Гьяжатханайиз гъягъбакан ва думу вахтна телефон ишлетмиш апlбакан

Телефондиъ гирами Кьур’ан ади гьяжатханайиз гъягъюб гьярам дапlнадар, эгер думу экрандиин, ясана файл ачмишди адарш. Эгер зенг гъюруган экбер, ясана зикру урхури дебккнаш, думу вахтна звонок дяргъюз телефон ктlубшвиш, ясана гьяжатханайиз хьади дурушиш ужи ву. Эгер ктlубшвуз кlваълан дубшну, гьадму вахтна зенг гъапlиш, дишлади зенг апlурайиб дебккну ккунду.

Гьяжатханайиъ айи вахтна саризра зенг апlуз хай шулдар, ва жарарихьан зенг гъафиш, жаваб тувну ккундар. Хъа саб себеб дубхьну, чарасуз жаваб тувну ккундуш ва увуз салам тувнуш, саламдиз жаваб тувну ккундар, яна жвуван фикриъ жаваб тувну гъибтру, ясана жаваб тувубсиб гьисаб апlруганси дапlну ккунду, дарш «вааьлейкум» дупну гъибтай, амма «Ассалам» дупну ккундар, гьаз гъапиш думу Аллагьдин ﷻ ччвур ву.

Гьяжатханайиъ учIвруган, гьаму дюаь урхуру:

بِسْمِ اللِه اَللّهُمَّ انِّى اَعُوذُ بِكَ مِنَ الْخُبُثِ وَالْخَبائِثِ

«Бисмиллагьи. Аллагьумма инни ауьзу бика миналь хубуси валь хабаиси»

Мяна: «Аллагьдин ччвурнахъан. Я Аллагь, Увкан узу чIуру шейтIнарихьан уьрхюб ккун апIураза».

Эгер гьяжатханайиъ учlвбалан кьяляхъ гьаму гафар кlваин гъахьнуш, дурар урхуб герек дар, анжагъ мелз дирибшври, жвуван фикриан кlуру. Гьяжатханайиъ инчи гъапlу касдира гьаци апlуру.

Гьяжатханайизди гагул ликрилан учlвру, хъа удучlврур арччул ликрилан. Марццишинра гагул хлихъди апlуру. Арччул хлихъди аьвратдик куркlбахьан ва дидихьинди лигбахьан ярхла духьну ккунду. Жвув’ан удубчlврубдихьинди дилигну ккундар, думу ляхниан уларин акв кам хьуз мумкин ву. Эгер гьадму вахтна шликlа салам тувради, ясана экбер урхуз хъюгъиш, фикрииндитlан жаваб тувурдар ва, удучlвган, эгер гизаф вахт ккудубшундарш, ачухъди жаваб тувру.

Гьяжатханайиан удучlвури гьаму дюаь урхуру:

غُفْرَانَكَ. اَلْحَمْدُ لِلهِ الَّذِى اَذْهَبَ عَنِّى اَلْأذَى وَعَافَانِى

«Гъуфранака, алгьямдулиллагьи ллази азгьаба аьнни аль-аза ва аьфани»

Мяна: «Я Аллагь, Увкан йиз гунгьарин аьфи апIуб ккун апIураза. Гьямд ибшри Аллагьдиз, узуз чIуруб кайиб узхьан ярхла апIбаз ва йиз жандак сагъди уьбхбаз».

Гьяжатханайиан удучlвган, сябнихьди шубуб ражари хилар жикlуб ужи ву, эгер сябун адарш - ругдихьди.