Хив райондин серенжемар
Хив гъулаъ аьхю мажлис
Улихьнаси Хив райондин Хив гъулаъ вари республикайин аьхю мажлис кIули гъубшну. Му мажлисназ шагьрар-гъулариан инсанар уч гъахьнийи.
Мажлиснаъ Дагъустандин Муфтиятдин председатель Мугьяммад Майранов, РД-йин Муфтийин заместитель Аьбдулла Салимов, адлу аьлимар Аьбдулла Хидирбеков, Аьли Султанов ва гь.ж. иштирак гъахьну. Мажлис ачмиш апIури, Хив райондин имам Шябан Салиховди уч духьнайидариз му серенжемдиъ иштирак хьпан аьхю чухсагъул къайд гъапIну. ДумутIанна гъайри, чан ва жямяаьтдин терефнаан дуфнайи хяларизра Хив райондин юрдариз дуфну вяаьз-насигьят тувбан аьхю чухсагъул гъапну.
Чпин улхбариъ гьарсар аьлимди уч духьнайидариз ихь диндин мурхьларикан, мусурмнарин чибчпин арайиъ духьну ккуни аьлакьйирикан, халкьдин арайиъ либхури шлу футнийирин зарарнакан, бицIидариз исламдиъ улупнайи инсанвалин ва ватанпересвалин тербияйикан яркьуди ктибтну. Дупну ккундуки, мицдар аьхю мажлисарикан халкьдиз гизаф мянфяаьт а, гьаз гъапиш, дурариз чпин улариинди адлу аьлимар рякъюра ва, думу аьлимариз жвуван айи суалар тувну, тамамвалиинди жавабар гъадагъуз мумкинвал шула. Аьлимарра, чпин терефнаан, гьарсаб суалнан уччвиди гъаврикк ккауз чалишмиш шула. Умуд киврахьа мицдар мажлисар Хив райондиъ хъанара артухъ шул кIури.
Хив райондин агьларихъди гюрюш
Улихьнаси Каспийск шагьриъ Хив райондиан вуйи агьалйирихъди гюрюш гъабхьну. Мушваъ Муфтиятдин Кьибла терефнаъ айи вакил Гьюсей Гьяжиев, Хив райондин имам Шябан Салихов, Каспийск шагьрин имам Шамиль Багандалиев, ДНЦйин илимдин гъуллугъчи Шарафудин Дашдемиров ва гь. ж. иштирак гъахьну.
Жюрбежюр суалар ачухъ апIбаз бахш дапIнайи чпин улхбариъ дурарикан гьарсари мусурмнарин арайиъ дубхьну ккуни сабваликан, гьюрматвалин аьлакьйирикан, шагьрар-гъулариъ жямяаьтлугъ ляхнариъ ва жигьил наслиз тербия тувбаъ дин-исламдин ва йишв`ин лихурайи диндин вакиларин, имамарин вазифайикан ктибтну, гьадму гьисабнаан гъи ухьуз айи ниъматарихъан гьямд дапIну ккуниваликанра яркьуди гъапну. Мицдар серенжемар мусурман гъардшарин арайиъ яркьу таниш`валар хьуз, сабвал уьбхюз ва гьякь-гьюрмат артухъ апIуз себеб шулу.
Хирижв гъулаъ майит жибкIбакан мялумат тувну
Хив гъулан имам Мансур Везировди Хирижв жямяаьтдиз инсан кечмиш хьувалихъди аьлакьалу вуди гъахру ляхнарикан яркьуди ктибтну. Дугъу инсан кечмиш шулайи вахтна фу дапIну ккундуш, кечмиш гъахьиган гьапIруш ва гьацира инсан фаркьат апIуваликанра мялумат тувну. Дупну ккундуки, майит жибкIувалихъди аьлакьалу ляхнар гьарсар касдиз аьгъяди ккунду. Жвуван адаш, дада, гъардаш, чи кечмиш гъахьиган, думу майит жвуван лап багахьлу ксари жибкIуб варитIан ужуб ляхин ву. Гьаддиз кми-кмиди вари гъулариъ мицдра мажлисар кIули гъягъюра. Аллагьу Тааьлайи ухьуз варидариз фарзарикан, суннатарикан аьгъю дапIну, дурар лайикь вуйиси кIулиз адагъуз тавфикьвал туври! Амин!
Урхурайидарихъди гъабхьи мянфяаьтлу сюгьбат
Хив райондин имамарин председатель Шябан Салиховди Гъвандикк гъулан мектебдиъ урхурайи бицIидарихъди хайирлу сюгьбат гъубхну. Дугъу му лекция кIулиз гъабхури, мектебдиъ урхурайидариз герек вуйи мялумат тувну. «Гъи ухьу интернетдиъ жюрбежюр информация урхурайиган, дидкан фунуб ужуб вуш, хъа фунуб чIуруб вуш ва фици ужубна-харжиб аьгъю апIуруш, аьгъяди ккунду. Гьаддиз гьарсар касдиз, ихь диндин мурхьларикан якьинди аьгъяди, гьадрариз тялукь вуйи мялуматвалар гъадагъуб хайирлу ву», - гъапну райондин имамди. Дупну ккундуки, Хив райондин вари мектебариъ мицдар лекцйир кIули гъахура ва дурарикан аьгъю мянфяаьт шула.
Дишагьлийирин серенжем
Хив райондин Хив гъулаъ вари райондин дишагьлийириз вуйи аьхю мажлис кIули гъубшну. Душваъ Дагъустандин Муфтиятдин дишагьлийирин отделин гъуллугъчйир дуфнайи. Дурари уч духьнайи мусурман дишагьлийириз гъийин йигъан мусурман чйириз фицдар читинвалар аш, дурари фици тамам дапIну ккундуш, мусурман дишагьли фицир духьну ккундуш ктибтну. Уч духьнайидар аьхю аьшкьниинди хъпехъну ва чпин айи суалариз жавабарра гъадагъну. Уч духьнайидарин улихь улхури Хив райондин имамарин председатель Шябан Салиховди мицдар серенжемарин заанваликан ктибтну.
МУРСАЛ МУРАДОВ
