Гьарли-марси талихI мяхIкамбарая
Гьаннала манзиллизиб, сагати технологиябани нуша гьарли-марти дурхъадешуначирад гьарахъдирухIели, гьести гIямрула адамти нушачил лебни мекелли мягIничебсили бетарули саби.
Хала дудеш ва хала неш наслубала бархбас калахъуси, хъалибаргла дурхъати гIядатуни мяхIкамли дихIуси ва чеалкIуси наслуличи илди диахъуси урунжли бетарули саби. Адам чум дус виаллира, бегIлара шадти дусми сегъунтирил или хьарбаибхIели, бахъалгъунтани пишбяхIили, дурхIядешла манзил или бурули бирар. СенахIенну, гIямрулизир кадиркути бекIлидиубти ва разити анцIбукьуни дурхIядешла манзиллизир сари. Илди дусми сари нушани бегIтачил ва хала бегIтачил дарх дуркIути. Иличиб дурхъаси ва мягIничебси се биэса гьатIи? БегIтачил барх буркIуси заманализиб саби нушала талихI. Хала бегIти лебти саби гьарли-марли талихIчебти адамти. Илди нушачил барх лебай - дурхIядеш кавлути сари. Дила хала дудешуни ва хала нешани гIямрулизибад шалгIеббухъунхIели, дурхIядешра ардякьунтиван билзули саби. Гьарахъти дусмазир разити ва шадти бурхIни калунтиван гьанарули саби. Амма чум дус ардякьи хьалли, илдачибси уркIила диги бетихъули ахIен. Хала бегIтани дурути цацадехIти насихIятуни мурталра гьандиркули дирар. Дила нешла дудеш дебали багьудичевси адам вирусири. Ил набзи мурталра викIули вири «Адам белчIудили сай гьалавяхI викуси. БелчIуди касибси адамла хIурмат циила ахъли бирар, амма багьудичевси виъни таманси ахIен, адамдешла къиликъуни вегIлизир калахъни саби бекIлибиубси».
Гьанна биалли, илди мякьлаб агархIели, нушаб къиянбулхъули саби. Хъалибарглизив халаси адам лебси анкъи шалали бирар. Хала бегIтачил дарх кадиили ихтилатдикIули, селалра авараагрли хIулкIули буркIуси манзиллизи камси заманалисалра чардухъес имкан биалри ибси пикри мурталра бекIлизиб саби.
Байрумтира гьаларван шадти ахIен гьанна. Мисаллис, Хала БархIила байрам севан шадли бетурхусирил итхIели, хала бегIти мицIирли лебхIели. Гьанна биалли, кьяпIкадарибти илдала хъулрала унзурби гьандикалли, уркIи кьакьабикIули саби. Ил багьандан хала бегIти мицIирли лебтани илдачил сецадла имцIали дирадаллира замана буркIеная, гьарли-марси хIушала талихI мяхIкамбарая.
