Әти-әнигә хөрмәт
Әтиемә булышам,
Чакырса килеп җитәм
Тыңлашам әниемә,
Матур итеп сөйләшәм
Бергә барсак, арттан барам
Чакырсалар йөгереп киләм
Дуслары белән мин дус
Барсына дога кылам
Саулык иминлек телим
“Гафу ит, Раббым”, - диеп.
Әти-әни каршында булган вазифалар:
- Әти-әнигә һәрдаим ярдәм итәргә;
- Алар дәшсәләр, килеп тыңларга;
- Кушсалар, тыңлашырга;
- Әти-әни белән матур сөйләшергә;
- Барганда, артларыннан барырга;
- Аларның дуслары белән дус булырга;
- Әти-әни өчен Аллаһтан яхшылыклар сорарга.
Ата-ана өчен укыла торган дога:
«Раббанә-гъфирьлии үәли-үәәлидәййә үәлиль-му’миниинә йәумә йәкуумуль-хисәәб». (Әй Раббыбыз! Мине, минем ата-анамны, һәм барча мөэминнәрне хисап булачак көнне ярлыка) Коръән, «Ибраһим» сүрәсе, 41-нче аять.
Коръән Кәримдә әйтелгән: “Аллаһ хөкем итте вә әмер бирде, фәкать Аллаһка гына гыйбадәт кылырга һәм ата-анага изгелек итәргә. Әгәр син исән чакта аларның берсе яки икесе дә картлыкка ирешсәләр, син аларга "уф" та димәгел, вә каһәрләмә кәефләрен җибәрмә, бәлки аларга һәрвакыт йомшак вә мөлаем сүзләр сөйлә! Вә аларга шәфкать итеп, рәхим канатларыңны җәйгел! Вә әйт: "Әй Раббым, алар мине кечкенә чагымда мәрхәмәт белән үстергәннәре кебек, Син дә аларга дөньяда һәм ахирәттә шәфкать кыл!" («Әл-Исра» сүрәсе, 23-24 аятьләр)
Аллаһы Тәгалә, беренче карашка, бик гади тоелган әлеге сүзгә игътибарны җәлеп итә һәм әти-әнигә карата кулланмаска куша икән, аларны тыңламау, каршы килү, ярдәм итмәү кебек ямьсез күренешләр турында ни әйтергә мөмкин? Әлбәттә, иманлы кеше беркайчан да дорфа кыланмый, каты бәгырьле булудан саклана һәм Аллаһы Тәгаләгә каршы бармый. Моннан тыш, әти-әнисен хаклап яшәмәүчеләрнең тормышта уңышсызлыкка дучар булулары, җәмгыятьтә ихтирам яуламаулары да билгеле. Ахыр чиктә алар үзләре үк балалары тарафыннан рәнҗетелергә мөмкин.
Әти-әни – ул Раббыбызның кодрәте, адәм балаларын зурлавы, хәер-фатихасы. Алар исән чакта һәммәбез дә кадерле кешеләребезгә мәрхәмәт һәм рәхим-шәфкать күрсәтеп, көн саен әҗер-саваплы булу мөмкинлегенә ия без. Авырмы бу? Кайгыртучан, яхшы күңелле һәм олы йөрәкле кеше өчен бу һич кенә дә катлаулы түгел. Үзеңдә бу сыйфатларны тәрбияләү өчен берничә тәкъдим-киңәшне хәтерегезгә салып куегыз.
<figure><img src="//as-salam.press/storage/_content/2022/12/29/1672330894_63adbe8e5df95.jpg"></figure>
