Ҡайнатманан ыуылған бәлеш
Ҡамыр өсөн:
200 г аҡ май
2 йомортҡа
90 г шәкәр
420 г он
1 балғалаҡ ҡамыр йомшартҡыс
семтем тоҙ
Эслек өсөн үҙегеҙ яратҡан ҡайнатманы алығыҙ. Шулай уҡ повидло, джем, эремсек һалырға була.
Әҙерләү:
Онға тоҙҙо, ҡамыр йомшартҡысты, шәкәрҙе, һалҡын майҙы ҡушып, ҡул менән яҡшылап ыуабыҙ. Йомортҡаны туғып ҡушабыҙ. Йомшаҡ ҡына ҡамыр баҫабыҙ. Ҡамырҙы 2 өлөшкә бүлеп (ҙурырағы – бәлештең төбөнә, бәләкәй өлөшө – ыуалар өсөн ҡулланыласаҡ), салафан төргәккә һалабыҙ ҙа, ҙурын һыуытҡысҡа, бәләкәйен ярты сәғәткә тундырғысҡа оҙатабыҙ.
Әҙер ҡамырҙы табаға йәйеп тигеҙләйбеҙ. Ҡамырҙың өҫтөн ҡаплағансы, теләгән ҡайнатма менән һылап сығабыҙ. Тундырғыстан ҡалған ҡамырҙы алабыҙ ҙа, ҡырғыс ярҙамында ыуып, ҡайнатмалы өлөштө ҡаплайбыҙ.
Бәлеште 180 градусҡаса ҡыҙған мейестә 30 минут бешерәбеҙ. Тәмле лә, татлы ла бәлеш әҙер. Сәйҙәрегеҙ тәмле булһын!
