Гьарйигъан ушв бисури гъахьи пайгъамбар

Мялум вуйиганси, вари пайгъамбрари ва дурарихъди гъягърудари ушв бисури гъахьну - Адам пайгъамбарихъанмина хъюгъну, варидари. Думу ушвар дисбан къайдара жа-жараб вуйи. Амма сану пайгъамбари гьарйигъан ушв бисури гъахьну. Думу пайгъамбарикан Саид афандийи чан китабдиъ бикlура.

Зуль-Кифль кlуру пайгъамбарикан гирами Каламдиъра кlваин дапlна. Дугъан гьякьнаан жюрбежюр фикрарра а, хъа Аллагьу Тааьлайиз ужуди аьгъя. Саспидари думу гьякьлу кас гъахьну кlура, хъа тмундари пайгъамбар ву кlура. Гьацира думу Ильяс пайгъамбар, Закария пайгъамбар, ясана Юшаъ пайгъамбар хьуз мумкин ву кlуру фикирра а.

Дупна, Исраиларикан вуйи сану пайгъамбариз Аллагьдихьан ﷻ вагь’ю гъафну, дугъан йигъар цlибтlан имдар, дугъу чаз чан кьяляхъ гъитрур кадагъну ккунду, ва думу кас вари йишв ибадатнаъ адапlрур, хъа йигъну ушв бисрур духьну ккунду. Шубубпи шартl, думу инсанарикан хъял апlрур духьну ккундар.

Думу пайгъамбари чан вари инсанар уч гъапlну ва гьаму шубуб шартl тамам апlуз шлур фужкlа аш, гьерху. Вари ккебехъну дугъужву ва дурарин арайиан сар жигьил удучlвну, чахьан думу ляхнар тамам апlуз шулзухьан, гъапну. Амма думу йигъан му жигьилин гафариз фикир тувундар. Хъа йигъан вари уч дапlну, хъанара гьадму суал дивру. Думу йигъанра вари ккебехъну гъузру, амма жигьил бали, думу ляхнарчахьан апlуз шулзухьан кlури, жаваб туву. Думуган пайгъамбари гьадму жигьил чан ерина ктагъуру ва халкьдин аьхюрди дерккру.

«Араисдиъ» дупнаки, му жигьил аьхюрди деркку пайгъамбарин ччвур Альяс вуйи, жара риваятдиъ думу жигьил Аюб пайгъамбарин бай Башир ву, кlурира дупна.

Думу жигьили (Башири) чан улихь диву вари шартlар хъайи-хъайиси тамам апlури гъахьну: йишвну ибадат апlури, йигъну ушвар дисури, саб гъалмагъал, хъял адарди, инсанарин ляхнар кlулиз адагъури гъахьну.

Аллагьу Тааьлайиз мициб марцци ибадат апlру ксар улдугуз чалишмиш шулайи саб шейтlниз му ляхин кьабул шулдар. Думу шейтlан пайгъамбрарра кмиди улдугуз гъитуз чалишмиш шуйи. Иблис, му пайгъамбар улдугуз гъитуз кlури, шубуб ражари чалишмиш шулу. Думу пайгъамбар суткайиъ саб бицlиди лисундин вахтнатlан ахури гъахьундар. Шубуд йигъан хъади-хъади лисунган эргвал апlурайи вахтна иблис му касдихьна кьабирин суратнаъди мугъак хъял капlуз ният ади чан суалар хьади гъюру. Амма дугъу саб жюрейинра хъял ктарди, утканвалиинди вари суалариз жавабар тувру, ва гьадмуган дугъаз Зуль-Кифль кlуру ччвур тувну.

«Бадаи» кlуру китабдиъ му ляхнин гьякьнаан Каъб аль-Ахбари гьамци ктибтура. Аюб пайгъамбар кечмиш гъахьиган, Лам кlуру паччагьди Аюб пайгъамбарин баярихьна дурарин чи швушвди дисуз ккундузуз кlури, кагъаз бикlуру. Амма чвйири ваъ гъапну, гьаз гъапиш чпин диндиъ адру кафирариз чи тувуз ихтияр адар. Дурари гьамциб кагъаз гъибикlну: «Эгер увуз дугъриданна ич чи швушвди гъадагъуз ккундуш, ич диндиз гъач».

Му ляхникан паччагьдиз хъял гъафну ва дугъанна Аюб пайгъамбарин баярин арайиъ аьлакьйир чур гъахьну. Кьюбиб терефарира кьушум уч дапlну дявдихьна гьязур гъахьи. Му дявдиъ Аюб пайгъамбарин бай Башир дурари дисуру.

Паччагьдиз Башир ккерхуз ккун гъабхьи, амма дугъхъан туврубдихъ азад апlузра рази вуйи. Хамвилиз чан гъардшихъан рубкьруб тувну, думу азад апlуз ккун гъабхьи. Амма Хамвилиз нивкl гъяркъну ва сар шли вуш гъапну: «Фукlа мутуван ва гъардшикан фикир мапlан. Думу паччагьди дин кьабул апlиди». Му нивкl гъябкъган, Хамвили гъардшихъан фукlара тутрувуб ният гъапlу.

Мидкан паччагьдиз хабар шулу. Хъял кайи паччагьди аьхю ичl дапlну, гьадушваъ Башир цlа кипну ургуз ният апlуру. Амма цlиди Башир ургури гъахьундар, вари мюгьтал шулу. Варитlан артухъ мюгьтал гъахьир паччагь учв вуйи, дугъу гъапну: «Лигайчва му Баширин фалчивализ!» Му аьламат гъябкънушра, паччагьди дин кьабул гъапlундар.

«Эй паччагь, учу фалчйир дарча! Ич аба Ибрагьимдизра Намруздин цlи зарар тувундар. Ва дугъан наслар учура Аллагьу Тааьлайи цlихьан дюрхначу», - гъапну Башири. Гьаму гафар гъеерхьиган, дугъан кlваъ Аллагьу Тааьлайин рягьимлувал абхъру ва диндиз гъюру.

Аюб пайгъамбарин баяри чпин чи дугъаз швушвди тувру. Му дин кьабул дапlну, думу касди кафирарихъди дяву гъабхуру.