Өләсәйем һабаҡтары

Өләсәйем Хафизова Миңлеғаян Зариф ҡыҙы әйткәндәрҙән

“Ямандан Хоҙай йыраҡлашыр...”
Иң ҡурҡҡаның, балам, шул булһын,
Күңелеңә яҡтә уйҙар, яҡшылыҡ тулһын.
Ҡөрьәндең һәр сүрәһен күңелемә
Өләсәйем һүткән икән,
Булмышына һеңгән икән,
Ауырлыҡты еңгән икән.
Бөгөн килеп Ҡөрьәнгә мин
Йәнем менән һыйынам.
Яҡты ямғыр – һәр сүрәһе
Шул ямғырға ҡойонам.
Йәнем менән
Мин Хоҙайға һыйынам!
***
Ҡартлығың булыр йәмле,
Ҡыҙ-улыңа булһаң таяныс,
Ҡотһоҙ нәҫел ҡалдырғандың
Ҡартлыҡ көнө йәмһеҙ, аяныс.
***
Аҡты, балам, түгә күрмә, 
Өйҙән бәрәкәт китер.
Бәрәкәтһеҙ өйҙәгеләр
Күңелһеҙ уйҙар һүтер.
***
Йүнһеҙ йәндән йыраҡ тор,
Артынан һине һөйрәр.
Үкендереп аҙаҡтан
Йөрәгең яныр, көйрәр.
***
Күңелкәйең аҡ булһын,
Йөрәккәйең һаҡ булһын,
Телең, балам, бал булһын,
Һөйгәнеңә ял булһын.
***
Ожмахты ла, тамуҡты ла
Кеше үҙендә йөрөтә.
Үҙ эше, һүҙе менән
Үҙ йөрәген ул
Йә туңдыра, йә иретә.
***
Тишек күңел ямалыр,
Аҡыллы бул, сабыр бул.
Күңелеңде йыуатырлыҡ
Ҡыуаныстар табыр бул.
***
Хатта ағыуҙан да
Алып була дарыу.
Иҫәрҙең дә хәбәре 
Була ала арыу.
***
Аҡыл өйрәт, кәңәш бир,
Аҡыллы булһа бала.
Аҡылһыҙҙа хәбәрҙәрең
Аяҡ аҫтында ҡала.
***
Үҙ-үҙеңде тыя алһаң,
Үҙ-үҙеңде тыя алһаң,
Бәхеткә асылыр ишек, 
Ишет, балам, шуны ишет!
***
Ҡыҙ-уланың тороуына
Табының әҙер булһын.
Өйөңә ҡояш булып
Һинең һөйөүең тулһын.
***
Йәнеңә яҡын йәндәр
Тартылһын йәшәр өйгә.
Ап-аҡ һөлгөң аҡ күңелдәй
Эленеп торһон сөйҙә.

Динә Талхина