Кайбыч мөхтәсибәтендә «Кошман укулары» фәнни конференциясе узды

Кайбыч районы Кошман авылында «Кошман укулары» фәнни конференциясе узды, ул сөннәтче бабайларның роле һәм әһәмиятенә багышланды – алар ир балаларны сөннәткә утырту белән шөгыльләнгән.

Әлеге чараны Кайбыч мөхтәсибәтенең Кошман авылы мәчете һәм Казанның Ислам динен кабул итүгә 1000 ел исемендәге мәдрәсәсе оештырды.

Конференция эшендә дәүләт вәкилләре, имамнар, тарихчылар, табиблар, эшмәкәрләр, җәмәгать эшлеклеләре, шәкертләр, шулай ук Кошман авылының сөннәтче бабайлар династиясе вәкилләре катнашты.

Үзенең сәламләү чыгышында Мөфти Камил хәзрәт әлеге җыенның татар халкының рухи мирасын өйрәнү максатыннан үткәрелүен билгеләп үтте.

Аннары фәнни җыен барышында чакырылган кунаклар, Камил хәзрәтнең фикерләрен дәвам итеп, үсеп килүче буынны чын татар-мөселман традицияләрендә тәрбияләүгә, буыннар дәвамчанлыгының мөһимлегенә бәйле чыгышлар белән конференцияне дәвам итте.

Шунысы игътибарга лаек: сөннәтче бабайлар совет чорында татар халкының рухи тормышына зур йогынты ясаган. Конференцияне үткәрү урыны итеп Кайбыч районының Кошман авылы сайланып алу очраклы түгел. Тарихи чыганаклар дин эшлеклеләренең күпчелеге – сөннәтче бабайлар – нәкъ менә шушы авылдан чыгуын раслый. Конференциядә катнашучылар ассызыклаганча, совет чорында сөннәтче бабайларның тырышлыгы татар-мөселман гореф-гадәтләрен саклап калуга ярдәм итте.

Фотосурәт: «Кайбыч таңнары»