Стресс гьикI алакьарда?
Чна папахъ галаз фадлай шегьердилай къерехда эцигнавай багъ галай чIехи ва гуьрчег кIвалерикай хияларзавай. Хъсан гьакъи къвез акурла, за чIехи кьадар пул буржуниз къачуна рикIин мурад тир кIвал къачун кьетIна. Мурад кьилиз акъатна, амма зурба буржар себеб яз рикIиз ийизвай эсерди зи уьмуьр чIурзава. Къариба кар я, жуван цIийи кIвале завай секиндиз ксуз жезвач. За гьамиша фикир ийизва, кIват тавуна бурж гьикI вахкудатIа лугьуз. И стресс за гьикI алакьарда?
Алимдин жаваб:
КIвалер къачун патал акьван гзаф кьадар пул буржуниз къачун герек тушир лугьуникай гила артух метлеб авач. Санлай къачуртIа, са кар кьилиз акъатун патал са касдивай буржуниз къачуртIа, эгер ада диндин къайдайриз аксивалзавачтIа, жеда, эгер бурж вахтунда вахкуз жеда лагьана инсан инанмиш яз хьайитIа ва ам вахкудай мумкинвал аваз хьайитIа.
Четинвилерикай и уьмуьрда са касни саламат авунвач, ва куь рикIиз эсер авунизни бине ава, амма ахьтин фикирри куьн стрессдал, кичIевилерал ва икI мад гъун лазим туш. Вучиз лагьайтIа вичин крара иман гъанвай касди сифте нубатда Аллагьдин ﷻ куьмекдик умуд кутун ва вичи ийизвай крар Адаз кIандайвал ва Ам рази жедайвал авун лазим я.
Четинвилер ва регьятвилер – ибур вири Халикьдин ﷻ, алемрин Раббидин ﷻ ихтиярда ава. Уьмуьрда шумуд сеферда чна кичIевал гьиссна? Гьар юкъуз чилел гьикьван инсанри жуваз ва жуван аялриз недайди гьинай гудатIа лугьуз фикирзава? Бес бизнесменар ва карчияр авачни кьван, авай-авачирди гъиляй акъатна амукьай, я тахьайтIа чпин мал-девлет гьакI чуьнуьхай? Чи арада авани кьван виридалайни багъри ксар текьейбур?
Ахьтин имтигьанрай чакай гьар сад экъечIзава. Аллагьдихъ ﷻ инанмиш хьуни чаз вири и четинвилер алудиз куьмек гузва, вучиз лагьайтIа иман гъанвай инсандиз чизва, гьикI вичиз четинвилер ганатIа, гьакI вич рикIелай алуд тийидай, регьятвал гудай Аллагь ﷻ авайди.
Куь дуьшуьшда за квез Раббидин ﷻ регьимдикай умуд атIун тавун, Адавай жезмай кьван фад буржар алудиз куьмек гун ва багъишламишун тIалабун меслят ийизва. Багъишламишун лагьайтIа, мумкин я, дуьньядин няметрал кьадардилай артух рикI хьунай, чарасузвал авачир багьа кIвалер къачунин патахъай тIалабун лазим я, вучиз лагьайтIа и дуьньяда инсандин мурад – вичин Халикьдин ﷻ разивал къазанмишун я.
КIвалах авун давамара ва гьа са вахтунда вири жуван везифаяр тамамарун рикIелай алудмир, неинки са инсанрин вилик, амма кьилинди – Халикьдин ﷻ вилик. Им вахтунда ийизвай капI, жув гунагьрикай хуьн, гьалал рекьелди пул къазанмишиз алахъун я, са касни алдатмиш тийиз ва садазни азият тагуз.
Психологдин меслят:
Эхь, куьне куь гьиссерин гьал стресс тирди дуьз къалурна. И стресс арадал гъанвайди квез къенепатан кичIевал хьун я, квез бурж вахкудай мумкинвал амукь тийидай са кар жеда лагьана. Гьа и гьиссди куь фадлай эрзиман тир кIваликай тамамдиз лезет хкуддайвал квез манийвал ийизва. Аквадай гьалда, вири кар куь къилихда ава, яни артухан жавабдарвиле ва крар хъсан жедач лугьудай фикирда.
Ихьтин къулайсуз ва зиян жедай гьалдай фад экъечIун патал, са гъвечIи самоанализ авуртIа хъсан я. Адан мурадни арадал атанвай гьал куьне кьабулунин ва куь уьмуьрда гьакъикъатда жезвай вакъиайрин арада барабарвал тун я.
Жуван уьмуьр веревирд ая ва анай квез гьялиз тежедай хьиз акур дуьшуьшар кхьихь. Адалай кьулухъ дугъриданни гьялиз тахьайбур чара ая. Мумкин я, квез аквада, квез гьялиз тежедайбур хьиз акур чIехи пай вакъиаяр гьакъикъатда ахьтинбур тушир. Вири кар куь къилихда ава.
Ихьтин гьал фикирдиз гъайитIани жеда: крар виридалайни пис жуьреда кьиле фена ва гила куьне вуч ийида? Аквадай гьалда, месэла гьялдай жуьре квез жагъида, акьван хъсанди туштIани, амма жагъида. РикIяй ахьтин гьал кьабула, ахпа квез арадал атай гьал гьялиз регьят жеда.
