Фәридә Мортазина: «Дөньядагы һәммә кеше бәхетле булсын»
Фәридә Мортазина: «Дөньядагы һәммә кеше бәхетле булсын»
– Үзегез турында сөйләгез әле
Мин – Мортазина Фәридә Гафиулла кызы, тумышым белән Татарстан Республикасы Балтач районыннан. Арча педагогик училищесын тәмамлагач, язмыш мине мәктәпкә китерде. Казан педагогика институтында белем алдым. Балалар белән эшләү үзаңыңны үстерә. Алар бит сине күп нәрсәгә өйрәтә. Гомер үтә, менә 32 ел инде без гаилә белән Лаеш шәһәрендә яшибез. Шуның 28 ел дәвамында Гавриил Романович Державин исемендәге Лаеш төбәге музее директоры вазифасын башкарам.
– Ислам күзлегеннән караганда музейның әһәмиятен дә әйтеп китсәгез иде.
1996 елның 26 февраленнән башлап мин гомеремне музей белән бәйләдем. Беренче елларда музейга әйберләр туплау минем өчен кыен иде, чөнки мин килгән кеше, белемем буенча математика укытучысы. Әмма да ләкин Аллаһка ышаныч тормышта күп нәрсәгә өйрәтә, ярдәм итә. Хәзерге вакытта безнең музей Республика күләмендә әйдәп баручы музейларның берсе. Гавриил Державин ерак бабасын морза Ибраһим исемле булуын һәрчак әйтеп килә. Гомеренең соңгы елларында ул татар телен өйрәнә башлый.
Музей әйберләрен җыйганда, күңелдә горурлык хисләре туа. Ислам дине начарлыкка өйрәтми, динне хөрмәт итү безнең төп бурычыбыз. Кеше алга карап, анда юлны күрсә, аның бар эше дә ул теләгәнчә буладыр дип уйлыйм.
– Үсеп килүче буынны патриот буларак тәрбияләү өчен нинди чаралар үткәрәсез?
Патриотик тәрбия бирү – музей өчен кирәкле чараларның берсе. Безнең музейның филиалы – сугышчан дан музее буларак хезмәт итә. Анда Лаеш районы тарихы аша Бөек Ватан сугышы тарихы күрсәтелгән. Балалар белән төрле чаралар үткәрелә. Очрашуга яшьармия укучыларын, сугыш чоры тарихын өйрәнүчеләрне чакырабыз.
– Киләчәктә нинди планнарыгыз бар? Музейларга нинди яңарышлар кертергә җыенасыз?
Максатсыз кеше тормышта яши алмый. Минем хыялым музейны Россия күләмендәге югарылыкка күтәрү. Цифрлаштыру дип сөйлибез, аның эш нәтиҗәләрен музейда да күрсәк иде.
– Безнең укучыларыбызга нинди теләкләрегез бар?
Дөньядагы һәммә кеше бәхетле булсын. Тынычлык һәм сәламәтлек телим.
Мансур Һашимов, Мөхәррир
