Шейх Желил бубадикай кьисаяр
Вучиз чай хъваначир?
Шейх Желилаз, мугьмандиз ша лугьуз, гзаф теклифдай тир. Тlвар за кьадач, амма са касди Желилаз мугьмандиз ша лагьанай. Мугьмандиз фидайла, шейх Желилан суьрсет вичин гьебеда (чанта) жедай тир. Кlвализ фенмазди вичив гвай паярни фад-фад акъуддай. Ша лагьай чкадиз ам фидай кас тир. Адаз такабурвал чидайди тушир.
Шейх Желил ша лагьай гьа и чкадизни фена. Хваш-беш авуна, тlуьн вилик гъана, ахпа чай гъиз башламишна. Шейх Желила фу тlуьна, амма чай хъванач. Кlвалин иеси Желил халудал чай хъухъ лугьуз гьавалат хьана. Сифте адаз лугьуз кlан хьанач, эхирни, абурун минетун акурла, адавай акъвазиз хьанач. «За чай гьикl хъвада, ви къариди вичин хуруда авай кьацlай хуругандай истикlанар михьна, заз чай гъанвайла?!» - лагьана ада.
Мягьтел хьайи къариди вичи-вичикди лагьана:
– Я Аллагь ﷻ, адаз за авур кар гьикl чир хьана?
Ада Желил халудивай хабар кьуна:
– Желил стха, квез гьикl чир хьана? Валлагь, завай гьа чlуру кар хьана.
Шейх Желила жаваб гана:
– Заз вуна авур дуьз тушир кар аян хьана.
Ни вуч ийизватlа, шейх Желилаз рикlивайни аян жезвай.
За гьа папан тlвар кьадач, ам Желил халудин хуьряй тир.
Зи кlвачер сагъарай къайда
Зун 6-7 йис хьанвай руш тир. Кlвачер юзур тежез месел къаткана санбар йикъар алатнавай. И арада Желил буба Агъа Ярагъдал Баламирзедин кlвале яшамиш жезвай. Зи буба Исабег фена Желил халу галаз хтана. Ада зи кlвачер инихъ-анихъ юзурна. Заз пис тlарзавай, кlвачер юзуриз жезвачир. Желил бубади эвел вичин гъил алтадиз кlелунар авуна, ахпа ада зи буба Исабегаз лагьана: «Вацlуз регъвер галай патахъ фена, гъилиз акьван залан тушир са вили куьнуь гъваш. Гьа куьнуьдалди Зумрутlа вичин кlвачер гатурай».
Чи буба Исабег гъуьрчехъан, гьакlни мешебеги (тамуз килигзавай кас) тир. Ада гъуьрч ядай, адан кьилив гзаф ксар къведай ва санал тамуз фидай. Гзаф вахтара ада вакlарни ядай. Желил халуди зи бубадиз абур ямир лугьудай. Амма адаз къайгъу авачир ва вичиз чидайвал ийидай.
Ирид йис тамам хьайила, чи стха Назир пис начагъ хьана ва гьа са йикъан нисиндалди кечмишни хьана. Рекьидалди ам духтурдиз, Кьасумхьурел тухвана. Аялди тек са кар тlалабзавай: вич тухузвай машиндай чилел эциг лугьуз. Кlвализ агакьна, чилел эцигнамазди ада чан ганай.
Желил халу Цlелегуьндилай фад атана акъатна. Ада вичин хтул Ципицlаз лагьана:
– Пlирерал, шейхерал фена хьанвай михьи аял тир. Гьарам вакlан якlар гъиз, тlуьнар-хъунар ийиз, аял кьена. Адаз гзаф хьайиф хьанвай.
Ахпа ада зи дидедиз ахъайнай:
– Чун пlирел Шалбуз дагъдиз фидай йифиз заз ихьтин ахвар акунай: «Са яц еке синида аваз «ля илягьа илляЛлагь» лугьуз-лугьуз чилин кlаникай гурарай виниз чилел акъудна, чан руш, вав вуганай, вавайни ам са чара касди «ля илягьа илляЛлагь» лугьуз-лугьуз вахчуна ва са маса чкадиз тухванай. Ваз гада хьана ам рекьидайдини заз чизвай».
Желил бубади сабур гана:
– Чан руш, Сад Аллагьди ﷻ Вичи гана, Вичи вахчунни авуна.
И кардин шагьид Исабеган гъвечlи руш, зун Зумрият хьана. Заз зи вилералди акуна, япаризни ван хьана.
Жабраилова Зумрият, Исабеган руш
