20 йис хьпан юбилей

Гьюрматлу ватанагьлийир! Сакьюдар йисар улихьна Табасаран райондин Хючна гъулаъ ухьу вари уч духьну, фици газатдин 15 йис хьувалин юбилей къайд гъапlнуш, ихь варидарин лап ужуди кlваин илмийихь. Йигъар-вазар, йискьбар гъягъюри, магьа 21-пи январи Хючна гъулан клубдиъ ухьуз варидариз ккуни ихь чlалниинди вуйи «Ассалам» газатдин 20 йис хьувалин юбилей къайд гъапlунхьа.

Аьдат вуйиганси, ихь серенжемариъ тухъди инсанар шулу, ва Хючна гъулан клубдиъ варидариз йишв дархьиди, инсанар гьяятдиъра кмиди дугъужвну айи.

Мициб аьгьвалатнаан мялум шулаки, табасаран халкьдин ихь газатдихьна лап мани янашмиш`вал а.

Магьа сяаьт йицlуб гъабхьибси, гирами Каламдиан аятар урхбиинди, му серенжем ачмиш гъапlу.

Гирами аятар урхбан кьяляхъ, вари уч духьнайидариз газат сабпи ражари чапдиан фици удубчlвнуш, сарпи редактор фуж гъахьнуш, ролик улупну.

Сарпирди Дагъустандин Муфтиятдин терефнаан дуфнайи Кьибла Дагъустандиъ полпредди ляхин апlурайи Гьюсейн Гьяжиевдиз гаф тувну.

Дугъу чан терефнаан вари уч духьнайидар газатдин юбилейихъди кlваантlан тебрик гъапlну.

«Гъи Табасаран халкьдиз му аьхю хъуркьуваларин серенжем ву. 20 йисандин муддатнаъ му газат чапдиан адабгъура. Аьхю чухсагъул варидариз. Асас вуди газатдин редактор ва Табасаран райондин имам Ансар Рамазановдиз аьхю чухсагъул пуз ккундузуз. Гьаци вуйиган, ич терефнаан му касдиз Уьмрайиз путевка тувбанди гъахьунча» - гъапну Гьюсейн Гьяжиевди.

Гьамци Муфтиятдин терефнаан Ансар Рамазановдиз Уьмрайиз путевка тувну.

Уч духьнайидарин улихь улхури, Дербент шагьриъ айи Мугьяммад Ярагъийин ччвурнахъ хъайи мистан имам Мугьяммадтlагьир Аьгьмадовди илимдихьна фициб гьюрмат дубхьну ккундуш, Пайгъамбарин ﷺ вахтари гъибикlубдихьна фици гьюрмат уьбхюри гъахьнуш, ктибтну.

Тlюрягъ гъулан имам Альберт Гьяжикаибовди уч духьнайидарин улихьна удучlвну, ихь багъри чlалниинди назмар гъурхну. Дугъриданна, му касди инсанар гьяйран шлуганси бабан чIал`инди исламдин утканвал улупну. Гъит Аллагьу Тааьла чакан рази ишри.

Хив райондин имам Шябан Салиховди инсанариз ужувлахъна теклиф апlуб ва харжувалахьан ярхла апlуб гьарсар мусурман касди тамам дапlну ккуни ляхнарикан ву кlури, мялумат тувну.

«Саспи вахтари ихь фикир шулуки ужувблахъна теклиф апlуб, ясана диндикан мялумат тувуб сар имамдиин, вая аьлимдиин алиб ву кlури. Ваъ, думу гьарсар мусурман касдиин алиб ву. Имамдиинра, аьлимдиинра ва аьдати мусурмнаринра. Дидкан ухьу кlваълан гьаъну ккундар», - гъапну Шябан Салиховди.

Ихь газатдин литературный редактор, ДНЦ РАН-дин илимдин гъуллугъчи Шарафудин Дашдемировди инсанар савадлу апIбаъ, аьгъювалар тувбаъ ва бабан чIал адабшвбаъ газатди гъабхурайи ляхникан гъапну. «Гъи гьаму серенжемдиз райцентрин клубдиъ удрушрукьан махлукьан уч духьнайивали «Ас-салам» газатдин мянфяаьтлуваликан ва дидин редакцияйи жямяаьтдихъди гъабхурайи ляхин аьгъюди дебккнайиваликан шагьидвал апIура. Аьхиримжи йисари ислам дин гужал хьубахъди сабси, кIваълан гъягъюри чIалнаан адахьурайи гафар ва гьацира цIийи аьрабизмйир, религияйин терминар ишлетмиш апIури, къад йисандин арайиъ газатдин чан хусуси стиль дюзмиш дубхьна. Миди, дугъриданна, бабан чIал яркьуди ишлетмиш апIбаз, думу уьбхбаз ва адабшвбаз аьхю кюмек тувра», - гъапну Шарафудин Дашдемировди.

Табасаран райондин «Ассалам» газатдин вакил Аьбдулла Аьлиевди чан улхбаъ газатдиз подписка апlруган ва газат инсанарихьна хьади гъягъруган алахьру читинваларикан ктибтну.

«Гьаму йисан, гьямд ибшри Аллагьу Тааьлайиз, саб вазлин арайиъ вари раондиъ подписка гъапlунхьа. Кlваин илмийизки, узу газатдин вакилди деркку йисари вари райондиъ подписка дапlну ккудубкlайиз урчlвуб ваз шуйи. Магьа гьамус ухьуз кюмекчйир айивализ лигну, му ляхин лап улихь дубхьна», - гъапну Аьбдулла Аьлиевди.

Магьа сягьнайиина Табасаран райондин имам, газатдин редактор Ансар Рамазановдиз теклиф гъапlу. Дугъу сабпи нубатнаан вари дуфнайи хялариз чухсагъул гъапну ва газатдин юлдшар 20 йис хьпан юбилейихъди тебрик гъапlну.

«Гьамци дяъватдин ляхин апlуз ухьуз мумкинвал тувбан Дагъустандин Муфтиятдиз чухсагъул кlураза, редакторвалин вазифйир кlули гъахбаз мумкинвал тувбанра баркаллагь. Гъит ухьуз газатдин 30 йис гъабхьиганра гьамци иштирак хьуз мумкинвал ибшри», - гъапну Ансар Рамазановди.

Му серенжемдиъ Ансар Рамазановди Шарафутдин Дашдемировдиз, Аьбдулла Аьлиевдиз ва Аьгьмад-Паша Гьяжиевдиз пешкешар тувну.

Думутlанна гъайри, 2023-пи йисан райондиъ чпин ляхниъ заан хъуркьувалар улупу ксариз Уьмрайиз путевкйирра тувну.

Гьамци райондин имамарин арайиъ варитlан заан натижйир улупу Чвулатl гъулан имам Аьгьмад Сеферовдиз, Дяъват отделин гъуллугъчи Аьбдуррагьман Шихбалаевдиз ва газат тарабгъру жигьиларикан варитlан заан дережайиинди лихурайи Гьепlил гъулан агьали Аьбид Ражабовдиз гирами жилариина Уьмрайиз гъягъюз мумкинвал тувну.

Варидарин улхбар ккудукlбан кьяляхъ, тупут ипри, газатдиз подписка гъапlдарин арайиъ 20 пешкеш пай гъапIну. Хъа дурарик варитlан заан пешкеш Лада Гранта машин вуйи.

Магьа 20 йисандин юбилей къайд апlбаз гъибтнайи машин Сиртыч гъулан агьали Мягьяммадов Беглер кlуру касдиз ккубкьну.

Думу кас залиъ адайи. Вушра му шаду хабар кубкIган, кьюб сяаьтнан арайиъ чан пешкешнахьна лап шадди гъафну хъуркьу.

Гъит Аллагьу Тааьлайи ухьуз гьарсариз мицдар серенжемарикан мянфяаьт ктабгъуз мумкинвал туври. Гьарсаб хизандиъ хъуркьувалар ишри. Хъа ихь газатдиъ лихурайидариз му бажаранлу ляхниъ хъанара ужиди зегьмет зигуз Аллагьу Тааьла кюмек ишри.

Мажлис варидари сатlиди дюаь апlбиинди ккудубкlну.