Итимриз бегенмиш тир дишегьлийрин ерияр
Жуван гъуьлуьз виридалайни кIаниди хьун патал, чакай гьар сад чалишмиш жезвай дишегьлидин гуьрчегвилин чешнеяр гзаф ава – дуьз кIвачер, шуькIуь юкь, гзаф гуьзел чIарар… Жемятди чи кьиле ахьтин фикир твазва хьи, гуя винел патан акунрилай гъейри итимриз са затIни итижлу туш. Къе чна квез итимриз чеб кIанарзавай дишегьлийрин ерийрикай ахъайда. Амни эсиллагь винел патан акунар туш.
Акьул ва илимрай дерин чирвал
Гзаф итимри хиве кьазва хьи, абуруз чпин дишегьлидихъ галаз рахадайла гьамиша итижлу хьана кIанзава. Гзафбуруз чпин папарихъ галаз жуьреба-жуьре месэлаяр веревирдер ийиз кIанзава. Фикирдиз къачу хьи, гъуьлуьн итижриз фикир тагун – им гьиссер къунихъ ва сад-садавай яргъа хьунихъ ийизвай сад лагьай кам я. Куьн сад-садав кьуна кIанзаватIа, гьар юкъуз са цIийи шей чириз алахъ, чирвилин дережа гегьеншара.
Юзуниз кьезилвал
Гзаф итимриз гьамиша вири затIарихъай кичIезвай ва гьа са жуьреда яшамиш жезвай дишегьлийрихъ галаз санал жез итиж амукьзавач. Юзуниз кьезил хьухь ва гъуьлуьн чалишмишвилера гьамиша адаз куьмек гуз гьазур хьухь.
Менфятперес тахьун
Ингье мад са ери, чи девирда тIимил авай, амма итимрин хиялрик къалабулух кутазвай. Эхиримжи цIуд йисуз раиж жезвай виридалайни чIехи мах ам я хьи, гуя вичи-вич вине кьадай, буйругъ ийидай дишегьлийрал итимар гзаф ашукь я.
Амма им чIехи ягъалмиш хьун я. Итимриз темягь авачир дишегьлияр кIан жезвайди я, ахьтинбур хьи, низ вичин итимда неинки таъмин авунин чешме аквазватIа, гьакI адахъ вичин мурадар ва игьтияжар авай инсанни аквазвай. Гьахьтин дишегьли кIан жез, ам патал мягькем даях жез ва адахъ гелкъвез кIан жезва.
Адан аялрихъ галаз дуствилин алакъаяр хьун
Нагагь итим идалай вилик эвленмиш хьанвайтIа (ва я исятда адаз вичин хизан аватIа), мягькем хизан арадал гъунин важиблу шартI – адан аялрихъ галаз ийизвай рафтарвал я. Гьатта гужлу рикIин чимивални, маса некягьдик хьайи адан аялрихъ галаз жезвай пис алакъайри терг авун мумкин я.
Сифте вахтара лап мукъаят хьана кIанда, абур ачухдиз вахъ галаз рахун гуьзлемишмир ва генани абуруз тербия гуз алахъмир. Гъуьлуьн аялриз дуст жез алахъ, абур кIан хьухь, гьа чIавуз куь гъуьлуь квез гьуьрмет ийида ва адаз куьн генани багьа жеда.
Ам гьихьтинди ятIа, гьакI кьабулун
Чун вири лап хъсанбур туш, вири гьар жуьрединбур я. Гьар садаз вичин лайихлувилер ва нукьсанар, итижар ва машгъулатар, кичIевилер ава. Са касни бахтлу жедач, нагагь кьвед лагьай паюни хизандин уьмуьрдин сифте кьилелай ам вичиз кIандайвал дегишариз алахъайтIа.
Санал яшамиш жез йисар фейила, гъуьлни паб дегиш жезва, абур сад-садахъ галаз вердиш жезва, абуруз регьят ва къулай жезва. Чун дегиш жезва ва гьатта сад-садаз ухшар жезва. Амма и кар патал цIуд йисаралди санал яшамиш хьун герек къвезва. Жуван гъуьлуьн итижриз гьуьрмет ийиз чир хьухь ва вахтуни вири куь паталай ийида.
САФИЯ ФОКИНА
