ЧеалкIуси наслу мяхIкамбирули
Дахадаевла районна Морское шилизиб чеалкIуси наслулис адаб-хIяяла ва диннашалси бяркъ бедлугнила хIянчи ахъси даражаличиб тIашбатурли саби. Илис бикьридеш дирули сари школала бучIантачил детурхути шила хIурматла адамтала гьунибаънибани. Гьалабванра шила школала 5 –ибил классла бучIантала классла сягIятличир шила имам МяхIяммадхIяжи МуртазагIялиевли бутIакьяндешдариб.
БучIантачил барибси ихтилатлизиб илини буриб: «…ХIуша дахъхIи агарли халадаили, гIямрула бягIуси гьунчи дурадулхъутира. ЧеббикIибси гьуни сегъунсили бирарал хIушала адаб-хIяялашалси ва рухIлашалси бяркълизибад дигахъуси саби. Челябкьлализир сецадла хIуша ва хIушагъунти дурхIни багьудичебтили ва бяркъчебтили биаллира, илцадра имканбикIур республикализиб даршудеш ва цадеш калахъес. Ислам динна терроризмаличил ва экстремизмаличил сегъуналра бархбас лебси ахIен ва биэс бируси ахIен. Политикализир чус гIягIнити кьасани ва мурадуни сархес багьандан далдурцути зулмула тяхIяр-кьяйда я Кьуръанни я Идбагла ﷺ Суннали мардарибти ахIен. Ислам дин гьар журала гуж-зулмуличи къаршиси саби. Нушала дин гIяхIдешла ва даршудешла дин саби. Илала мурад – цархIилти адамтачи ва динаначи гIяхIтили, уркIецIичертили, сабурчертили ва хIурматчертили диъни саби. Нушала диннизиб гуж-зулмулис мер лебси ахIен. ХIушара жидирулра бархьси гьунчирад черхIедалкIи дашахъес. Ил багьандан биалли, бегI гьалабси яргализиб бегIтала ибси бирес чебиркур. Илкьяйдали ислам диннизиб багьуди кайсни – дебали дигеси анцIбукьлизи халбируси саби».
МяхIяммадхIяжи МуртазагIялиевли дурхIни жибариб гьир-кусбирутачи лехIхIебилзахъес ва динна бархьси гьуни буцили, иличибад чебхIебулкIахъес. Ахирличиб, илдигъунти далдуцунала бекIлибиубси мурад – бучIантас бяркъ бедлугнила шайчибси хIянчи даимси биахъес ва чеалкIуси наслу терроризмализибад ва экстремизмализибад мяхIкамбарес хIяжатли биъниличила баянбариб.
НУШАЛА КОРР
