Гьаз инсанариз Аьзраил малаик рякъюри имдар?

Гьарйигъан жилиин 150 агъзур инсан кечмиш шула, гьарсаб дакьикьайиъ 100 кас ахиратдиз гъягъюра. Мялум вуйиганси, инсандин рюгь адабгъуз Аьзраил малаик гъюру. Улихь вахтари Аьзраил малаик рякъюри гъахьну. Гьамус гьаз рякъюрдайкlан? Му суалназ жаваб Саид афандийин «Пайгъамбрарин тарих» кlуру китабдиъ ачмиш дапlна.

Муса пайгъамбарин уьмур аьхирихъна гъафиган, дугъахьна инсандин суратнаъди Аьзраил малаик гъафну. Дугъу Муса пайгъамбариз гъапну: «Яв Агъайиз жаваб тув!» Муса пайгъамбари дугъан машназ йивну, дугъан н ул утlубччвну. Аьзраил малаик Аллагьу Тааьлайихьна хъадакну, Яв лукlраз кечмиш хьуз ккундар, кlури аьрз гъапlну.

Аллагьу Тааьлайи Аьзраил малаикдин ул кьяляхъ гъапlну ва думу Аллагьу Тааьлайин амриинди хъанара Муса пайгъамбарихьна дуфну гъапнуки, увхьан яв хилин гагьар йицран лиъриин иливну гьадушвакк фукьан чlарар ккахьраш, ари гьадмукьан яшамиш хьуз шулвухьан. Муса пайгъамбари гьерху: «Хъасин фу шулу?» Малаикди жаваб туву: «Хъасин кечмиш хьувал улубкьуру». Думуган Муса пайгъамбар кечмиш хьувал багахь дубхьнайивалин гъаври гъахьи.

Дупну ккундуки, гьаму дюшюш хьайизкьан Аьзраил малаик рякъюри гъахьну, гьеле дугъу инсанар йихура кlуру гафарра кмиди гъахьну. Муса пайгъамбарихъди гъябхьи дюшюшдин кьяляхъ Аьзраил малаик Аллагьу Тааьлайи инсанариз дярякъруси гъапlну.

Вагьбайихьан дуфнайи жара риваятнаъ дупнаки, Муса пайгъамбариз саб йишвахь уч духьнайи малаикар гъяркъну. Дурарин багахьна дуфну, гьаз дурар уч духьнаш, гьерху. Мялум шулуки, дурари саб накьв гьязур апlура, дициб накьв гъабхьундар ва дидхъан саб уткан ва ицци ниъ гъюйи.

Мюгьтал духьнайи Муса пайгъамбари му накьв шлиз вуйкlан кlури, гьерху. «Учу думу Аллагьу Тааьлайиз лап багьаллу сар лукlраз гьязур апlурача», - гъапну малаикари. Муса пайгъамбари фуж вуйкlан му бахтавар кас, кlури чакди фикир гъапlу.

Малаикари гьерху: «Хъа увуз му накьв явуб дубхьну ккундарнуз?» - Муса пайгъабари жаваб туву: «Ав, ккундийзуз».

Малаикари дугъаз, накьвдиъ дакъ ва думу фициб вуш лиг, гъапну. Муса пайгъамбар накьвдиз ис шулу ва гъвал’инди дахъру. Аллагьу Тааьлайихьинди илтlикlну, дугъу цlиб аьхюдиси ил хътабгъуру ва гьадушвахь кечмиш шулу. Малаикари думу гьадму накьвдиъ фаракьат апlуру.