Хилар жикIуз даккни бицIир
Ассаламу алейкум, йиз бицIи дустар!
Гъи узу ктибтидизачвуз сар бицIи балкан ва, гьяятдиан хулаз гъафиган хилар жикIувал мянфяаьтсуз ляхин ву, кIуру дугъан фикрикан.
Дугъан ччвур Мягьмуд вуйи. Абйир-бабари дугъаз гьарган, гьяятдиан гъафиган, ясана уьл ипIуз дусруган, сабпи нубатнаан хилар дижикIну ккунду, кIури гъахьну. Магьа гьаму ражнура абйир-бабари кIурубдихъ хъебехъну ккунди-даккунди хилар жикIуз гъушу. Хъа дадана адаш хулаъ адру вахтна, дугъу хилар жикIури гъахьундар.
Саб ражари хябяхъдин вахтна Мягьмуддин фун иццру гъабхьи. Дугъу, гьамус - хъа ужу шул кIури, фикир туври гъахьундар. Хъа вахт гъябгърубкьан, фун хъанара ижмиди иццру шуз хъугъну.
Мягьмуддиз чан тахсир вуййиб аьгъю гъабхьи, гьаз гъапиш дугъу гъи саб ражарикьан хилар гъижикIундайи, яни абйир-бабари кIуруб гъапIундар.
Дугъу дурариз, чан тахсир вуйиб улупуз даккунди, чан фун иццурайибдикан гъапундар. Гьамци саб дарман дубхъну, нивкIуз гъягъюз умуд кади, думу ахуз дахъру. Иццрушин цIиб яваш гъабхьиган, Мягьмуд нивкIузра гъягъюру. Хъа дугъаз, фукIа иццруган, фуну дарман ипIуруш-ипIурдаш аьгъдарди, себеб апIуз хай даршлубдикан аьгъдайи. БицIидарин фун иццруган, духтрихьан гьерхбан бадали, дурари абйир-бабариз дупну ккунду.
…ГъипIу дармнин тясир ккудубкIган, фун хъанара яманди иццру гъабхьи. ГвачIниндин гъудгниз бай уягъ апIан бадали дада гъафиган, лигуруш, думу урцури улдугурайирсиб гьялнаъ ади шулу.
Хъасин аьгъю гъабхьнуки, Мягьмуддик саб чIуру инфекция кубчIвну. Дугъаз иццру хьпан тахсиркар учв вуйибра сарун аьгъяйи.
Думу сагъ апIури гизаф вахт гъубшну. Гьадму уьзур себеб вуди, дугъхьан чав гьамукьан вахтна гьязур шулайи талитнаъра иштирак хьуз гъабхьундар. Дидхъан думу дерднаъ гъахьну.
Аьхир, магьа саб вахтналан Мягьмуд сагъ гъахьи. Хъа му уьзур дугъаз чан гъюз имбу уьмрин дарс гъабхьи. Гьамус дугъаз, хилар жикI кIури, кIваин апIубкьан герек дар. Хилар жикIувал дугъаз хусуси ляхинси гъабхьи.
Йиз дустар, гъачай абйир-бабари кIурубдихъ хъпехъухьа, саб фукIа ухьухъди ужуб даруб хьайиз ккилигурдархьа. Марццишин варитIан ужуб ву, кIваинди гъибтай.
