Олы Кибәче авылында балалар арасында мөәззиннәр бәйгесе үтте

Олы Кибәче авылында балалар арасында мөәззиннәр бәйгесе үтте

Саба районы Олы Кибәче авылында дүртенче тапкыр мөәззиннәр бәйгесе үтте. Анда 5 яшьтән 16 яшькә кадәрге малайлар катнашты. Бәйге шушы авылда 30 елга якын имам ярдәмчесе булган, авылның дини тормышында актив катнашкан Рафаэль Шәрәфиев истәлегенә багышлап үткәрелә. Быел анда Саба районының Олы Кибәче, Төбәк, Кече Кибәче, Олыяз, Казанчы Бигәнәй һәм Теләче районының Түбән Саурыш авылларыннан 35 бала катнашты.

Казан ислам университетының Корьән хафизлар әзерләү үзәге җитәкчесе Габдерәшит хәзрәт Фәизов катнашучыларны сәламләп, азан әйтүнең савапларын аңлатты. Саба районы мөхтәсибе Айнур хәзрәт Әхмәтов, авыл имамы Рәис хәзрәт Газизуллин уңышлар теләде.

Бәйге 4 номинациядә үтте. Үз номинацияләрендә Раян Вәлиев, Җәмил Сафин, Ибраһим Исмәгыйлов, Фирзәр Шәймәрданов җиңүче булды. «Рухи моң» берләшмәсе гамәлгә куйган «Татар азанчысы» билгесенә Җәмил Сафин лаек булды. «Иң моңлы азанчы» буларак, Тимур Маланин махсус бүләк алды. Бәйгедә катнашкан һәр балага шушы авылдан чыккан читтә яшәүче авылдашлары булышлыгы белән әзерләнгән күчтәнәчләр тапшырылды.

“Әтием исемендәге бәйгене оештыруда, үткәрүдә актив катнашкан, матди булышлык күрсәткән һәркемгә, авылдашларга, туганнарга, ТНВ һәм Шаян Тв каналларында эшләүче хезмәттәшләремә, авылыбыз имамы, әтием белән озак еллар бергә эшләгән Рәис хәзрәткә, балаларны ярышка әзерләгән ата-аналарга, авылларыбыз имамнарына, Олы Кибәче мәктәбе укытучылары Гүзәлия Измайловага, Әнисә Гафиятовага бик зур рәхмәтемне җиткерәм», - дип белдерде бәйгене оештыручы журналист Люция Шәрәфиева.