Жигьил насларин рякъ акуб ибшри
Жигьил насларин рякъ акуб ибшри
Табасаран райондиъ аьхиримжи йисари дяват отделин гъуллугъчйири жигьиларихъди, школйириъ урхурайидарихъди яркьуди ляхин апlура ва дурари зигурайи зегьметнан хъуркьувалар яваш-явашди арайиз гъюра.
Дупну ккуундуки, му отделиъ лихурайи вари баяр диндинра, светскийра образование айидар ву, гьаддиз дурариз школйириъ бицlидарихъдира ужуб къайдайиинди ляхин гъабхуз мумкинвал тувра.
Табасаран райондиъ дяват отдели гъабхурайи ляхникан ва жигьиларин аьгьвалатнакан учу думу отделин регьбер ва гьацира Хюряхъ гъулан имам Аьбдулжалил Исрафиловдихъди сюгьбат гъубхунча. Ич арайиъ гъабхьи гаф-чlал магьа ичв фикриз туврача.
- Аьбдулжалил Мевланович, сабпи нубатнаан, ихь газат урхурайидар увухъди таниш апlурхьа.
- Узу 1971-пи йисан Табасаран райондин Хюряхъ гъулаъ бабкан гъахьунзу. Хъасин Дербент шагьриз кюч гъахьиган, душваъ айи сабпи нумрайин кьялан школа ккудубкlунза. Диндин образованияйикан кlуруш, Буйнакскдин диндин университетдин Дербент шагьриъ айи филиалиъ урхури гъахьунза. Мягьячгъала шагьриъ айи ДГИ уьру дипломдиз ккудубкlунза ва, душваъ теологияйин магистратурара ккудубкlну, гьамус ДГУ-йин философияйин этикайин ва диндин факультетдин аспирант вуза. Думутlанна гъайри 2009-пи йисан мировой экономикайин институтра хъуркьувалариинди ккудубкlунза.
- Ма ша Аллагь, диндин улихь ляхин гъабхурайи кас гьамци жюрбежюр йишварихъанди образование ади хьуб лап аьхю хъуркьувал ву. Дяват отделин регьбер хьайиз, уву фу ляхин апlури гъахьунва?
- Узу сабкьадар вахтна Красноярский крайдиъ айи Норильск шагьриъ аьхю компанйириъ лихури гъахьунза. Душваъ жюрбежюр ляхнар апlури, йиз яшайиш хъапlри гъахьунза. Ислам диндин аьгъювалар хъанара яркьу апlбан бадали, Мягьячгъала шагьриз медресейиз урхуз гъафунза. Гьаци ихь диндихъ хъайи баярихъди таниш духьну, сад йигъан Табасаран райондин имамди ич гъулаъ диндин ляхнариз кюмек апlуб ккун гъапlну. Узу гъулаз гъушза ва узхьан шлу кюмек апlури гъахьунза. 2021-пи йисан сентябрь вазли райондин имамди жямяаьтдин разивалиинди узу ич гъулан имамди тасдикь гъапlну. Магьа гьадму вахтнахъанмина гъулан имамдин вазифйирра кlулиз гъахураза.
- Уву имам хьайиз Хюряхъ гъулаъ имам фуж вуйи?
- Йиз улихь Махмудов Аьлимерден кlуру кас вуйи. Думу, 84 йисан яшнаъ ади, Аллагьу Тааьлайин рягьматдиз гъушну. Гизаф сабурлу, абурлу ва жямяаьтдихъ зегьмет гъизигу кас вуйи. Аллагьу Тааьлайи чан гунгьарин аьфв апlри, женнет кьисмат апlричаз. Диндиз читин вахтари жямяаьтдин улихь гъахьну ва 44 йисандин муддатнаъ гъулан имамвал гъапlну. Дугъан адашра аьхю аьлим вуди гъахьну, дугъаз Гьяжибег кlуйи. Думу касра ич гъулан имам гъахьир ву. Гьяжибегра 98 йисаъ ади кечмиш гъахьну. Гьамцдар ужудар ксар ич жямяаьтдин, мистан имамвал апlури гъахьну. Му ляхин гьамус магьа йиз гъюнариин алабхъна.
- Уву имамди дерккган, фуну ляхнилан ккебгъунва?
- Сабпи нубатнаан ихь Аллагьу Тааьлайин хал мист ккабалгуз хъюгъза. Мистак сацlиб арайиз духну ккуни ляхнар кайи. Гьадрар кlулиз адагъну, жямяаьтдин арайиъра узхьан шлу кюмек апlури, жвуван гъул-жямяаьтдиз мянфяаьт тувуз хъюгъза. Бицlидариз мистаъ дарсарра туври, жвуван жямяаьтдин арайиъ инсан кечмиш хьуваларихъди аьлакьалу ляхнар кlулиз адагъури шулаза.
- Гъит Аллагьу Тааьлайи уву зигурайи зегьметнан аьхю савабар дикIри. Гьамус увуз тувнайи цlийи гъуллугънакан гафар апlурхьа. Имамра, дяват отделин регьберра хьуб читинди дарин?
- Сабпи нубатнаан гьамциб жавабдар ляхнар узухьна тувбан Аллагьу Тааьлайиз гьямд апlураза. Дугъриданна, диндин ляхнариъ иштирак хьуз мумкинвал тувбиин гьарсар мусурман кас рази шлу ляхин ву. Ав, Аллагьу Тааьлайинра ва халкьдинра улихь гизаф жавабдар ляхнар ву. Гьаддиз узу имамвална му ляхин сабунубди тмунуб аьлава апlруганси, чиб-чпиз кюмек тувруганси дебккназа. Дяъват отделиъ лихруган, гьарган жигьил инсанарихъди гюрюшмиш шули, дурарихъди ляхин гъабхуз аьшкь шулу.
- Абдулжалил Мевланович, дяват отдели гьял апIуз чан улихь диврайи месэлйир фицдар ву?
- Узу му отделин руководителди дерккну саб бицlи вахтналан райондин имамди отделин вари гъуллугъчйир уч дапlну, гьарурин улихь фициб ляхин дубхну ккундуш улупну, ва гьамус йиз вазифа гьадму улупнайи ляхнар заан дережайиинди кlулиз адагъуб ву: саб кlуруб, Табасаран райондиъ айи вари мектебариъ лекцйир урхуб, дурарин арайиз гъюрайи суалариз жавабар тувуб. Думутlанна гъайри, ихь райондиъ айи жюрбежюр организацйириз гъягъюри, гьадушваъра диндикан мялумат тувуб ву. Гьацира райондиъ жюрбежюр спортдихъди аьлакьалу серенжемарра гъахуз ният айич. Багарихьди варирайондин 10 йислан зиина вуйи бицlидарин арайиъ гирами Каламдин 30-пи жуз урхбан талит гъабхуз ккача, хъасин бицlи шубаризра гьациб талит тешкил апIуз ният айич.
- Мектебариъ фицдар темйириан сюгьбатар гъахури шулучва?
- Гьарсаб мектебдиз гъягъруган, думу школайиъ фициб темайиан гаф-чIал гъапIиш, ужи шуйкlан кlури, директорихъди мясляаьт апIури шулча. Хъа асас пай учу гьязур дапlну гъахурайи сюгьбатар абйир-бабарихьна, мялимарихьна, яшлу ва даршлу касарихьна дубхьну ккуни гьюрматнакан ва гьацира гъийин девриъ учlруди дугъубжвнайи месэла – экстремизмдикан вуйич. Гьацира наркотикар ишлетмиш апlбан зарарнкан, арагъ убхъбан ва гьацдар чlуру гъиллигъарин зарарнакан ктибтури шулча.
- Бицlидариз учву кlурайибдихъ хъпехъуз аьшкь шулин?
- Ав, саспи вахтари учуз улупнайи вахттlан гизафра кмиди гъябгъюри шулу, гьаз гъапиш лекцияйин вахт ккудубкlишра, баяр-шубарин суалар ккудудукIури шулу, гьадрариз жавабар туври шулча. Эгерки учу жавабар тутрувди гъитиш, хъасин соцсетариъ жавабар агури, чlуру рякъюъ ахъузра мумкин ву.
Увуз ич суалариз жаваб тувбан аьхю чухсагъул. Учву, дугъриданна, аьхю савабнан ва жямяаьтлугъдиз хайир кайи ляхин гъабхурачва. Гъит Аллагьу Тааьлайи учву гъабхурайи ляхин себеб дубхьну, ихь жигьил насларин уьмрин рякъ акуб ва бахтлуб ибшри.
