачухдиз аквадайвал (ва куьн адакай къутармиш жедайвал).
- Лагь (я Мугьаммад): «Заз, гьакъикъатда, къадагъа авунва куьне Аллагьдилай гъейри ибадат ийизвай шейэриз ибадат авун». (ГьакIни) Лагь: «За куь рикIе акьур крар ийидач, (дуьз) рекьелай алат тийидайвал ва насигьатдикай магьрум тежедайвал».
- Лагь (гьакIни): «Гьакъикъатда, зун зи Раббиди субутнавайдаз табий жезва. Куьне ам кьабулнач. Куьне гьакьван тади кутазвай кардал заз гьукум авач (лугьуз: «Чал цавай къванер ва я азаб гудай жаза ракъура»). Къарар (гьасятда жаза гунин ва я ам маса вахтунал вегьедай) анжах Аллагьди кьабулзава. Ада (гьамиша) гьакъикъат лугьузва ва Ам – къазийрикай виридалайни хъсанди я».
- Лагь: «Эгер куьне тади кутазвай крарал заз гьукум авайтIа (квел жаза ракъурунин мумкинвал), зинни куь арада авай кар гьеле (фад) гьялнавай (за геж тавуна куь тIалабун тамамардай, амма къарар Аллагьди кьабулзава). Амма Аллагьдиз пис инсанар хъсан чизва.
- Адав чинебан крарин куьлегар гва ва адакай анжах Адаз чизва. Адаз кьураматдал ва гьуьле авай виридакай чизва (чан алай ва чан алачир вири махлукьатрикай). Адаз тарцелай аватзавай гьар са пешиникай чизва. Чилин мичIивиле авай гьар са твар, вири тазабур ва кьурайбур – ибур вири (кхьенва) Ачух (Хуьзвай) Ктабда. (Имам Бухариди Ибн Умаралай агакьарзавайвал, Пайгъамбарди ﷺ лагьана: «Чинебан крарин куьлегар вад затIуна ава, ва Аллагьдилай ﷻ гъейри абурукай садазни чизвач. Адалай гъейри садазни чизвач, руфуна вуж аватIа (яни, аялдин жинс), садазни чизвач, пака вуч жедатIа, Аллагьдилай ﷻ гъейри. Садазни чизвач, марф мус къвадатIа, Аллагьдилай ﷻ гъейри. Садазни чизвач, Дувандин югъ мус алукьдатIа, Аллагьдилай ﷻ гъейри»).
- Ам – куьн йифиз Рекьизвайди (куьн ксанвайла) ва юкъуз куьне вуч ийизватIа Чизвайди я. Ахпа Ада квел юкъуз чан хкизва (куьн ахварай аватайла), куьн (чилел гьар са касдин уьмуьрдин) тайин авунвай вахтунда яшамиш жедайвал. Ахпа (кьейидалай ва чан хкайдалай кьулухъ) куьн Адан патав хкведа, адалай кьулухъ Ада квез куьне авур вири крарикай (уьмуьрдин къене) лугьуда.
- Ам – Вичин лукIар МуьтIуьгъарзавайди я. Ада куь патав хуьдайбур (малаикар) ракъурзава, ва квекай садан патав кьиникь атайла, Чи векилри ам секинарда (руьгь къахчуна), ва абуру (чпин везифаяр тамамардайла) гъалатIар ахъайзавач (къайгъусузвал ийизвач ва геж ийизвач).
- Ахпа абур (махлукьатар) Аллагьдин патав хкида, чпин гьакъикъи Архадин (ва Ада абурун крарай эвез хъийида). Чир хьухь, вири гьукум анжах Аданди я. Ада гьахъ-гьисаб тадиз ийида. (ГьакI, Дувандин юкъуз са лукIран гьахъ-гьисабди Ам маса лукIран гьахъ-гьисабдивай масанихъ алуддач, ва и тегьерда, Ада лап са куьруь вахтунда Вичин вири лукIарин гьахъ-гьисаб куьтягьда).
- Хабар яхъ (я Мугьаммад, бутпересривай): «Куьн ни къутармишда (хатайрикай ва) мичIивиликай кьураматдал ва гьуьлел, куьне Адаз муьтIуьгъвилелди ва чинеба лугьудайла: «Эгер Ада чун идакай къутармишайтIа, чна чарасуз шукур ийида (Адаз)»?
- Жаваб це (жуван суалдиз жува): «Аллагьди къутармишда куьн адакай ва амай вири хажалатрикай. Ахпа куьне Адаз барабар ийизва (квез куьмек гуз тIем акакь тийизвай махлукьатар)».
- Лагь: «Адавай квел винелай жаза ракъуриз жеда (Нугьан ва ЛутIан халкьарал хьиз) ва я кIвачерикай (Къарунал хьиз, чили туькьуьнай). Адавай куьн кьве (душманвал ийизвай) дестедиз пайиз ва садав муькуьдавай писвал дадмишиз таз жеда (куь арада дяве башламишна)». Килиг, Чна лишанрин гъавурда гьикI твазватIа (шад хабарар ва кичIе гунар нубатдалди дегишариз), абур гъавурда акьадайвал (гьакъикъатдин).
- Ви халкьдини ам (Къуръан) кьабулнач, ам гьакъикъат ятIани. Лагь: «Зун куь къаюм туш (за квев гужалди ийиз тазвач ва жаза гузвач, анжах квез гьакъикъатдихъ эвер гузва)».
- Гьар са хабардиз (Къуръандай тир) вичин вахт ава ва мукьвара квез чир жеда (Аллагьдин гафар гьакъикъат тирди).
- Ваз Чи аятрикай рахазвайбур акурла (абурун гьакъикъивал инкар ийиз, абурукай ягьанатар ийиз ва я нукьсанвилер къалуриз), абур гадарна алад (къарагъ ва абурухъай ахлад, жуваз бегенмиш тийизвайди абуруз къалурун патал), та абуру ихтилат дегишардалди. Эгер шейтIанди вав ам (къадагъа) рикIелай алудиз туртIа, (ам) рикIел хтайдалай кьулухъ пис ксарихъ галаз ацукьмир.
КьатI ама.
