Ифтар-2026!

Ассаламу аьлайкум, аьзиз ватанагьлийир! Магьа гирами Рамазандин ваз улдубчlвну. Му йисан гирами Рамазандин вазли гизаф йишвариъ ихь табасаранлуйирин ифтарар гъахьну. Гъит Аллагьу Тааьлайи варидарин туву садакьйир кьабул апlри.

Ставрополь крайиъ айи Терек гъулаъ табасаранлуйир уч духьну, сабпи ражари вуди мициб ифтар кlули гъубхну. Думу гъулаъ яшамиш шулайи ихь ватанагьлийир, ушв гьибтайиз хайлин вахт ккимиди мажлисназ дуфну, тувуз чпихьна дуфнайи хяларин насигьятнан гафарихъ аьхю разивалиинди ва дикъатниинди хъпехънийи. Саб хайлин таза таниш’валарра духьну, мавлидар-назмар дурхну, гьамциб къайдайиинди мажлис кlули гъубшну.

Дидин кьяляхъ Ставрополь шагьриъра гизаф успагьи серенжем гъабхьну. Душваъ табасаранлуйирин ифтарар апlури сакьюдар йисар ву. Гьаддиз гьар ражари инсанар аьшкьниинди иштирак шула. Му жямяаьтдиъ ихь ватанагьлийири ужуб иштираквал гъабхура ва чпиан удукьруси диндин ляхнариз кюмек тувра.

Улхьан йисариси, гьаму йисанра Москва шагьриъ табасаранлуйирин кьюб аьхю ифтарар гъахьну. Кьюбиб йишвариъра гизаф кьадар инсанар иштирак гъахьнийи. Москвайиъ яшамиш шулайи ихь халкьдин агьалйириз мицдар серенжемар нубатнан ражари чиб-чпи рякъюз, сатlиди ушв гьибтуз ужуб мумкинвал вуди шулу.

Каспийск шагьриъра магьа ужуб аьхю серенжем гъабхьну. Душваъ Муфтиятдин Кьибла Дагъустандиъ вуйи полпред Мугьяммадрамазан Ражабов, Хив райондин имам Шябан Салихов, Дербент райондин имам Тагьир Аьгьмадов, Белиджи гъулан имам Ризван Гьябибов ва гьацира жара имамар ва аьлимар иштирак гъахьнийи. Мажлиснаъ ихь аьлимари вяъзйир апlури, багъри чlалниинди нашидар урхури гъахьну. Йислан-йисаз му шагьриъ хъанара заан дережайиинди мицдар мажлисар кlули гъахура. Гъит Аллагьу Тааьлайи гьарури туву садакьйир, гъапlу ибадат кьабул апlри.

Табасаран райондиъра вари райондин аьхю ифтар гъабхьну. Думу райондин главайи ва гьацира жара меценатари тешкил гъапlуб вуйи. Душваъ СВО-йиъ кечмиш гъахьи баярин хизанар, абйир-бабар иштирак гъахьну.

Думутlанна гъайри, ифтарар Табасаран райондин гизаф гъулариъра гъахьну, Гьепlил гъулан рякъюхъ гьарйигъан рякъюъ айи 350-450 касдиз ушв гьибтуз ужуб туври гъахьну. Му аьхю савабнан ва Аллагьу Тааьла рази шлу яхнарикан ву. Гъит му ляхниъ иштирак гъахьи гьарсарикан Аллагь рази ишри.

Хив райондин Хив гъулаъ айи спортзалиъра райондин аьхю ифтар гъабхьну. Му серенжемдиъ райондин глава, райондин имам ва гьацира жара имамар ва аьлимар иштирак гъахьну. Думутlанна гъайри тамам вари гъулариъра жямяаьтдин ифтарар гъахьну.

Магьа гьамци заан дережайиинди гьаму йисан Рамазандин ваз улдубчlвну гъубшну.

Ккун апlураза Аллагьу Тааьлайикан гъюру Рамазандин вазлизра ухьуз сагъ-саламатди яшамиш хьуз уьмур тувуб, гьаз гъапиш Рамазандин ваз ихь гунгьарин аьфв апlуз аьхю мумкинвалар туврайи вахт ву.

Сефер Рашидов