Мусурман я зун, шукур Аллагь!
Мугьаммад Ярагъидиз
Ярагъдал дидедиз хьайи,
Къавкъазда машгьур хьайи,
Согратлида эхир-макан хьайи,
Ярагъ Мугьаммад эфенди.
Дагъустандин имам хьайи,
Тlарикъатдин муршид хьайи,
Пуд имамдин муаллим хьайи,
Ярагъ Мугьаммад эфенди.
Ви девир хьанач гьич секин,
Вакъиаяр гьалтна лап дерин,
Уьмуьр хьана ваз четин,
Ярагъ Мугьаммад эфенди.
Тlарикъат цlийи хъувур,
Устадар диди авур,
Дагъустандин халкьдин абур,
Ярагъ Мугьаммад эфенди.
Имам Ариф атана ви зияратдиз,
Дуьа ийиз гьар са муъминдиз,
Гьайиф тир вун дуьньядай физ,
Ярагъ Мугьаммад эфенди.
Рустамов Ариф
Дидедиз
Ишигъ квахьна зи вилерин,
Къуват квахьна зи гъилерин.
Чанда авай зи дердерин,
Сир низ гурай, ширин диде?
Бес вуна зи кабабна рикl,
Гъиляй кlвалах атурай гьикl?
Хуьруьн чlехи гуьнедай тик,
Экъечlдай тир, ширин диде.
Бес гила гьикl хьурай зи гьал?
Зун сефил я квахьна хиял.
Къе зи чанда гьатнава тlал,
Ни акъудрай, ширин диде?
Секинвал заз жеч йиферин,
Хиялривди ацlун дерин.
Дуьнья дар я, бес за вучин,
Ни ачухрай, ширин диде?
Фана дуьнья хьанва ви кlвал,
Зун ишезва къе ви сурал.
Зун тек туна на дуьньядал,
Вучиз фенай, ширин диде?
Ичlи хьана зи кесиб кlвал,
Шез ацукьна зун къапудал.
Зи вилерин накъварин сел,
Ни михьи авурай, ширин диде?
Сагъ хъийиз вун чlугунай женг,
Лукьман хьана ви хва Юзбег.
Рикl ачухиз бес зав куьлег,
Ни вугурай, ширин диде?
Юзбеков Юзбег
Мусурман я зун
Сад тир Аллагь я заз кIани,
Къастунални я зун кIеви,
Садазни зун хьанач акси,
Зунни я вун хьиз мусурман.
Къастунал зун хьана кIеви,
КIвалахризни хьана дири,
Хасетризни я зун къени,
Зунни я вун хьиз мусурман.
Хатурарни ийиз чидай,
Инсанвални кIевиз хуьдай,
Гьамиша капI-тIеат ийидай,
Зунни я вун хьиз мусурман.
Хьаначир зи рикIе шейтIан,
Ачух я заз гьар са майдан,
Диде хьтин ширин Ватан,
Зунни я вун хьиз мусурман.
Инсанризни тир зун кIани,
Амалризни хьанай къени,
РикIни тир зи гуьзгуь михьи,
Зунни я вун хьиз мусурман.
КьатIунар захъ авай дерин,
КIвалахарни хьанай къалин,
Мезни авай заз лап ширин,
Зунни я вун хьиз мусурман.
Гайидални я зун рази,
РикIни гьамиша я михьи,
Жуван зегьмет жуваз кIани,
Зунни я вун хьиз мусурман.
Аскер Ибрагьимов
Веси
Эй жемятар, гъвечIи чIехи,
Амукьдач кас, рекьида вири,
Минет хьуй квез ийизва веси,
Шехьмира захъ, дуьа ая.
Кьиникь, гьелбет, я агъур кар,
Язва ам Аллагьдин кьадар,
АлтIушна мейитдал халкьар,
Шехьмира захъ, дуьа ая.
Мейит кьилдин кIвале эциг,
Чин ачух - авурай килиг,
Маса фикир тахьуй чпихъ,
Шехьмира захъ, дуьа ая.
Пуд эцига зал кафанар,
Пайгъамбардал ﷺ хьайи кьадар,
Кьиле твах за квез тур гафар,
Шехьмира захъ, дуьа ая.
Сур эгъуьнайбур ая рази,
Заз гьалалвал гурай чпи,
Зун кIанибуруз язва веси,
Шехьмира захъ, дуьа ая.
Садакьаярни кIанда гьелбет,
Кьейи касдиз гъурай рагьмет,
Хъийимир мад гъамни хифет,
Шехьмира захъ, дуьа ая.
Пуд къанди хьуй чIугвадай яс,
Тахьурай мад чуру тур кас,
Гележегда хьурай квез тарс,
Шехьмира захъ, дуьа ая.
Кьилихъ къягъа чкадин къван,
Чир хьуй кутур чка инсан,
Герек туша маса дуван,
Шехьмира захъ, дуьа ая.
ЯхцIурарни гьич цIикьведар,
Туш Исламда авай крар,
Инжиклу жез хуьквез ксар,
Ийимир захъ, дуьа ая.
РикIел хкваш гьар хемис къуз,
Суваб хьурай текьейбуруз,
Аллагь рази жеда, шаксуз,
Шехьмира захъ, дуьа ая.
Садакьа це хьайла мумкин,
Гьалалвал це, ая секин,
Жемятарни вири хуьруьн,
Шехьмира захъ, дуьа ая.
Усу Мугьаммадан веси,
ЧIурдайбур жеда, гьелбет, аси,
Зи мукьвабур гъвечIи-чIехи,
Шехьмира захъ, дуьа ая.
