АкьалтIай игитар
Хтулдихъ галаз сейр ийидайла, заз гьаятар михьзавайдахъ (дворникдихъ) галаз са квекай ятIани къизгъиндиз рахазвай гъвечIи кицI галай са дишегьли акуна. КилигайтIа, аялрин майдандал алай кицIерин нежесар ада михьзавач лугьуз, дишегьлиди адаз шикаят ийизвай. «Аялриз къугъвадай чка авач!» - хъел кваз лугьузвай ада. Итим лагьайтIа, чинал хъвер алаз адаз килигзавай ва гьакI кьил юзурзавай.
Ам гьахъ яни? Эдебдин патахъай – ваъ. Иесияр чпин гьайванрихъ гелкъуьн лазим я, гьа жергедай яз, абурун гуьгъуьнай михьивал авун ва нетижайрин патахъай жаваб гун. Артухан сеферда кукIва кIацIур тавун патал гьайванар гьаятдиз акъудун – им кIвалин амай агьалийрин патахъай лап тIимилди адалатсузвал я. А дишегьлиди дуьз къейд авурвал – «аялриз къугъвадай чка авач».
Уборщик – им агъа дережадин фяле тирди инсанар инанмиш я. Диде-бубайри мектебда кIелзавай аялриз гьикI кичIе гудай? Эгер пис кIелиз хьайитIа, вакай гьаятар михьдайди жеда. Амма ам юрист ва я аналитик хьтин пеше я хьи.
Абуру жив, мурк, чи гьаятар ва куьчеяр михьзава, магьлейра михьивал хьунал гуьзчивал ийизва, кьил алачир тIеквенрикай хабар гузва ва икI мад. Гьакъикъатда лагьайтIа, гьаятар михьзавайбур – чи хатасузвилиз фикир гузвай акьалтIай игитар я. Абурун кIвалах акьван адетдинди хьанва хьи, чна адаз гьич фикирни гузвач.
КIвалахал, поликлиникада, маса гьалтай чкадал уборщикриз гьакI салам це. Эгер гьар юкъуз абуруз салам гуз хьайитIа, са варз арадай фейила абурукай кIвалахзавай коллективдин пай, азарханадин къуллугъчи ва икI мад жеда. Ам гьакI язни я хьи.
Таниш хьайила, куьмек гуз вич-вичелай кIан жеда. Куьмек гьар жуьрединди хьун мумкин я. Виридалайни регьятди – манийвал тавун я. И дуьшуьшда лагьайтIа, зирзибил гадар тавун, кьил алачир тIеквенрикай абуруз хабар гун, жуван гьаятда михьивал авун.
Пакамаз аялар къугъвадай майдандал алай скамейкайрин, перпилагрин патав йифен ацукьунрин нетижаяр аквада: шуьшеяр, пIапIрусрин кьатIар. Амукьзавайди анжах абур пакетдиз кIватIун я, чи аялар абурухъ, адетдин крарихъ хьиз, вердиш тахьун патал. Къайда чIурай ксар бажагьат кьаз жеда. Амма гуьгъуьнин нагьакьан крарин вилик пад кьун – им чалай алакьдай кар я.
